Estere

7 Fumu nu Amane ahetele fundo diakhalele wano walondele Estere mukaji’a fumu. 2 Mu lusugu lua mbadi lua wano, tangua akhalele munua matombe, fumu wahudile luko Estere egi: “Mukaji’ami Estere, itshi udi mutshigina? Itshi udi mutoga? Ngatshima watoga gitshinyi gia ufumu wami, mbanguguhana nagio!” 3 Estere wavutudile egi: “Oo fumu, gula wasuanguluga diago nu ame nu ndaga yene ya gusuanguluisa, ngudi mutshigina egi: Uhuluise monyo wami. Ngudi gugutoga nji ha guhuluisa akuaku’ami. 4 Handaga Ame nu akuaku’ami tuadigiwe hagula atushiye nu atumanesele mukut’etu agasue. Gula nga tuadigiwe getu phamba gifua ahiga a mala nu a akhetu, nga ngudi muhena tedie. Uvi ndaga yiyi yabola ikalegewago, handaga mbayibatela fumu malamba.”

5 Gungima fumu Aseluse wahudile mukaji’enji Estere egi: “Nanyi udi mutshigina gutshita ndaga ya luholo elu? Muthu muene udi gui?” 6 Estere wazuelele egi: “Mbalagaji muene udi Amane, muthu yowu wabola.”

Amane wavile woma wakola mukunda nu fumu nu mukaji’a fumu. 7 Fumu wavile khabu jiabala, wakatugile gu wano, wayile mu jarde* ya inzo ya fumu. Uvi Amane wazugile wasendesele gububila Estere mukaji’a fumu ha guhuluisa monyo wenji, handaga wakotelesele egi fumu wazudile desizio dia gumuhana ndola. 8 Fumu wakatugile mu jarde* ya inzo ya fumu, wavutugile mu inzo ha fundo diakhalele mukalegewa wano; wasangele Amane wadimbi gale ha nguasa yakoma* yakhalele Estere. Fumu wazuelele mu dijui diakola egi: “Udi mutshigina gubungisa muila gu ngolo nu mukaji’ami mu inzo yami?” Tangua fumu wazuelele mbimbi eji, atshuigile Amane mulele gu phala. 9 Muenya mudimo mumoshi wa mu inzo ya fumu mu jina dia Halebona, wazuelele egi: “Amane walondele nji mutshi umoshi ha gushiya Mordekayi yago wazuelele ndaga jiahuluishile monyo wa fumu. Mutshi wene udi wa gujiga gumbo dia Amane, udi nu ulehelo wa bakude 50.”* Fumu wazuelele egi: “Mukhokhenu gu mutshi wene.” 10 Akhokhele Amane gu mutshi walondele muene mukunda nu Mordekayi, ngenyi khabu jia fumu jiahuile.