Mukanda wa Thomo wa Mafumu
15 Mu givo gia 18 gia uhinyinyi wa Fumu Yeloboama mun’a Nebate, Abiyama wabuile fumu gu Yuda. 2 Wahinyine ivo thathu gu Yelusalema. Jina dia gin’enji diakhalele Maka mujigulu wa Abishalome. 3 Abiyama watshitshile gubola guagasue guadiangele gutshita sh’enji. Khakh’enji Davidi wakalegele Nzambi nu mutshima wagasue, uvi Abiyama gakalegelego Yehowa Nzambi wenji nu mutshima wenji wagasue. 4 Yehowa wawungulugile Davidi hene wamuhanele muenda gu Yelusalema, handaga watombele mun’enji ha guhinyina gungima dienji nu watshitshile egi Yelusalema ilandule gukhala guene. 5 Handaga Davidi wakalegele ndaga jiabonga gu meso a Yehowa. Masugu agasue a monyo wenji, watumagele ndaga jiamuwambelele muene; katula phamba mulonga wa Uriya muenya Hete. 6 Masugu agasue akhalele Roboama nu monyo, akhalele gudiluisa nu Yeloboama.
7 Ndaga jiko jiakalegele Abiyama nu ima yatshitshile muene, idi yagusonega mu mukanda wa mene jia mafumu a Yuda. Abiyama nu Yeloboama akhalele nji gudiluisa. 8 Gungima Abiyama wafuile gifua muafuile akhakh’enji, amufundjile mu Dimbo dia Davidi. Mun’enji Asa wabuile fumu ha fundo dienji.
9 Mu givo gia 20 gia uhinyinyi wa fumu Yeloboama wa gu Isalele, Asa wasendesele guhinyina gu Yuda. 10 Wahinyile gu Yelusalema ivo 41. Jina dia khakh’enji wa mukhetu diakhalele Maka, wakhalele mujigulu wa Abishalome. 11 Asa watshitshile ndaga jiabonga gu meso a Yehowa, gifua khakh’enji Davidi. 12 Wakayele mala anyi akhalele mutshita uthambi mu tempelo mu gifutshi, wakatuile nji isongo yagasue ya usala* yalondele akhakh’enji. 13 Wakatudile nji khakh’enji Maka ginemua gia fumu-mukhetu, handaga walondele gisongo gia usala mukunda nu gukombelela mutshi wa gijila.* Asa wabuishile gisongo giene gia usala hashi nu wagikondele mu baba dia Kidelona. 14 Uvi mafundo a gukombelela akatudiwego. Ikhale ngenyi, Asa wakombelele Yehowa nu mutshima wagasue mu monyo* wenji wagasue. 15 Wazudile ima inyi muene nu sh’enji abuishile ya gijila, wayibatele mu inzo ya Yehowa: utadi wa siliva, wolo nu ikadigilo iko ya gudisha.
16 Asa nu fumu Basha wa gu Isalele akhalele gudiluisa tangua diagasue. 17 Hene Fumu Basha wa gu Isalele wayile muluisa enya Yuda, wasendesele gutunga* dimbo dia Rama hagula nga muthu gazogigo nu ganginyigo mu mavu a Fumu Asa wa gu Yuda. 18 Hene Asa wazudile utadi wa siliva wagasue nu wolo wasalele mu sugu akhalele mubambela ima ya ndando mukunda nu inzo ya Yehowa nu ha fundo ana bamba ima ya ndando mukunda nu inzo ya fumu, wayihanele gudi enya mudimo enji. Gungima waatumile nayo gudi fumu wa enya Siliya, Bene-Hadada mun’a Tabilimone, mujigulu wa Heziyona wakhalele mujinga gu Damase. Asa wazuelele egi: 19 “Ame nu aye tuakotele gikotelo, sh’aye nu tata wami akotele nji gikotelo. Ngagutumina kado ga utadi wa siliva nu wolo. Iza ushiye gikotelo wakotele nu Fumu Basha wa gu Isalele hagula akatuge mu mavu ami.” 20 Bene-Hadada wavuile ndaga yamuwambelele Fumu Asa, watumine mafumu a masuta enji ha guya muluisa membo a Isalele. Atambudile dimbo dia Iyona nu dia Dane nu dia Abele-Bete-Maka nu Kinelete yagasue nu mavu agasue a Nefetali. 21 Havuile Basha ndaga yene, wabembele mbala imoshi gutunga* dimbo dia Rama, walanduile gukhala gu Tilesa. 22 Fumu Asa watamegele enya Yuda agasue, nga muthu mumoshi gasalelego. Ayile muzula maseso nu mabaya anyi fumu Basha wakhalele mutungila dimbo dia Rama. Gungima Fumu Asa watungile* Geba mu mavu a Benjame nu Mispa nu ima yene.
23 Ndaga jiko jiakalegele Asa nu ngolo jienji nu ima yagasue yatshitshile muene nu membo atungile muene,* idi ya gusonega mu mukanda wa mene jia mafumu a gu Yuda. Uvi habuile muene muthu wa gukola, malu amukatele. 24 Gungima Asa wafuile gifua muafuile akhakh’enji, amufundjile mu dimbo dia khakh’enji Davidi. Mun’enji Yosafata wabuile fumu ha fundo dienji.
25 Nadabe mun’a Yeloboama wabuile fumu gu Isalele mu givo gia mbadi gia uhinyinyi wa Fumu Asa wa gu Yuda. Wahinyile Isalele ivo mbadi. 26 Walanduile gukalagala ndaga jiabola gu meso a Yehowa, walanduile nji makalegelo a sh’enji nu gubola gua sh’enji guatumine muene enya Isalele ha gukalagala. 27 Basha mun’a Ahiya wa mu fami ya Isakale wamuyidile giphungi. Wamushiyile gu Gibetona, dimbo dia enya Filistiya. Yakhalele mu tangua Nadabe nu enya Isalele agasue ajietele dimbo dia Gibetona. 28 Basha washiyile Nadabe mu givo gia thathu gia uhinyinyi wa Fumu Asa wa gu Yuda, wabuile fumu ha fundo dienji. 29 Habuile Basha fumu, washiyile enya fami yagasue ya Yeloboama. Gabembelego nga muthu mumoshi wa mu fami ya Yeloboama nu monyo. Waashiyile mukut’awo agasue gifua luholo Yehowa wazuelele mu njila ya muenya mudimo wenji Ahiya wa gu Shilo. 30 Ndaga yene yakalegewe mukunda nu gubola gua Yeloboama nu gubola guatumile muene enya Isalele ha gutshita nu handaga wahanele Yehowa Nzambi wa Isalele khabu jiakola. 31 Ndaga jiko jiakalegele Nadabe nu ima yagasue yatshitshile muene, idi ya gusonega mu mukanda wa mene jia mafumu a gu Isalele. 32 Asa nu Fumu Basha wa gu Isalele akhalele gudiluisa tangua diagasue.
33 Mu givo gia thathu gia uhinyinyi wa Fumu Asa wa gu Yuda, Basha mun’a Ahiya wabuile fumu wa Isalele yagasue gu Tilesa. Wahinyile ivo 24. 34 Walanduile gukalagala ndaga jiabola gu meso a Yehowa. Walanduile nji makalegelo nu gubola gua Yeloboama gunu guatumile muene enya Isalele ha gukalagala.