Mukanda wa Thomo Gudi Enya gu Kolinto

7 Henyaha mukunda nu ndaga muangusonegele, ngudi gumiwambela egi idi ndaga yabonga egi yala gakuatshigo mukhetu.* 2 Uvi luholo athu avula adi mukalagala uthambi,* idi ndaga yabonga egi yala wagasue akhale nu mukaji’enji; mukhetu wagasue nji akhale nu mulumi’enji. 3 Yala udi naye gutagenesa nzala* jia mukaji’enji. Mukhetu nji udi naye gutagenesa nzala jia mulumi’enji. 4 Mukhetu gashigo naye gutshita nu muila wenji gifua luholo ludi mutshigina muene, uvi muila wenji udi wa mulumi’enji. Luholo lumoshi nji, yala gashigo naye gutshita nu muila wenji gifua luholo ludi mutshigina muene, uvi muila wenji udi wa mukaji’enji. 5 Muthu mumoshi mukatshi dienu gashigo naye gutuna gubungisa muila nu mukaji’enji nga nu mulumi’enji. Uvi gula muadivua egi mushigo naye gubungisa muila mukunda nu tangua dimoshi ngenyi ha gudihana ha gukombelela, idi ndaga yabonga. Gungima, muajiya luko gubungisa muila hagula muhanyigo Satana njila ya gulandula gumilola mukunda nu khadilo dia gutuna gudikanda. 6 Ndaga ngudi gumiwambela ishigo mukhuala ngudi gumimbila, uvi idi phamba njila ngamidijiga hagula mulandule. 7 Ngudi mutshigina egi athu agasue akhale gifua ame. Uvi muthu nu muthu wahetele khapho dienji gudi Nzambi, yowu khapho dia luholo elu, uvi muko khapho dia luholo luko.

8 Henyaha ngudi muwambela athu adi undumbu nu akhetu a gafunda egi, idi ndaga yabonga egi asale gifua ame. 9 Uvi gula ene ashigo nu luholo lua gudikanda, muabonga adizule gawo mu ulo. Handaga idi ndaga yabonga ha gudizula mu ulo ha fundo dia gufua nu nzala jiakola jia gubungisa muila.

10 Ngudi muhana mikhuala eyi gudi athu adizudile gale mu ulo. Ishigo ame ngudi muzuela, uvi Fumu udi muzuela egi mukhetu gashigo naye gudikhapha nu mulumi’enji. 11 Uvi gula mukhetu wadikhapha nu mulumi’enji, asale undumbu nga ndo adivue nu mulumi’enji. Yala nji gashigo naye gubemba mukaji’enji.

12 Ngudi muwambela athu ako egi, ame ngudi muzuela, uvi ishigo Fumu: Gula phangi mumoshi udi nu mukhetu gashigo mulandudi wa Yesu, uvi mukhetu muene watshigina ha gukhala n’enji mu ulo, gamubembigo. 13 Gula mukhetu mumoshi nji udi nu mulumi’enji gashigo mulandudi wa Yesu, uvi yala muene watshigina ha gukhala n’enji mu ulo, gabembigo mulumi’enji. 14 Handaga yala gashigo mulandudi wa Yesu, wana gutshiginyiwa gudi Nzambi mukunda nu mukaji’enji. Mukhetu gashigo mulandudi wa Yesu, wana gutshiginyiwa nji gudi Nzambi mukunda nu mulumi’enji. Gula ndo, nga an’enu akhalele athu awusala gu meso a Nzambi; uvi henyaha abua athu agijila. 15 Uvi gula muthu gashigo mulandudi wa Yesu watshigina gudikhapha nu mukaji’enji nga nu mulumi’enji, adikhaphe n’enji. Phangi wa yala nga phangi wa mukhetu, gashigo wagujitshigiwa mu ndaga ya luholo elu. Uvi Nzambi wamitamegele ha gukhala mu guhuima. 16 Aye mukhetu, luholo lutshi wajiya gujiya gula mbawuhuluisa mulumi’aye? Aye yala nji, luholo lutshi wajiya gujiya gula mbawuhuluisa mukaji’aye?

17 Ngudi muwambela mahungu agasue egi muthu nu muthu atshite ndaga jidi gudivua nu khapho diamuhanele Yehowa, gifua luholo luamutamegele muene. 18 Gula muthu wakhalele wambiwa gale gu mukanda tangua diamutamegele Nzambi, alandule gukhala ngenyi. Gula muthu wakhalele khenji ambiwa galego gu mukanda tangua diamutamegele Nzambi, gambiwago nji gu mukanda. 19 Gumbiwa gu mukanda gushigo nu ndando, gutuna gumbiwa gu mukanda gushigo nji nu ndando. Uvi gima gidi nu ndando gidi gunemesa mikhuala ya Nzambi. 20 Muthu wagasue akhale gifua luholo luakhalele muene tangua diamutamegele Nzambi. 21 Aye wakhalele muhiga tangua diagutamegele Nzambi ba? Udisagesago. Uvi gula waheta luholo lua gukatuga mu uhiga, katuga. 22 Muthu wagasue watamegewe tangua diakhalele muene muhiga ha gubua mulandudi wa Fumu, wakudiwe mu uhiga mu Fumu. Luholo lumoshi nji, muthu wagasue watamegewe ha gubua mulandudi wa Fumu tangua diakhalele muene gashigo muhiga, udi muhiga wa Klisto. 23 Nzambi wamisumbile nu ndando yakola. Hene bembenu gubua ahiga a athu. 24 Aphangi, muthu wagasue akhale gutuama dia Nzambi gifua luholo luakhalele muene tangua diamutamegene Nzambi.

25 Henyaha mukunda nu athu adi undumbu,* ngushigo nu mukhuala udi mukatuga gudi Fumu. Uvi ngudi muhana phamba matangi’ami gifua muthu udi wagujinginyina, handaga Fumu wanguvidile khenda. 26 Gishina giene, ngudi mutangiza egi mukunda nu malamba a masugu awa, idi ndaga yabonga egi yala akhale gifua luholo adi. 27 Aye udi nu mukhetu ba? Ukambigo ha gumubemba. Uvi gula ushigo n’enji, ukambigo guzula mukhetu. 28 Uvi gula wazula mukhetu, watshitshilego gubola. Gula muthu udi undumbu* wahaga nji, muene nji gatshitshilego gubola. Uvi athu adi gudizula mu ulo mbaatagana nu malamba. Uvi ame ngudi gumitemesa hagula malamba ene amibuilago.

29 Aphangi, ndaga ngudi gumiwambela luko yenyeyi: tangua diasala diazonda. Sendese henyaha, athu adi nu akhetu akhale gifua ashigo nawo. 30 Athu adi mudila akhale gifua athu ashigo mudila. Athu adi musuanguluga, akhale gifua athu ashigo musuanguluga. Athu adi musumba akhale gifua athu ashigo nu gima. 31 Athu adi mukalegela mavu awa, akhale gifua athu ashigo guakalegela mu ndaga jiagasue handaga milonga ya ha mavu awa idi musombegesa. 32 Yadiago, ngushigo mutshigina egi mukhale nu gikenene nga giazonda. Yala udi khenji azudile galego mukhetu mu ulo, wana gudisagesa mukunda nu ndaga jia Fumu handaga wana tshigina gusuanguluisa Fumu. 33 Uvi yala wazudile gale mukhetu mu ulo, wana gudisagesa mukunda nu ndaga jia ha mavu awa handaga wana tshigina gusuanguluisa mukaji’enji. 34 Ngenyi matangi’enji adi agukhaphumuna mu khanda jiyadi. Mukhetu udi khenji azudiwa galego mu ulo, nga gandongo, wana gudisagesa mukunda nu ndaga jia Fumu hagula wajiya gukhala wagijila mu muila wenji nu mu matangi’enji. Uvi mukhetu wazudiwe gale mu ulo, wana gudisagesa mukunda nu ndaga jia ha mavu awa handaga wana tshigina gusuanguluisa mulumi’enji. 35 Ngudi muzuela ndaga eji mukunda nu gubonga guenu. Ngushigo mutshigina gumihana mikhuala,* uvi ngudi gumikuatesa hagula mutshite ndaga jiatagana, mukhale agujinginyina gudi Fumu, guwunganesa ndo matangi’enu.

36 Uvi gula muthu wamona egi gula wasala undumbu, gajiyilego gudikanda gu nzala jienji jiakola jia gubungisa muila, nu muene wabalegesa gale sungi ya ulenge, idi ndaga yabonga egi ahage genji. Gutshita ngenyi gushigo gubola ndo. 37 Uvi gula muthu wazula desizio diakola mu mutshima wenji, wamona egi gashigo nu funu ya guhaga nu udi nu ngolo jia gudikanda gu nzala jienji jia gubungisa muila, idi ndaga yabonga mukunda nu muene. 38 Hene gula muthu wahaga, watshita muabonga. Uvi gula muthu gahagelego, watshita muabonga gubalega.

39 Mukhetu wakhala wagujitshiga gudi mulumi’enji gula mulumi’enji udi nu monyo. Uvi gula mulumi’enji wafua, muene gashigo luko wagujitshigiwa gudi mulumi’enji. Wajiya gudizula mu ulo nu yala wagasue watshigina muene, uvi phamba gula yala muene udi mulandudi wa Fumu. 40 Uvi ame mu matangi’ami ngudi mumona egi mukhetu muene mbawukhala nu gusuanguluga guavula gula wasala genji gifua luholo adi. Yadiago, ngudi mutangiza egi ame nji ngudi nu nyuma ya Nzambi.