Mukanda wa Thomo wa Gudilanduluila
28 Gungima Davidi watamegele mafumu agasue a gu Isalele ha guza gu Yelusalema: mafumu a iphuta, mafumu a mahunji a athu akhalele mutshitshila fumu mudimo, nu mafumu a athu 1 000 nu a athu 100, nu mafumu akhalele mutadila ima yagasue ya fumu nu shitu jienji nu an’enji. Watamegele nji athu akhalele mutshita mudimo mu inzo ya fumu nu enya ngolo agasue nu athu a gushila mutshima. 2 Gungima Fumu Davidi wazugile mu molu, wazuelele egi:
“Enue aphangi’ami a mala nu athu ami, ngutegelelenu! Ngatshiginyile nu mutshima wami wagasue ha gutunga inzo mukunda nu mushete wa gikotelo wa Yehowa nu hagula ikhale nji fundo dia gudiatela dia Nzambi wetu. Ngabungishile nji ima ya gutungila inzo yene. 3 Uvi Nzambi wa giamatshidia wanguwambelele egi: ‘Ishigo aye mbawutunga inzo mukunda nu jina diami handaga waluile ita yavula, wanosesele nji mahatshi.’ 4 Uvi Yehowa Nzambi wa Isalele wangutombele mukatshi dia fami yagasue ya tata ha gubua fumu wa Isalele mayilago, handaga watombele Yuda ha gukhala mutuameji. Mu giphuta gia Yuda, watombele fami ya tata; mukatshi dia ana a tata, wasuangulugile nu ame ha gungubuisa fumu wa Isalele yagasue. 5 Mukatshi dia an’ami agasue a mala (handaga Yehowa wanguhanele ana a mala avula), watombele mun’ami Salomo ha gukhala ha nguasa ya ufumu ya Yehowa nu ha guhinyina Isalele.
6 “Wanguwambelele egi: ‘Mun’aye Salomo muene mbawutunga inzo yami nu ibanzala yami handaga ngamutombi ha gukhala mun’ami, ame nji mbangukhala sh’enji. 7 Mbangujigamesa ufumu wenji mayilago gula muene watumagela diago mikhuala yami nu badesizio ami gifua luholo ludi guyitshita muene henyaha.’ 8 Gishina giene ngudi muzuela gutuama dia enya Isalele agasue, hungu dia Yehowa, nu gutuama dia Nzambi wetu egi: Kambenu gujiya mikhuala yagasue ya Yehowa Nzambi wenu, itumagelenu nji; ngenyi mbamukhala mu gifutshi giabonga, mbagisala nji khapho dia an’enu mayilago.
9 “Aye mun’ami Salomo, kamba gujiya Nzambi wa sh’aye, mukalegele nu mutshima wagasue* nu gusuanguluga guavula handaga Yehowa wana jiya ndaga jidi mu mitshima yagasue ya athu, wana jiya nji matangi agasue a athu. Gula wamukamba, muene mbawudimonegesa gudi aye, uvi gula wamubemba, muene mbawugutuna mayilago. 10 Henyaha Yehowa wagutombi ha gutunga inzo mbayikhala fundo dia gijila. Khala nu gikhesa, tshita mudimo.”
11 Gungima Davidi wahanele mun’enji Salomo plan yakhalele mumonesa luholo lua gutunga fundo* dia gunginyila mu tempelo, sugu jia gudisha nu sugu jia gubambela ima, sugu jia gosa nu sugu jia mukatshi, nu fundo Nzambi udi naye gutotesela athu gubola. 12 Wamuhanele plan yakhalele mumonesa luholo lua gutunga ima yagasue inyi amuwambelele mu ukuateshi wa nyuma ya Nzambi, mukunda nu ibanzala ya inzo ya Yehowa, mukunda nu sugu jiagasue jia gudila jiakhalele mu khulo yenji, mukunda nu sugu ya gubambela umonyi mu inzo ya Nzambi wa giamatshidia, nu mukunda nu sugu ya gubambela ima ya gijila.* 13 Wamuhanele nji malongo mukunda nu mahunji a nganga-nzambi nu a enya Levi, nu mukunda nu midimo yagasue ya mu inzo ya Yehowa nu mukunda nu ikadigilo yagasue akhalele mukalegela mudimo mu inzo ya Yehowa. 14 Wamudijigile nji gunema gua wolo, wolo mukunda nu ikadigilo yagasue akhalele naye gukalegela midimo ya gudisha, nu gunema gua ikadigilo yagasue ya utadi wa siliva akhalele naye gukalegela midimo ya gudisha. 15 Wamuwambelele nji gunema gua ihagelo ya mienda ya wolo nu mienda yenji ya wolo, nu gunema gua ihagelo ya mienda ya gudisha nu mienda yenji, nu gunema gua ihagelo ya mienda ya utadi wa siliva, yakotelesa egi gunema gua gihagelo giagasue gia mienda nu mienda yenji, mu gudivua nu luholo akhalele naye guyikalegela. 16 Wamuwambelele nji gunema gua wolo mukunda nu mesa a mapha akhalele muhagewa mu thundu,* yakotelesa egi gunema gua mesa nu mesa, nu gunema gua utadi wa siliva mukunda nu mesa a utadi wa siliva, 17 nu gunema gua wolo mukunda nu somo nu malonga nu mabungu a wolo wabonga, nu gunema gua longa diagasue diazonda dia wolo nu gunema gua longa diagasue diazonda dia utadi wa siliva. 18 Wamuwambelele nji gunema gua wolo wabonga mukunda nu giwotshielo gia uhafu nu mukunda nu gifuanesa gia phusu-phusu, yakotelesa egi basheribe a wolo akhalele nu mahambu a gusununa nu akhalele mutshuiga mushete wa gikotelo wa Yehowa. 19 Davidi wazuelele egi: “Koko dia Yehowa diakhalele nu ame, wanguhanele ndunge hagula ngusonege ndaga jiagasue jiazonda-zonda jia gifuanesa gidi mumonesa luholo tempelo idi naye gutungiwa.”
20 Gungima Davidi wawambelele mun’enji Salomo egi: “Khala nu gikhesa nu ngolo, tshita mudimo. Uvuigo woma, ubuigo nji tunga-tunga handaga Yehowa Nzambi, Nzambi wami, udi nu aye. Muene mbagashigo gugutuna, mbagashigo nji gugubemba uvi mbawukhala nu aye uu nu tangua mudimo wagasue wa inzo ya Yehowa mbawuhua. 21 Wawa mahunji a nganga-nzambi nu a enya Levi adi naye gutshita mudimo wagasue wa mu inzo ya Nzambi wa giamatshidia. Udi nu athu adi nu matangi abonga, adi mujiya gutshita midimo ya maluholo agasue nu mafumu nu athu agasue anyi mbaalandula malongo mbawaahana.”