Mukanda wa Mbadi wa Gudilanduluila
34 Yoziase wakhalele nu ivo 8 habuile muene fumu, wahinyine ivo 31 gu Yelusalema. 2 Wakalegele ndaga jiabonga gu meso a Yehowa; wawendele mu njila jiagasue jiawendele khakh’enji Davidi, gayilego nga gu koko dia madia nga gu koko dia mahidi.
3 Mu givo gia 8 gia uhinyine wenji, tangua diakhalele muene muvuala, wasendesele gukamba Nzambi wa khakh’enji Davidi. Mu givo gia 12, wasendesele gukatula mafundo a gukombelela* nu makunji a gijila* nu ifuanesa nu isongo ya utadi mu mavu a gu Yuda nu gu Yelusalema. 4 Amuangele nji iwotshielo ya nzambi jia Bale ha meso enji, wakokele iwotshielo ya uhafu yakhalele holu dia iwotshielo yene. Waboguele nji makunji a gijila* itshinyi-itshinyi, nu ifuanesa nu isongo ya utadi, wayibuishile fuphi. Gungima wamuangele fuphi yene holu dia malumba a athu anyi akhalele muhana isongo yene milambu. 5 Gungima, Yoziase wawotshiele mifiya ya nganga-nzambi holu dia iwotshielo yawo. Luene luholo luaphelegetesele muene Yuda nu Yelusalema.
6 Mu membo a Manase nu a Efrayime nu a Simeone, uu nu mu mavu a Nefetali, nu mu membo awo akhalele hehi anyi ashiyiwe, 7 wamuangele iwotshielo, waboguele makunji a gijila* nu isongo, wayibuishile fuphi. Wamuangele nji iwotshielo yagasue ya uhafu yakhalele mu mavu agasue a Isalele. Gungima wavutugile gu Yelusalema.
8 Mu givo gia 18 gia uhinyinyi wa Yoziase, haphelegetesele muene gifutshi nu tempelo,* watumile Shafane mun’a Asaliya, nu Maseya fumu wa dimbo nu Yoa mun’a Yoahaze munu wakhalele musonega ndaga jiakhalele mubua mu gifutshi ha gulondega inzo ya Yehowa Nzambi wenji. 9 Ayile gudi nganga-nzambi wakoma Hilikiya, amuhanele makuta anyi azudile mu inzo ya Nzambi; makuta anyi enya Levi ana bamba mifulo azudile gudi enya giphuta gia Manase, nu gia Efrayime nu gudi enya Isalele agasue nu enya giphuta gia Yuda, nu gia Benjame nu gudi athu agasue a gu Yelusalema. 10 Gungima ahanele makuta ene gudi athu atombewe ha gutuameza midimo mu inzo ya Yehowa. Makuta ene akuatesele athu akhalele mutshita midimo ha gulondega luko inzo ya Yehowa. 11 Ahanele makuta ene gudi mbembo nu athu akhalele mutunga ha gusumba maseso a gusonga, nu mabaya a gukuata yangi, nu mabaya akoma ha gulondega luko jinzo jinyi mafumu a gu Yuda abembele mubola.
12 Mala ene akalegele mudimo wawo nu mutshima umoshi. Atombele athu awa ha gukhala atuameji awo: Yahata nu Obadia mu fami ya Melali; nu Zakaliya nu Meshulame mu fami ya Kehate. Enya Levi agasue anyi akhalele mujiya gushiga miziki muabonga, 13 akhalele nu ginemo gia gutala athu akhalele mutshita midimo.* Akhalele nji mutuameza athu agasue akhalele mutshita midimo ya maluholo agasue. Enya Levi ako akhalele basekretere, ako mafumu, uvi ako abambi a mifulo.
14 Tangua akhalele muzula mbongo jinyi athu abatele mu inzo ya Yehowa, nganga-nzambi Hilikiya wamonele mukanda wa mikhuala ya Yehowa inyi yahanewe mu njila ya Moize. 15 Gungima Hilikiya wawambelele sekretere Shafane egi: “Ngamona mukanda wa mikhuala mu inzo ya Yehowa.” Hene Hilikiya wahanele Shafane mukanda wene. 16 Gungima Shafane wayile nu mukanda wene gudi fumu, wamuwambelele egi: “Enya mudimo aye wawa mutshita mudimo wagasue waahanyi ha gutshita. 17 Azudi mbongo asangi mu inzo ya Yehowa, ajihanyi gudi athu atombewa ha gutuameza midimo nu gudi athu adi mutshita midimo.” 18 Sekretere Shafane wawambelele nji fumu egi: “Nganga-nzambi Hilikiya wanguhanyi mukanda umoshi.” Shafane wasendesele guwutanga gutuama dia fumu.
19 Tangua fumu wavuile mbimbi jiakhalele mu mukanda wa mikhuala, watawile mbala imoshi milele yenji. 20 Gungima fumu wawambelele Hilikiya nu Ahikama mun’a Shafane, nu Abedona mun’a Mika nu sekretere Shafane nu Asaya, muenya mudimo wa fumu egi: 21 “Ndenu muhule Yehowa mukunda nu ame nu mukunda nu athu adi gu Isalele nu gu Yuda mukunda nu mbimbi jidi mu mukanda wamonewa. Yehowa uza gutuvuila khabu jiakola, handaga akhakh’etu atumagelego mbimbi jia Yehowa; alanduilego ndaga jiagasue jiasonegewe mu mukanda owu.”
22 Hene, Hilikiya nu athu atumile fumu ayile gudi profete Hulda. Hulda wakhalele mukaji’a Shaluma mun’a Tikeva, mujigulu wa Halasa. Shaluma wakhalele mubambi wa milele. Hulda wakhalele mukhala mu kartie ihe-ihe ya dimbo dia Yelusalema; atele n’enji maga guene. 23 Waawambelele egi: “Yehowa Nzambi wa Isalele wazuela egi: ‘Wambelenu muthu wamitumi gudi ame egi: 24 “Yehowa wazuela egi: ‘Mbangubata malamba ha fundo edi nu gudi athu adi ha fundo diene, malamba agasue adi a gusonega mu mukanda atangi gutuama dia fumu wa gu Yuda. 25 Handaga angutunyi, adi mukanduisa mishi ya milambu yawo gudi nzambi jiko ha gunguhana khabu mukunda nu ndaga jiagasue adi mutshita; ngudi nu khabu jiabala mukunda nu fundo edi, khabu jiene mbajishigo muhua.’” 26 Uvi wambelenu fumu wa gu Yuda munu wamitumi ha guza muhula Yehowa egi: “Eji ndaga Yehowa Nzambi wa Isalele wazuela mukunda nu ndaga wavui: 27 Aye wakoleselego mutshima waye, wadibulumuisa gutuama dia Nzambi tangua wavui mbimbi jienji mukunda nu fundo edi nu athu adi hene, wadibulumuisa gutuama diami, watawula nji milele yaye, wadidi gutuama diami. Luholo watshita ngenyi, ame nji ngagutegelela, Yehowa wazuela. 28 Gishina giene, mbawufua gifua muafuile akhakh’aye.* Mbawufundjiwa mu malumba mu guhuima, meso aye mbaashigo mumona malamba agasue mbangubatela fundo edi nu athu adi hene.”’”
Gungima athu ene ayile muwambela fumu mbimbi jiene. 29 Fumu watamegele akulu agasue a gu Yuda nu a gu Yelusalema. 30 Gungima fumu wakandugile gu inzo ya Yehowa nu mala agasue a gu Yuda nu athu agasue a gu Yelusalema nu nganga-nzambi, nu enya Levi, yakotelesa egi athu agasue ikhale athu akoma nga azonda. Muene waatangele ndaga jiagasue jiakhalele mu mukanda wa gikotelo unu amonele mu inzo ya Yehowa. 31 Fumu wamaganele ha fundo dienji gutuama dia athu, wakotele gikotelo* gutuama dia Yehowa egi mbawutumagela Yehowa, mbawunemesa mikhuala yenji nu malongo enji nu mutshima wenji wagasue nu monyo* wenji wagasue, mbawutumagela nji mbimbi jia gikotelo jidi jia gusonega mu mukanda owu. 32 Watogele nji athu agasue a gu Yelusalema nu a mu giphuta gia Benjame ha gutumagela mbimbi jia gikotelo giene. Enya gu Yelusalema akalegele nji ndaga mu gudivua nu gikotelo gia Nzambi, Nzambi wa akhakh’awo. 33 Gungima Yoziase wakatudile ima yagasue ya usala* mu mavu agasue a Isalele, wakuatesele athu agasue gu Isalele ha gukombelela Yehowa Nzambi wawo. Tangua Yoziase wakhalele nu monyo, enya Isalele asalele ya gujinginyina gudi Yehowa Nzambi wa akhakh’awo.