Mukanda wa Mbadi wa Gudilanduluila
15 Nyuma ya Nzambi yajile gudi Azariya mun’a Odede. 2 Hene, wayile mutagana Asa, wamuwambelele egi: “Oo Asa nu enue athu agasue a mu giphuta gia Yuda nu gia Benjame, ngutegelelenu! Yehowa mbawukhala n’enu gula enue mualandula gukhala n’enji. Gula muamukamba, muene mbawudimonesa gudi enue, uvi gula muamubemba, muene nji mbawumibemba. 3 Masugu avula abalegele, enya Isalele akhalelego nu Nzambi wa giamatshidia, akhalelego nu nganga-nzambi ha gualongesa, akhalelego nji nu mukhuala. 4 Uvi hakhalele ene mutagana nu malamba, avutugile gudi Yehowa Nzambi wa Isalele; amukambele, muene wadimonesele gudi ene. 5 Mu tangua diene, guakhalelego nu luholo lua gutshita vuayaje mu guhuima* handaga usageshi wakhalele wavula mukatshi dia athu mu mafundo avula a mu gifutshi. 6 Athu a mu giphuta giko akhalele musagesa athu a mu giphuta giko, dimbo diko diakhalele nji musagesa dimbo diko handaga Nzambi waabuishile tunga-tunga mukunda nu malamba a luholo nu luholo. 7 Uvi enue khalenu nu ngolo, mulebigo muila* handaga mbamuheta gubonga mukunda nu ndaga mudi mutshita.”
8 Tangua Asa wavuile mbimbi jiene nu profesi yazuelele profete Odede, wahetele gikhesa, wakatudile isongo ya usala mu mavu agasue a Yuda nu a Benjame nu mu membo atambudile muene gu khanda ya milundu ya Efrayime; walondele luko giwotshielo gia Yehowa giakhalele gutuama dia fundo dia gunginyila mu inzo ya Yehowa. 9 Gungima wabungishile athu agasue a mu giphuta gia Yuda nu gia Benjame nu ngenji akhalele najio, jinyi jiakatugile mu mavu a Efrayime nu a Manase nu a Simeone. Handaga athu ene avula alengele gu Isalele, ajile gudi muene tangua amonele egi Yehowa Nzambi wenji wakhalele n’enji. 10 Adibungishile gu Yelusalema mu mbeji ya thathu ya givo gia 15 gia uhinyinyi wa Asa. 11 Mu lusugu luene, azudile shitu mukatshi dia ima atambudile gu ita, ahanele Yehowa milambu, ahanele ngombe 700 nu imeme 7 000. 12 Akotele nji gikotelo ha gukamba Yehowa Nzambi wa akhakh’awo nu mutshima wawo wagasue nu monyo* wawo wagasue. 13 Muthu wagasue munu wakhalele naye gutuna gukamba Yehowa Nzambi wa Isalele, wakhalele naye gushiyiwa, ikhale muvuala nga mbuta,* yala nga mukhetu. 14 Hene, adilogele gudi Yehowa mu dijui diakola nu milolo ya gusuanguluga nu phungi nu mbinga. 15 Enya Yuda agasue asuangulugile mukunda nu gudiloga guene, handaga adilogele nu mutshima wawo wagasue; atshitshile nji yagasue ha gukamba Nzambi, muene wadimonesele gudi ene. Yehowa walanduile guakuatesa ha gukhala mu guhuima gu khanda jiagasue.
16 Fumu Asa wakatudile nji khakh’enji Maka ginemua gia fumu-mukhetu, handaga walondele gisongo gia usala ha gukombelela mutshi wa gijila.* Asa wabuishile gisongo giene gia usala hashi, wagisasumuine, gungima wagikondele tshuya mu Baba dia Kidelona. 17 Uvi mafundo a gukombelela* akatudiwego gu Isalele. Ikhale ngenyi, Asa wakombelele Nzambi* nu mutshima wenji wagasue mu monyo wenji* wagasue. 18 Wazudile ima inyi muene nu sh’enji abuishile ya gijila, wayibatele mu inzo ya Nzambi wa giamatshidia: utadi wa siliva, wolo nu ikadigilo iko ya gudisha. 19 Ita yakhalelego mu gifutshi uu nu mu givo gia 35 gia uhinyinyi wa Asa.