Mukanda wa Mbadi wa Gudilanduluila
31 Tangua amanesele ndaga eji jiagasue, enya Isalele agasue anyi akhalele hene ayile mu membo a gu Yuda, amuangele makunji a gijila, akokele mitshi ya gijila,* amuangele mafundo a gukombelela* nu iwotshielo mu mavu agasue a Yuda nu a Benjame, nu mu mavu a Efrayime nu a Manase; amuangele ima yene yagasue. Gungima, enya Isalele agasue avutugile mu membo awo, muthu nu muthu mu mavu enji.
2 Gungima Ezekiase wahagele nganga-nzambi mu mahunji awo, wahagele nji enya Levi mu mahunji awo, wahanele muthu wagasue mudimo wakhalele naye gutshita muene. Akhalele muhana milambu ya guwotshia nu milambu ya guhuima, nu gutshita mudimo wawo. Akhalele nji muhana Nzambi mersi nu gumutumbuisa gu mifulo ya ibanzala* ya Yehowa. 3 Fumu wazudile ndambo ya ima yenji, wayihanele mukunda nu milambu ya guwotshia nu milambu yana hanewa gimenegena nu ngueze nu milambu ya guwotshia mukunda nu Masugu a Guhuluguga nu mukunda nu mbeji jihe-jihe nu mawano, gifua luholo idi ya gusonega mu Mukhuala wa Yehowa.
4 Fumu wawambelele nji athu akhalele gu Yelusalema ha guhana nganga-nzambi nu enya Levi shinda diawo hagula ajiya gutagenesa muabonga mudimo* wawo gifua luholo mukhuala wa Yehowa wana zuela. 5 Hazuelele muene ndaga yene, enya Isalele ahanele mbuto jia thomo jiavula diago nu matombe ahe-ahe nu maji nu wigi nu ima yagasue yazogele mu mahia. Abatele gia kumi giavula gia ima yagasue. 6 Enya Isalele nu enya Yuda anyi akhalele mujinga mu membo a gu Yuda abatele nji gia kumi gia ngombe jiawo nu gia imeme yawo nu gia kumi gia ima ya gijila inyi yabuishiwe ya gijila mukunda nu Yehowa Nzambi wawo. Ayibatele mu tempelo, gungima ayihagele hashi thundu-thundu. 7 Mu mbeji ya thathu, asendesele guhaga misomo yawo mu thundu; mu mbeji ya 7, amanesele. 8 Tangua Ezekiase nu manene ajile mutala thundu jia ima yene, atumbuishile Yehowa, ashimbigile nji athu enji enya Isalele.
9 Ezekiase wahudile nganga-nzambi nu enya Levi mukunda nu thundu jiene jia ima, 10 hene Azariya fumu wa nganga-nzambi, muenya mu fami ya Zadoke, wamuwambelele egi: “Sendese tangua athu ana bata misomo gu inzo ya Yehowa, tudi mudia muabonga, tuakuta, uvi ima yasala yavula diago handaga Yehowa washimbiga athu enji; ima eyi udi mumona mu thundu yene yasadi.”
11 Gishina giene Ezekiase waawambelele ha gulonda sugu jia gubambela ima* mu inzo ya Yehowa; alondele sugu jiene. 12 Alanduile gubata misomo nu gia kumi nu ima ya gijila, akhalele guyitshita nu matangi abonga; ahagele nji Konaniya muenya Levi ha gutalela ima yene yagasue, phangi’enji Shimeyi wakhalele mukuateshi wenji. 13 Amoneshi akhalele mukuatesa Konaniya nu phangi’enji Shimeyi gifua muazuelele Fumu Ezekiase enyawa: Yehiele nu Azaziya nu Nahate nu Asaele nu Yelimota nu Yozabada nu Eliyele nu Isamakiya nu Mahate nu Benaya. Azariya wakhalele mutadila inzo ya Nzambi wa giamatshidia. 14 Kore mun’a Yimena muenya Levi munu wakhalele mubamba mufulo gu khanda ya mazogelo a kumbi, wakhalele mutalela milambu athu akhalele muhana mu gutshigina guawo hakhawo mukunda nu Nzambi wa giamatshidia. Wakhalele nji nu ginemo gia gukhapha misomo athu akhalele muhana Yehowa nu ima yabalega gijila. 15 Edene nu Minyamine nu Yeshua nu Shemaya nu Amaliya nu Shekania akhalele mu utuameji wenji, akhalele athu a gushila mutshima; akhalele nu ginemo gia gukhaphela aphangi’awo ima mu membo a nganga-nzambi. Akhalele guakhaphela luholo lumoshi mu hunji nu hunji, ikhale gudi mambuta nga alenge. 16 Holu dia ima yene, akhalele nji mukhapha ima gudi athu asonegewe majina mu mukanda wa senga* ya fami jiawo, yakotelesa egi athu akhalele muza lusugu nu lusugu ha gutshita mudimo mu inzo ya Yehowa nu ha gutagenesa ginemo gia mahunji awo nu gudi an’awo a mala akhalele nu ivo thathu nu holu.
17 Asonegele majina a nganga-nzambi mu mukanda wa senga ya fami jiawo gifua muakhalele fami jia mu giphuta giawo; atshitshile nji ngenyi mukunda nu enya Levi akhalele nu ivo 20 nu holu gifua muakhalele mudimo wa mahunji awo. 18 Mu mukanda wene wa senga, asonegele nji majina a akaji’awo agasue nu an’awo agasue a mala nu a akhetu nu enya Levi nu fami jiawo jiagasue, (akhalele gudiphelegetesa ha gutshita mudimo wawo wa gijila handaga akhalele athu a gushila mutshima). 19 Asonegele nji majina a ajigulu a Alona, nganga-nzambi jiakhalele mujinga mu matemu akhalele hehi nu membo awo. Mu membo agasue, atombele mala ha gukhapha ima ya gudia gudi mala agasue akhalele mu fami jia nganga-nzambi nu gudi athu agasue asonegewe majina mu mukanda wa senga ya fami jia enya Levi.
20 Ezekiase wakalegele ngenyi mu mavu agasue a Yuda, walanduile gutshita ndaga jiabonga nu jiatagana, wakhalele nji ya gujinginyina gudi Yehowa Nzambi wenji. 21 Ndaga jiagasue jiatshitshile muene ha gukamba Nzambi wenji, ikhale ndaga yatadila midimo ya mu inzo ya Nzambi wa giamatshidia nga ndaga yatadila mikhuala, wayitshitshile nu mutshima wenji wagasue, wabingile diago.