Mukanda wa Mbadi wa Gudilanduluila

9 Fumu-mukhetu wa gu Sheba wavuile lukuma lua Salomo. Hene wajile gu Yelusalema ha gulola Salomo nu mihu yakola. Wajile nu enya mudimo avula diago nu shamo jiakhalele mubata maji a balesame nu wolo wavula nu maseso a ndando yakola. Wayile gudi fumu Salomo, wamuwambelele ndaga jiagasue jiakhalele mu mutshima wenji. 2 Salomo wamuhanele mvutu gu mihu yenji yagasue. Guakhalelego nga nu ndaga imoshi yakhalele yakola diago* gudi Salomo ha gumukotelesela.

3 Tangua fumu-mukhetu wa gu Sheba wamonele ndunge jia Salomo, nu inzo yatungile muene, 4 nu ima ya gudia akhalele muhaga ha mesa enji nu mafundo enya mudimo enji akhalele mukhala mu tangua dia gudia, nu luholo enya mudimo enji ako akhalele muhaga ima gu mesa, nu milele yawo nu athu akhalele gumuhana matombe nu milele yawo, nu milambu yenji ya guwotshia yakhalele muhana muene tangua diagasue gu inzo ya Yehowa, monyo wamuzogele.* 5 Hene wawambelele fumu egi: “Ndaga ngavuile mu gifutshi giami mukunda nu ndaga udi mutshita nu mukunda nu ndunge jiaye,* jidi jia giamatshidia. 6 Uvi ngatshiginyilego ndaga jiene uu nu tangua ngaza gudimonela ame hakhami. Ndaga ngamona jishigo nga gitshinyi gia ndaga ngavuile mukunda nu ndunge jiaye jiavula. Jidi diago jiavula gubalega ndaga anguwambelele. 7 Athu aye adi nu gusuanguluga, enya mudimo aye anyi ana magana tangua diagasue gutuama diaye nu ana tegelela ndunge jiaye adi diago nu gusuanguluga! 8 Yehowa Nzambi waye atumbuishiwe. Muene wa guhagele ha nguasa yenji ya ufumu hagula ukhale fumu mukunda nu Yehowa Nzambi waye. Handaga Nzambi waye wazumbile Isalele, hene wagutombele ha gukhala fumu nu ha gusophesa ndaga mu luholo luatagana nu giamatshidia, hagula Isalele ilandule gukhala ivo nu ivo.”

9 Gungima wahanele fumu wolo batalanta* 120 nu maji avula a balesame nu maseso a ndando yakola. Sendese mu lusugu luene, khenji abatelego luko maji a balesame gifua anyi fumu-mukhetu wa gu Sheba wahanele Fumu Salomo.

10 Enya mudimo a Hirame nu enya mudimo a Salomo anyi akhalele mubata wolo wa gu Ofile, akhalele nji mubata mitshi ya alegume nu maseso a ndando yavula. 11 Fumu walondele gikalo* mukunda nu inzo ya Yehowa nu mukunda nu inzo ya fumu, nu mabaya a mutshi wa alegume nu itare, nu ima iko ya gushigila miziki yana khala nu shinga mukunda nu ngimba. Khenji amonele galego ima ya luholo elu mu mavu a Yuda.

12 Fumu Salomo wahanele nji fumu-mukhetu wa gu Sheba ima yagasue yatshiginyile muene nu inyi yatogele muene, ima yene yakhalele yavula gubalega* inyi yahanele muene fumu Salomo. Gungima mukhetu muene wavutugile mu gifutshi gienji nu enya mudimo enji.

13 Givo nu givo, Salomo wakhalele muheta wolo wakhalele gunema batalanta 666. 14 Salomo wakhalele nji muheta wolo nu utadi wa siliva wakhalele mubata enya mungenda nu mafumu a enya Alabe nu baguvernere a mu gifutshi.

15 Fumu Salomo walondele tshibu jiakoma 200 jia wolo wa gubungisa nu utadi uko (yakhalele mutoga bashekele* 600 a wolo wa gubungisa nu utadi uko ha gulonda tshibu imoshi). 16 Walondele nji tshibu jiazonda-zonda* 300 jia wolo wa gubungisa nu utadi uko (yakhalele mutoga bamine* thathu a wolo ha gulonda tshibu imoshi yazonda). Gungima fumu wahagele tshibu jiene mu Inzo ya Gishitu gia Libane.

17 Fumu walondele nji nguasa ya ufumu yakoma nu mazo a ngiamba, wayikungile wolo wabonga. 18 Guakhalele nu gikalo giakhalele nu mafundo 6 a gudiatela ha gukanduga gu nguasa ya ufumu. Guakhalele nji nu gima gia guhagela malu gia wolo gia gukuatenesa nu nguasa ya ufumu, gu khanda nu khanda ya nguasa yene guakhalele nu mago; ifuanesa mbadi ya khoshi yakhalele ya gumagana hehi nu mago ene. 19 Khoshi 12 jiakhalele jia gumagana holu dia mafundo 6 a gudiatela a gikalo, gu songi ya fundo diagasue dia gudiatela guakhalele nu khoshi imoshi. Guakhalelego nga nu ufumu uko wakhalele nu nguasa ya ufumu ya luholo elu. 20 Makhopho agasue a Fumu Salomo akhalele a wolo, ima yagasue ya mu Inzo ya Gishitu gia Libane yalondewe nu wolo wabonga. Guakhalelego nga nu gima gimoshi gialondewe nu utadi wa siliva handaga mu masugu a Salomo akhalele ndo muzula utadi wa siliva nu ndando. 21 Masuwa a fumu akhalele muya gu Tarsise nu enya mudimo a Hirame. Mu ivo yagasue thathu, masuwa a gu Tarsise akhalele muza mbala imoshi nu wolo nu utadi wa siliva nu mazo a ngiamba nu jitshima nu njila jiana tamegewa egi phaona.

22 Fumu Salomo wakhalele nu umonyi wavula nu ndunge jiavula gubalega mafumu agasue a ha mavu. 23 Mafumu a ha mavu a mudidi akhalele mutshigina gumona* Salomo ha guvua ndunge jiamuhanele Nzambi wa giamatshidia. 24 Muthu wagasue mukatshi diawo wakhalele mubata kado: ima ya utadi wa siliva nu ima ya wolo nu milele, nu iluilo nu maji a balesame, nu tubalu nu phunda. Akhalele mutshita ngenyi givo nu givo. 25 Salomo wakhalele nu phango 4 000 mukunda nu tubalu tuenji nu phusu-phusu nu tubalu* 12 000. Wahagele phusu-phusu jiene mu membo atungile muene mukunda nu phusu-phusu nu gu Yelusalema hehi nu fundo diakhalele muene. 26 Wakhalele muhinyina mafumu agasue sendese gu Muta* uu nu gu gifutshi gia enya Filistiya uu nu gu mudidilo wa Ejipitu. 27 Gu Yelusalema fumu wavudishile utadi wa siliva gifua maseso, mitshi ya sedre yabuile nji yavula gifua mitshi ya sikomole gu Shefela. 28 Akhalele nji mubatela Salomo tubalu tuakhalele mukatuga gu Ejipitu nu mu ifutshi iko yagasue.

29 Ndaga jiko jiakalegele Salomo sendese gu gisendeselo uu nu gu suga, jidi jia gusonega mu mukanda wa profete Natana nu mu profesi ya Ahiya muenya gu Shilo, nu mu mukanda wa vizio jia Ido muthu wakhalele mumona vizio jiatadila Yeloboama mun’a Nebate. 30 Salomo wahinyine Isalele yagasue gu Yelusalema ivo 40. 31 Gungima Salomo wafuile gifua muafuile akhakh’enji, amufundjile mu dimbo dia sh’enji Davidi; mun’enji Roboama wabuile fumu ha fundo dienji.