Mukanda wa Mbadi wa Gudilanduluila
16 Mu givo gia 36 gia uhinyinyi wa Fumu Asa, Fumu Basha wa gu Isalele wayile muluisa enya Yuda. Wasendesele gutunga* dimbo dia Rama hagula nga muthu gazogigo nu ganginyigo mu mavu a Fumu Asa wa gu Yuda. 2 Hene Asa wazolele utadi wa siliva nu wolo wakhalele mu sugu jia gubambela ima ya ndando mu inzo ya Yehowa nu mu inzo ya fumu, wawutumidile Fumu Bene-Hadada wa gu Siliya, munu wakhalele mujinga gu Damase. Asa wazuelele egi: 3 “Ame nu aye tuakotele gikotelo, sh’aye nu tata wami akotele nji gikotelo. Ngagutumila utadi wa siliva nu wolo. Iza ushiye gikotelo wakotele nu Fumu Basha wa gu Isalele hagula akatuge mu mavu ami.”
4 Bene-Hadada wavuile ndaga yamuwambelele Fumu Asa, watumile mafumu a masuta enji ha guya muluisa membo a Isalele. Atambudile dimbo dia Iyona nu dia Dane, nu dia Abele-Mayima nu membo agasue akhalele mubambela ima mu mavu a Nefetali. 5 Havuile Basha ndaga yene, wabembele mbala imoshi gutunga* dimbo dia Rama, wabembele nji midimo yakhalele muene mutshita guene. 6 Fumu Asa wazanguile enya Yuda agasue, ayile muzula maseso nu mabaya anyi fumu Basha wakhalele mutungila dimbo dia Rama. Gungima watungile* Geba nu Mispa nu ima yene.
7 Mu tangua diene, Hanani, muthu wakhalele mudiangela gumona ndaga mbajibua, wayile gudi Fumu Asa wa gu Yuda, wamuwambelele egi: “Washi mutshima* gudi fumu wa gu Siliya ha fundo dia gusha mutshima* gudi Yehowa Nzambi waye, gishina giene wabingilego masuta a fumu wa gu Siliya. 8 Masuta a gu Etiopi nu a gu Libia akhalele avula diago, akhalele nji nu phusu-phusu jia ita jiavula nu awendeshi a tubalu. Uvi luholo washile mutshima waye gudi Yehowa, muene waahanele ha mago aye. 9 Handaga meso a Yehowa ana wenda ha mavu agasue ha gumonesa ngolo jienji mukunda nu athu* ana gumukalegela* nu mutshima wawo wagasue. Watshita ndaga nu guheya guagasue mu mulonga owu; sendese mangino, mbaakhala guguluisa.”
10 Uvi Asa wavuile khabu mukunda nu Hanani, muthu wakhalele mudiangela gumona ndaga mbajibua, wamumbile mu bologo* mukunda nu ndaga jiazuelele muene. Mu tangua diene, Asa wasendesele nji gusagesa athu ako. 11 Lumene lua Asa sendese gu gisendeselo uu nu gu suga, ludi lua gusonega mu Mukanda wa Mafumu a gu Yuda nu a gu Isalele.
12 Mu givo gia 39 gia uhinyinyi wenji, Asa wakatele misongo ya malu, misongo yene yadivudishile; uvi ikhale tangua diakhalele muene mukata, gakambelego ukuateshi gudi Yehowa, wayile gudi mbugi. 13 Gungima Asa wafuile gifua muafuile akhakh’enji; wafuile mu givo gia 41 gia uhinyinyi wenji. 14 Amufundjile mu malumba akoma ha fundo dia diangele muene gudilondela mu Dimbo dia Davidi, amubandesele ha gitanda* akhalele mubandesa mvumbi. Gitanda giene giakhalele gia gukunga maji a balesame nu ima ya vumba diabonga ya gudisha ya gufutula nu maji a vumba diabonga. Ahagele nji tshuya tuavula ha gumutumbuisa.*