Mikhuala

3 “Gungima tuakondomogele, tuayidile mu njila ya gu Bashana. Fumu Oga wa gu Bashana wajile nu masuta enji agasue ha gutuluisa gu Edeleyi. 2 Yehowa wanguwambelele egi: ‘Umuvuilago woma, handaga muene nu masuta enji agasue nu gifutshi gienji mbanguahana ha mago aye, mbawumutshita gifua luholo watshitshile Sihona, fumu wa enya Amole wakhalele gu Heshebona.’ 3 Yehowa Nzambi wetu wahanele nji fumu Oga wa gu Bashana nu masuta enji agasue ha mago etu. Tuaashiyile, nga muthu mumoshi gasalelego nu monyo. 4 Tuatambudile membo awo agasue, gushigo nga nu dimbo dimoshi diasalele. Tuazudile membo 60 a gu khanda ya Alegobe, yakotelesa egi ufumu wa Oga gu Bashana. 5 Membo ene agasue akhalele nu ibayi yaleha, yakola nu mifulo nu ima yagukangela mifulo yene;* tuatambudile nji membo ako avula akhalelego nu ibayi. 6 Tuashiyile membo ene agasue nu mala nu akhetu nu ana gifua luholo tuatshitshile Fumu Sihona wa gu Heshebona. 7 Gungima tuazudile shitu jiagasue nu ima yagasue ya mu membo ene.

8 “Mu tangua diene tuatambudile gifutshi gia mafumu mbadi a enya Amole anyi akhalele gu khanda ya Yordane, sendese gu baba dia Alenona* uu nu gu Mulundu wa Helemona, 9 (enya Sidona akhalele mutamega mulundu wene egi Siliona, uvi enya Amole akhalele guwutamega egi Senile), 10 nu membo agasue anyi akhalele mu mafundo ashigo nu milundu nu Gileade yagasue nu Bashana yagasue uu nu gu Saleka nu Edeleyi, membo a ufumu wa Oga gu Bashana. 11 Fumu Oga wa gu Bashana, wakhalele muthu wa suga wasalele nu monyo mukatshi dia enya Refayime. Giphona* gienji gialondewe nu utadi,* giakhalele guleha bakude* 9, gukoma bakude nguana ha gutadila kude athu agasue ana kalegela. Giphona giene gigi guene uu nu mangino gu Raba ya enya Amona. 12 Mu tangua diene, tuatambudile gifutshi egi sendese gu dimbo dia Aloele didi gu khanda ya baba dia Alenona nu gitshinyi gia gu khanda ya milundu ya Gileade. Ngahanele membo enji gudi enya giphuta gia Ribene nu enya giphuta gia Gade. 13 Gitshinyi gia Gileade ginyi giasalele nu Bashana yagasue ya ufumu wa Oga, ngayihanele gudi gitshinyi gia giphuta gia ana a Manase. Khanda yagasue ya Alegobe ya gu Bashana yakhalele mutamegewa egi mavu a enya Refayime.

14 “Yayile, mun’a Manase wazudile khanda yagasue ya Alegobe uu nu gu mudidilo wa enya Geshule nu enya Maka. Wahanele membo ene azonda-zonda a gu Bashana jina dienji egi Havote-Yayile,* ana tamegewa ngenyi uu nu mangino. 15 Ngahanele Gileade gudi Makile. 16 Ngahanele nji enya giphuta gia Ribene nu enya giphuta gia Gade mavu adi musendesa gu Gileade uu nu gu baba dia Alenona (mudidilo wenji udi hakatshi na katshi dia baba uu nu gu Yaboke, baba diene diakhalele mudidilo wa enya Amona), 17 nu Araba nu Muta wa Yordane nu khulo yenji, sendese gu Kinelete uu nu gu Kianga gia Araba, Kianga gia Mungua* gu mbongo ya Phisega gu khanda ya mazogelo a kumbi.

18 “Gungima ngamiwambelele egi: ‘Yehowa Nzambi wenu wamihanyi gifutshi egi hagula gibue gienu. Mala enu agasue a ngolo mbaazula iluilo, mbaazawuga gutuama dia aphangi’enu enya Isalele. 19 Phamba akaji’enu nu an’enu mbaasala nu shitu jienu (ngudi mujiya muabonga egi mudi nu shitu jiavula) mu membo ngamihanyi, 20 uu nu tangua Yehowa mbawuhana aphangi’enu guhuima gifua luholo luamitshitshila muene nu mbaazula mavu anyi Yehowa Nzambi wenu mbawaahana ha sambua dia Muta wa Yordane. Gungima muthu nu muthu wajiya giwa guvutuga mu mavu enji anyi ngamihanele.’

21 “Mu tangua diene ngawambelele Yoshua egi: ‘Aye hakhaye wamonele ndaga Yehowa Nzambi waye wakalegele mafumu awa mbadi. Yehowa mbawutshita nji luholo lumoshi nu ma ufumu agasue adi mu mafundo mbamuya. 22 Mushigo naye guavuila woma handaga Yehowa Nzambi wenu mbawumiluila.’

23 “Gungima ngabubidile Yehowa egi: 24 ‘Oo Yehowa Fumu Wabalega Gukoma, wasendesele gale gungumonesela ame muenya mudimo waye ngolo jiaye jiavula nu koko guaye gua ngolo; Nzambi mutshi, ikhale mu dilu nga ha mavu, wajiya gukalagala ndaga jiakoma nu jia gushimana gifua aye? 25 Ngabuba, nguhane njila nguzawuge Muta wa Yordane ngumone gifutshi giabonga gidi ha sambua, khanda yabonga ya milundu nu Libane.’ 26 Uvi Yehowa walanduile gunguvuila khabu mukunda nu enue, gangutegelelego. Yehowa wanguwambelele egi: ‘Hena! Unguwambelago luko mulonga wene. 27 Kanduga gu songi ya Phisega, utale gu khanda ya mayilo a kumbi nu gu khanda ya nord, nu gu khanda ya sud nu gu khanda ya mazogelo a kumbi, umone gaye gifutshi nu meso, handaga mbawushigo muzawuga Muta owu wa Yordane. 28 Tomba Yoshua ha gukhala mutuameji, muhane gikhesa, mukolese handaga muene mbawuzawuga gutuama dia athu awa, muene nji mbawaakuatesa ha guzula gifutshi uya mumona.’ 29 Ndaga eji jiagasue jiakalegewe tangua tuakhalele mu baba ha sambua dia Bete-Pheole.