Mukanda wa Mbadi wa Gudilanduluila
10 Roboama wayile gu Shekeme handaga enya Isalele agasue ayile gu Shekeme ha gumubuisa fumu. 2 Tangua Yeloboama mun’a Nebate wavuile ndaga yene (wakhalele yowu genji gu Ejipitu handaga walengele mukunda nu fumu Salomo), Yeloboama wakatugile gu Ejipitu, wajile. 3 Gungima mala a gu Isalele atumile athu ha guya gumutamega. Yeloboama nu enya Isalele agasue ayile gudi Roboama, amuwambelele egi: 4 “Sh’aye wanemesele muhitu wetu. Uvi gula aye walebesa mudimo wakola watuhanele sh’aye nu watukatula ginemo* giakola giatuhanele muene, mbatugukalegela mudimo.”
5 Roboama waawambelele egi: “Vutugenu mbamuze gungima dia masugu thathu.” Athu ene ayile. 6 Fumu Roboama wayile mumona athu a gukola* akhalele mukalegela sh’enji Salomo mudimo hakhalele muene nu monyo. Waahudile egi: “Longo ditshi mudi gunguhana hagula nguye nguhane athu awa mvutu?” 7 Ene amuvutudile egi: “Gula wakalegela athu awa ndaga jiabonga, waasuanguluisa nu waahana mvutu nu gisemo, ene mbaakhala enya mudimo aye tangua diagasue.”
8 Uvi Roboama watunyile longo diamuhuile athu agukola,* wayile mumona mavuala a mala akudile n’enji anyi abuile enya mudimo enji. 9 Waahudile egi: “Longo ditshi mudi gunguhana hagula nguye nguhane mvutu gudi athu awa anguwambelele egi: ‘Lebesa muhitu watuhagele sh’aye’?” 10 Mavuala a mala akudile n’enji amuwambelele egi: “Mukunda nu athu aji guguwambela egi: ‘Sh’aye wabuishile muhitu wetu wanema uvi aye lebesa ginemo gia muhitu wetu’; udi naye guawambela egi: ‘Muno wami wa thege-thege mbawubalega kete dia tata gukoma. 11 Tata wanemesele muhitu wenu, uvi ame mbanguwunemesa luko muavula. Tata wamihanele ndola nu fimbo jia gituhu, uvi ame mbangumihana ndola nu fimbo jidi nu utadi gu songi.’”
12 Yeloboama nu athu agasue ayile gudi Roboama mu lusugu lua thathu gifua luholo luaawambelele muene egi: “Mbamuvutuge mu lusugu lua thathu.” 13 Uvi fumu Roboama waahanele mvutu nu khabu. Watunyile gutegelela longo diamuhanele athu a gukola.* 14 Watshiginyile longo diamuhanele mavuala, wawambelele athu egi: “Ame mbangunemesa muhitu wenu muavula gubalega. Tata wamihanele ndola nu fimbo jia gituhu, uvi ame mbangumihana ndola nu fimbo jidi nu utadi gu songi.” 15 Fumu gategelelego athu handaga Nzambi wa giamatshidia watshitshile egi ndaga jikalegewe ngenyi ha gutagenesa ndaga Yehowa wawambelele Yeloboama mun’a Nebate mu njila ya Ahiya muenya gu Shilo.
16 Luholo fumu watunyile guategelela, enya Isalele agasue amuwambelele egi: “Khapho ditshi tudi nadio nu Davidi? Mbatushigo nji musalela ima ya mun’a Yese. Oo Isalele, muthu nu muthu avutuge gudi nzambi jienji! Henyaha Oo Davidi, khala mutala phamba fami yaye.” Hene enya Isalele agasue avutugile gu jinzo jiawo.*
17 Uvi Roboama walanduile guhinyina enya Isalele akhalele mu membo a gu Yuda.
18 Gungima fumu Roboama watumile Hadolama munu wakhalele mutuameza athu akhalele mutshita midimo gu ngolo, uvi enya Isalele amusonuene maseso, amushiyile. Fumu Roboama wanginyile holu dia phusu-phusu yenji, walengele, wayile gu Yelusalema. 19 Sendese lusugu luene uu nu mangino, enya Isalele ana lumbugila fami ya Davidi.