Mukanda wa Mbadi wa Gudilanduluila
14 Gungima Abiya wafuile gifua muafuile akhakh’enji, amufundjile mu Dimbo dia Davidi; mun’enji Asa wabuile fumu ha fundo dienji. Mu uhinyinyi wenji, gifutshi giakhalele mu guhuima ivo 10.
2 Asa wakalegele ndaga jiabonga nu jiatagana gu meso a Yehowa Nzambi wenji. 3 Wakatudile iwotshielo ya nzambi jia ngenji nu mafundo a gukombelela,* wamuangele makunji a gijila, wakokele nji mitshi ya gijila.* 4 Wawambelele nji enya Yuda ha gukamba Yehowa Nzambi wa akhakh’awo nu ha gutumagela mikhuala nu malongo enji agasue. 5 Wakatudile nji mafundo a gukombelela nu iwotshielo ya uhafu mu membo agasue a gu Yuda. Mu uhinyinyi wenji, ufumu wakhalele mu guhuima. 6 Watungile membo akhalele nu ibayi yakola mu mavu a Yuda; gifutshi giakhalele mu guhuima. Mu ivo yene, ita yakhalelego handaga Yehowa wamuhanele guhuima. 7 Wawambelele enya Yuda egi: “Tutungenu membo awa, tujietesenu nji ibayi mu khulo ya membo ene nu jinzo jialeha nu mifulo nu ima ya gukangela mifulo* yene. Gifutshi gidi ha mago etu handaga tuakambi Yehowa Nzambi wetu. Tuamukambi, muene watuhanyi guhuima gu khanda jiagasue.” Hene atungile membo ene.
8 Asa wakhalele nu masuta 300 000 a mu giphuta gia Yuda anyi akhalele nu tshibu jiakoma nu milumbu. Mu giphuta gia Benjame wakhalele nu masuta a ngolo 280 000 anyi akhalele mubata tshibu jiazonda,* akhalele nji nu mata a manana.
9 Gungima Zela muenya gu Etiopi wajile gualuisa nu masuta 1 000 000 nu phusu-phusu jia ita 300. Hahetele muene gu Malesha, 10 Asa wayile nji gumuluisa; alondele masuta awo ha gulua ita mu Baba dia Sefata gu Malesha. 11 Gungima Asa wabubidile Yehowa Nzambi wenji, wazuelele egi: “Oo Yehowa, aye wana kuatesa athu ikhale adi avula nga ashigo nu ngolo. Oo Yehowa Nzambi wetu, tukuatese handaga tudi gugushila mutshima,* tuaji muluisa thundu eyi ya athu mu jina diaye. Oo Yehowa, aye Nzambi wetu. Ubembigo egi athu a githuhu agubinge.”
12 Hene, Yehowa wakuatesele Asa nu enya Yuda ha gubinga enya gu Etiopi, gungima enya gu Etiopi alengele. 13 Asa nu masuta akhalele n’enji alanduile enya gu Etiopi uu nu gu Gelale. Ayile nu guashiya uu nu tangua a amanesele mukut’awo agasue, handaga Yehowa nu masuta enji akhalele guashiya. Gungima masuta a gu Yuda azudile ima yavula atambudile gu ita, ayile nayo. 14 Aluishile nji membo agasue akhalele hehi nu Gelale, handaga enya mu membo ene avuidile Yehowa woma wakola. Masuta a gu Yuda atambudile ima mu membo agasue handaga membo ene akhalele nu ima yavula ya guzula. 15 Ayile nji muluisa athu akhalele mujinga mu tenta anyi akhalele nu shitu, atambudile imeme yavula nu shamo. Gungima avutugile gu Yelusalema.