Mukanda wa Mbadi wa Mafumu
25 Mu givo gia 9 gia uhinyinyi wa Sedesiase, mu lusugu lua 10 lua mbeji ya 10, Nebukadenezale fumu wa gu Babilona wajile nu masuta enji agasue ha guluisa Yelusalema. Wahagele phundo yenji hehi nu dimbo, watungile nji gagibayi mu khulo yagasue ya dimbo ha gudiluisa. 2 Ajietele dimbo uu nu mu givo gia 11 gia uhinyinyi wa Fumu Sedesiase. 3 Mu lusugu lua 9 lua mbeji ya nguana, nzala yakola yanginyile mu dimbo, athu a mu gifutshi akhalelego nu ima ya gudia. 4 Mbalagaji jiakobuele hulu mu gibayi gia dimbo. Tangua enya Kaldea akhalele mujieta dimbo, masuta agasue alengele mu phipha, azogele ha mufulo wakhalele hakatshi dia ibayi mbadi hehi nu gilanga gia fumu. Fumu wayidile mu njila ya gu Araba. 5 Uvi masuta a enya Kaldea alanduile fumu, amukuatele mu mavu a luselenga a Yeliko. Masuta enji agasue amubembele, alengele. 6 Akuatele fumu, ayile n’enji gu Libela gudi fumu wa gu Babilona, amusophesele guene. 7 Ashiyile ana a Sedesiase ha meso enji. Gungima Nebukadenezale wakobuele Sedesiase meso, wamujitshigile nu milulu ya kuivre, wayile n’enji gu Babilona.
8 Mu lusugu lua 7 lua mbeji ya thano, yakotelesa egi mu givo gia 19 gia uhinyinyi wa Nebukadenezale fumu wa gu Babilona, Nebuzaladana, fumu wa masuta akhalele mubamba fumu munu wakhalele muenya mudimo wa fumu wa gu Babilona, wajile gu Yelusalema. 9 Wakondele inzo ya Yehowa tshuya nu inzo ya fumu nu jinzo jiagasue jia gu Yelusalema. Wakondele nji jinzo jia enya lukuma agasue. 10 Masuta agasue a gu Kaldea anyi akhalele nu Nebuzaladana abuishile ibayi yakhalele mujieta Yelusalema. 11 Nebuzaladana, fumu wa masuta akhalele mubamba fumu, wakuatele athu anyi asalele mu dimbo, wayile nawo mu uhiga nu athu anyi ayile gu khanda ya fumu wa gu Babilona nu athu ako agasue. 12 Uvi fumu wa masuta akhalele mubamba fumu wabembele athu ako anyi akhalele diago phutu mu gifutshi hagula akhale mutshita midimo mu ilanga ya vinyo nu ha gutshita midimo iko gu ngolo. 13 Enya Kaldea aboguele makunji a kuivre akhalele mu inzo ya Yehowa nu phusu-phusu nu kianga gia kuivre giakhalele mu inzo ya Yehowa, ayile nu kuivre gu Babilona. 14 Azudile nji bakantine a gukatudila fuphi nu jiphawu nu ima ya gujimina tshuya nu makhopho nu ima yagasue ya kuivre akhalele mukalegela mudimo mu tempelo. 15 Fumu wa masuta akhalele mubamba fumu wazudile malonga akhalele mubatela tshuya nu malonga a wolo wabonga nu a utadi wa siliva. 16 Uvi akhalelego nu luholo lua guthesa kuivre ya ima eyi yagasue yalondele Salomo mukunda nu inzo ya Yehowa: makunji mbadi, kianga nu phusu-phusu. 17 Kunji diagasue diakhalele nu gitala gia bakude* 18. Gu songi ya makunji ene, ambile utadi wa kuivre, alondele utadi wene gifua mabungu, yakhalele nu gitala gia bakude thathu. Muyungulu nu mabundu a grenade anyi akhalele mu khulo yagasue ya gima giakhalele gifua bungu, yalondewe nu kuivre. Makunji agasue mbadi akhalele luholo lumoshi.
18 Fumu wa masuta akhalele mubamba fumu wakuatele nji Selaya fumu wa nganga-nzambi, nu Sefanya nganga-nzambi wa mbadi nu athu thathu akhalele mubamba mufulo. 19 Wakuatele nji muthu mumoshi wakhalele mutshita mudimo mu inzo ya fumu, munu wakhalele mutuameza masuta nu athu thano anyi akhalele muhana fumu malongo anyi asangele muene mu dimbo, nu sekretere wa fumu wa masuta, munu wakhalele mubungisa masuta a mu gifutshi, nu athu 60 asangele muene mu dimbo. 20 Nebuzaladana, fumu wa masuta akhalele mubamba fumu, waazudile, wayile nawo gudi fumu wa gu Babilona gu Libela. 21 Fumu wa gu Babilona waashiyile gu Libela mu mavu a Hamate. Luene luholo akatudile enya Yuda mu gifutshi giawo, aya nawo mu uhiga.
22 Fumu Nebukadenezale wa gu Babilona watombele Gedaliya mun’a Ahikama, mujigulu wa Shafane ha gutuameza athu abembele muene mu mavu a Yuda. 23 Tangua mafumu agasue a masuta nu masuta awo avuile egi fumu wa gu Babilona watombi Gedaliya, ayile mbala imoshi mumona Gedaliya gu Mispa. Athu ene majina awo ene awa: Ishemayele mun’a Netania, Yohanana mun’a Kaleya, Selaya mun’a Tanehumeta muenya gu Netofa nu Yazanya mun’a Maka; akhalele nu masuta awo. 24 Gedaliya wadilogele gutuama diawo nu dia masuta awo, waawambelele egi: “Muvuigo woma ha gubua enya mudimo a enya Kaldea. Khalenu mu gifutshi, kalegelenu fumu wa gu Babilona, ngenyi ndaga mbajiyila muabonga mukunda nu enue.”
25 Uvi mu mbeji ya 7, Ishemayele mun’a Netania, mujigulu wa Elishama munu wakhalele mu fami ya ufumu,* wajile nu athu ako 10, ashiyile Gedaliya nu enya Yuda nu enya Kaldea anyi akhalele n’enji gu Mispa. 26 Gungima athu agasue, ikhale akoma nga azonda nu ene mafumu a masuta, akuatele njila ayile gu Ejipitu handaga akhalele muvua woma wa enya Kaldea.
27 Mu givo gia 37 sendese tangua Fumu Yoyakine wa gu Yuda wayile mu uhiga, mu lusugu lua 27 lua mbeji ya 12, Fumu Evile-Merodake wa gu Babilona wazolele Fumu Yoyakine wa gu Yuda mu bologo. Yakhalele mu givo Evile-Merodake wabuile fumu. 28 Wamumonesele gisemo, wamuhanele lutumbu luavula gubalega mafumu ako* akhalele nawo gu Babilona. 29 Yoyakine wakatudile milele yenji ya bologo, wasendesele gudia gu mesa a fumu masugu agasue a monyo wenji. 30 Uu nu gu gufua guenji, fumu wakhalele gumuhana ima ya gudia lusugu nu lusugu.