Mukanda wa Thomo wa Gudilanduluila
18 Matangua azonda gungima, Davidi waluishile enya Filistiya, waabingile diago. Waatambuile dimbo dia Gate nu membo enji a hehi. 2 Gungima wabingile enya Moaba, ene abuile enya mudimo a Davidi, akhalele gumubatela musomo.
3 Davidi wabingile Fumu Hadadezele wa gu Soba hehi nu Hamate, mu tangua diene, Hadadezele wakhalele muya ha gukomesa ufumu wenji uu nu gu khanda ya Muta wa Efrata. 4 Davidi watambudile phusu-phusu 1 000, wakuatele athu 7 000 akhalele muwendesa tubalu nu masuta 20 000 akhalele muwenda hashi. Wabatuile mishiya ya malu a tubalu tuagasue tuakhalele muwendesa phusu-phusu, uvi wabembele phamba tubalu 100. 5 Tangua enya Siliya a gu Damase ajile ha gukuatesa Fumu Hadadezele wa gu Soba, Davidi washiyile masuta awo 22 000. 6 Davidi wahagele phundo jia masuta gu Siliya ya gu Damase, enya Siliya abuile enya mudimo enji, akhalele gumuhana musomo. Guma guagasue Davidi wakhalele muya, Yehowa wakhalele gumukuatesa* ha gubinga. 7 Davidi wazudile nji tshibu jia wolo jia enya mudimo a Hadadezele, wajibatele gu Yelusalema. 8 Davidi wazudile kuivre yavula gu Tibahata nu gu Kuna, membo ene akhalele membo a Hadadezele. Gungima Salomo wazudile kuivre yene, walondele kianga gia kuivre nu makunji nu ikadigilo ya kuivre.
9 Tangua Fumu Towu* wa gu Hamate wavuile egi Davidi wabinga masuta agasue a Fumu Hadadezele wa gu Soba, 10 watumine mbala imoshi mun’enji Hadolama gudi Fumu Davidi ha gumuhula gula udi gikhuatshi nu ha gumushimana luholo luabingile muene Hadadezele (handaga Hadadezele wakhalele muluisa Towu muavula); Hadolama wajile nu ima ya maluholo agasue yalondewe nu wolo nu utadi wa siliva nu kuivre. 11 Fumu Davidi wahanele ima yene gudi Yehowa, nu utadi wa siliva nu wolo wazudile muene mu ifutshi yagasue yabingile muene. Yakhalele mu gifutshi gia Edome nu Moaba, nu gudi enya Amona, nu gudi enya Filistiya nu enya Amaleke.
12 Abishayi mun’a Seluya washiyile enya Edome 18 000 mu Baba dia Mungua. 13 Wahagele phundo jia masuta gu Edome, enya Edome agasue abuile enya mudimo a Davidi. Guma guagasue guakhalele muya Davidi, Yehowa wakhalele gumukuatesa* ha gubinga. 14 Davidi walanduile guhinyina Isalele yagasue, wakhalele musophesa athu enji agasue mu luholo luatagana. 15 Yoabe mun’a Seluya wakhalele fumu wa masuta, Yosafata mun’a Ahiluda muene wakhalele musonega ndaga jiakhalele mubua mu gifutshi. 16 Zadoke mun’a Ahituba nu Ahimeleke mun’a Abiatare akhalele nganga-nzambi, Shavesha wakhalele sekretere. 17 Benaya mun’a Yoyada wakhalele fumu wa enya Kerete nu enya Phelete. Ana a Davidi akhalele atuameji akoma gungima dienji.