Mukanda wa Mbadi wa Gudilanduluila
17 Mun’enji Yosafata wabuile fumu ha fundo dienji, gungima wakolesele ufumu wenji gu Isalele. 2 Wahagele masuta mu membo agasue akhalele nu ibayi yakola gu Yuda, wahagele nji phundo jia masuta mu mavu a Yuda nu mu membo a Efrayime atambudile sh’enji Asa. 3 Yehowa walanduile gukhala nu Yosafata handaga Yosafata walanduile gifezegeselo* gia khakh’enji Davidi, gakambelego Bale. 4 Uvi wakambele Nzambi wa sh’enji, watumagele* mikhuala yenji, galanduilego makalegelo a gu Isalele. 5 Yehowa walanduile gujigamesa ufumu wa Yosafata. Enya Yuda agasue akhalele muhana Yosafata bakado; wabuile nu umonyi nu lutumbu luavula. 6 Yosafata watumagele Yehowa nu gikhesa giagasue, wakatudile nji mafundo a gukombelela* nu mitshi ya gijila* gu Yuda.
7 Mu givo gia thathu gia uhinyinyi wenji, watumile athu ha guya mutamega mafumu awa: Bene-Hayila, Obadia, Zakaliya, Netanele nu Mikaya ha gulongesa mu membo a gu Yuda. 8 Akhalele nji nu enya Levi awa: Shemaya, Netania, Zebadia, Asaele, Shemilamota, Yonatana, Adoniya, Tobiya nu Toba-Adoniya, akhalele nji nu nganga-nzambi Elishama nu nganga-nzambi Yolama. 9 Azudile mukanda wa mikhuala ya Yehowa, asendesele gulongesa gu Yuda. Ayile mu membo agasue a gu Yuda ha gulongesa athu.
10 Ma ufumu agasue a ifutshi yakhalele hehi nu Yuda avuidile Yehowa woma wavula, ayilego muluisa Yosafata. 11 Enya Filistiya abatele Yosafata gitadi: bakado nu makuta. Enya Alabe amubatele imeme ya milume 7 700 nu khombo jia milume 7 700 jinyi azudile mukatshi dia shitu jiawo.
12 Yosafata wabuile nu ngolo jiavula, walanduile nji gutunga mafundo akhalele nu ibayi yakola nu membo a gubambela ima gu Yuda. 13 Watshitshile midimo yakoma mu membo a gu Yuda, wakhalele nji nu masuta, alui a ita a ngolo gu Yelusalema. 14 Ahagele masuta ene mu mahunji gifua muakhalele fami jiawo: Mu giphuta gia Yuda, guakhalele nu mafumu a athu 1 000, fumu Adena nu masuta a ngolo 300 000 akhalele n’enji. 15 Gungima dienji guakhalele nu fumu Yohanana nu masuta a ngolo 280 000 akhalele n’enji. 16 Gungima dienji guakhalele nji nu Amasia mun’a Zikri, munu wadihanele mukunda nu mudimo wa Yehowa, wakhalele nu masuta a ngolo 200 000. 17 Mu giphuta gia Benjame, guakhalele nu Eliyada, suta dia ngolo, wakhalele nu athu 200 000 akhalele nu milumbu nu tshibu. 18 Gungima dienji guakhalele nu Yozabada, muene nji wakhalele nu athu 180 000 akhalele nu iluilo ya ita. 19 Ene athu akhalele mutshitshila fumu mudimo. Guakhalele nji nu athu ako anyi fumu wadiangele guhaga mu membo akhalele nu ibayi yakola mu mavu agasue a Yuda.