Mukanda wa Thomo wa Mafumu

22 Enya gu Siliya nu enya Isalele akhalelego gudiluisa ivo thathu. 2 Mu givo gia thathu, Fumu Yosafata wa gu Yuda wayile mumona fumu wa gu Isalele. 3 Gungima fumu wa gu Isalele wawambelele enya mudimo enji egi: “Mudi mujiya egi Ramote ya gu Gileade yakhala yetu ba? Itshi tuana nengena uu nu mangino ha guya guyitambula gudi fumu wa gu Siliya?” 4 Gungima wahudile Yosafata egi: “Mbawuya gungutuala ha guluisa Ramote ya gu Gileade ba?” Yosafata wavutuile fumu wa gu Isalele egi: “Ame nu aye tudi muthu mumoshi. Athu ami nu athu aye adi nji muthu mumoshi. Tubalu tuami nu tubalu tuaye tudi luholo lumoshi.”

5 Uvi Yosafata wawambelele fumu wa gu Isalele egi: “Ngabuba, hula gale Yehowa.” 6 Hene fumu wa gu Isalele wabungishile baprofete, akhalele ha mutango wa 400. Waahudile egi: “Ngudi naye guya muluisa Ramote ya gu Gileade nga ndo?” Ene amuvutuile egi: “Nda, Yehowa mbawuhana Ramote ya gu Gileade ha mago aye.”

7 Gungima Yosafata wazuelele egi: “Gushigo nu profete wa Yehowa haha ba? Tuyenu tumuhule nji.” 8 Fumu wa gu Isalele wawambelele Yosafata egi: “Guasala nu profete mumoshi munu tuajiya guhula Yehowa mu njila yenji, uvi ngana gumuzumba ndo handaga gana zuela ndo ndaga jiabonga mukunda nu ame phamba jiabola. Profete muene jina dienji Mikaya mun’a Imela.” Uvi Yosafata wamuwambelele egi: “Fumu, uzuedigo ndaga ya luholo elu.”

9 Fumu wa gu Isalele watamegele muenya mudimo wenji mumoshi wakhalele nu ufumu wavula mu inzo yenji, wamuwambelele egi: “Nda muphushi uze nu Mikaya mun’a Imela.” 10 Fumu wa gu Isalele nu Yosafata fumu wa gu Yuda, akhalele muthu nu muthu ha nguasa yenji ya ufumu, agusudiga milele ya ufumu. Akhalele ha fundo dia gusuwila mbuto, ha mufulo wa dimbo dia Samaliya. Baprofete agasue akhalele muzuela baprofesi gutuama diawo. 11 Sedesiase mun’a Kenana walondele mbinga jia utadi, wazuelele egi: “Yehowa wazuela egi: ‘Mbamuwasa* enya Siliya nu mbinga eji uu nu tangua mbamuamanesela.’” 12 Baprofete ako agasue akhalele nji muzuela profesi jia luholu lumoshi. Akhalele muzuela egi: “Nda gu Ramote ya gu Gileade, mbawubinga. Yehowa mbawuhana dimbo diene ha mago aye.”

13 Muthu wayile mutamega Mikaya wamuwambelele egi: “Tala! Baprofete adi muzuela ndaga jiabonga mukunda nu fumu. Ngabuba, aye nji zuela ndaga jiabonga gifua baprofete ene.” 14 Uvi Mikaya wamuwambelele egi: “Ngudi guguwambela giamatshidia mu jina dia Yehowa Nzambi wa monyo egi, ndaga jiagasue jiza gunguwambela Yehowa, jiene nguza muzuela.” 15 Tangua ahetele gudi fumu, fumu wamuhudile egi: “Mikaya, tudi naye guya muluisa dimbo dia Ramote ya gu Gileade nga ndo?” Mikaya wamuhanele mvutu mbala imoshi egi: “Ndenu, mbamubinga. Yehowa mbawuhana dimbo diene ha mago aye.” 16 Fumu wamuwambelele egi: “Mbala guvula gutshi ngudi naye guguwambela ha gudiloga egi udi naye gunguwambela phamba giamatshidia mu jina dia Yehowa?” 17 Mikaya wazuelele egi: “Ngamonyi enya Isalele agasue agumuangana holu dia milundu gifua imeme ishigo nu mubambi. Yehowa wazuedi egi: ‘Ashigo nu mutuameji. Muthu wagasue avutuge mu guhuima gumbo dienji.’”

18 Fumu wa gu Isalele wawambelele Yosafata egi: “Ngaguwambelele gami egi ganago guzuela ndaga jiabonga mukunda nu ame, phamba jiabola.”

19 Gungima Mikaya wazuelele egi: “Henyaha tegelela mbimbi ya Yehowa. Ngamonyi Yehowa ya gukhala ha nguasa yenji ya ufumu, masuta agasue a mu dilu a gumagana hehi n’enji, ako gu koko dienji dia madia, ako gu koko dienji dia mahidi. 20 Yehowa wahudi egi: ‘Nanyi uya muhuiga Ahaba hagula aye gu Ramote ya gu Gileade, afue guene?’ Anjelo akhadi yowu muzuela ndaga imoshi, muko muzuela ndaga iko. 21 Gungima muanjelo* mumoshi wasuenyi, wamagana gutuama dia Yehowa, wazuedi egi: ‘Ame nguya gumuhuiga.’ Yehowa wamuhudi egi: ‘Uya mutshita luholo lutshi?’ 22 Muene wamuvutudila egi: ‘Ngumuya guene ha gutuma baprofete enji agasue ha gumba mambo.’* Nzambi wazuedi egi: ‘Umuya diago gumuhuiga, mbawubinga. Nda utshite ndaga wazuela.’ 23 Yehowa watumi muanjelo ha guza muhuiga baprofete aye agasue hagula azuele ndaga jia mambo.* Uvi mu guzuela guabonga Yehowa udi mutshigina gugubatela malamba.”

24 Sedesiase mun’a Kenana wasuenele, wawasele Mikaya mbanda, wazuelele egi: “Luholo lutshi nyuma ya Yehowa yangubalega ame ha guza muzuela nu aye? 25 Mikaya wamuvutuile egi: “Mbawujiya ndaga yene lusugu mbawungina mu sugu ya mukatshi ha gudisuega.” 26 Gungima fumu wa gu Isalele wazuelele egi: “Kuatenu Mikaya, muhanenu gudi Amona fumu wa dimbo nu gudi Yoashe mun’a fumu.* 27 Awambelenu egi: ‘Fumu wazuela egi: “Mbenu muthu yowu mu bologo, khalenu gumuhana gadipha gazonda nu ndambu ya meya uu nu tangua mbanguvutuga mu guhuima.”’” 28 Uvi Mikaya wazuelele egi: “Gula wavutuga mu guhuima, zuela egi ishigo Yehowa wazuedi nu ame.” Gungima wazuelele luko egi: “Mukut’enu agasue mujimbilago mbimbi eji.”

29 Hene fumu wa gu Isalele nu fumu Yosafata wa gu Yuda ayile gu Ramote ya gu Gileade. 30 Fumu wa gu Isalele wawambelele Yosafata egi: “Ngudi musudiga milele iko ha guya gu ita hagula athu angujiyigo. Uvi aye sudiga milele yaye ya ufumu.” Hene, fumu wa gu Isalele wasudigile milele iko, wayile gu ita. 31 Fumu wa gu Siliya wawambelele bakomanda 32 a masuta enji akhalele muwendesa phusu-phusu egi: “Mudi naye guluisa phamba fumu wa gu Isalele. Muluishigo athu ako, ikhale masuta nga bakomanda.” 32 Tangua bakomanda ene amonele Yosafata, atangijile egi muene fumu wa gu Isalele hene ayile gumuluisa; Yosafata wasendesele gukaluguga ha gutoga ukuateshi. 33 Tangua bakomanda ene amonele egi ishigo fumu wa gu Isalele, abembele mbala imoshi gumulandula.

34 Uvi muthu mumoshi walabele genji gusonona mufula, mufula wene wakuatele fumu wa gu Isalele ha hulu dia mahala a gazawu genji ga ita. Fumu wawambelele muthu wakhalele muwendesa phusu-phusu yenji egi: “Balumuga! Nguzole ha fundo didi muluiwa ita* handaga nganamana mangololo.” 35 Ita yakolele mu lusugu luene, akhalele naye gukuatesa fumu ha gusala ya gumagana mu phusu-phusu yenji gutuama dia enya Siliya. Mahatshi akhalele mumuangana mukatshi dia phusu-phusu ya ita. Mu ngueze, fumu wafuile. 36 Hashiwugile tangua, mulolo wadidile mu phundo egi: “Muthu wagasue avutuge mu dimbo diawo! Muthu wagasue avutuge mu mavu enji!” 37 Luene luholo fumu wafuile. Ayile n’enji gu Samaliya, amufundjile guene. 38 Tangua akhalele muwevua phusu-phusu ya ita gu gijiba gia gu Samaliya, jimbua jialenzele mahatshi enji, akhetu a thambi azuile nji meya hene* gifua luholo Yehowa wazuelele.

39 Ndaga jiko jiakalegele Ahaba, nu ima yagasue yatshitshile muene nu inzo* ya mazo a ngiamba yatungile muene nu membo agasue atungile muene, idi yagusonega mu mukanda wa mene jia mafumu a gu Isalele. 40 Ahaba wafuile gifua muafuile akhakh’enji. Mun’enji Ahaziya wabuile fumu ha fundo dienji.

41 Yosafata mun’a Asa wabuile fumu gu Yuda mu givo gia nguana gia uhinyinyi wa fumu Ahaba wa gu Isalele. 42 Yosafata wakhalele nu ivo 35 tangua diabuile muene fumu, wahinyine ivo 25 gu Yelusalema. Jina dia gin’enji diakhalele Azuba; wakhalele mun’a Shili. 43 Yosafata walanduile makalegelo a sh’enji Asa, walanduile diago gifezegeselo gienji. Wakalegele ndaga jiabonga gu meso a Yehowa. Uvi mafundo a gukombelela akatudiwego, Athu alanduile gawo guhana milambu nu gukanduisa mishi ya milambu yene mu mafundo a gukombelela. 44 Yosafata wakhalele gudivua muabonga nu fumu wa gu Isalele. 45 Ndaga jiko jiakalegele Yosafata nu ita yabingile muene, idi ya gusonega mu mukanda wa mene jia mafumu a gu Yuda. 46 Wakatudile nji mala akhalele mutshita uthambi mu tempelo anyi asalele mu uhinyinyi wa sh’enji Asa.

47 Guakhalelego nu fumu gu Edome; guvernere mumoshi wakhalele mutuameza ha fundo dia fumu.

48 Yosafata walondele nji masuwa* a gu Tarsise ha guya muzula wolo gu Ofile. Uvi masuwa ene ayilego handaga amuanganele gu Esione-Gebele. 49 Mu tangua diene, Ahaziya mun’a Ahaba wawambelele Yosafata egi: “Enya mudimo ami aye hamoshi nu enya mudimo aye mu masuwa.” Uvi Yosafata watunyile.

50 Yosafata wafuile gifua muafuile akhakh’enji, amufundjile nu akhakh’enji mu Dimbo dia Davidi, khakh’enji. Mun’enji Yolama wabuile fumu ha fundo dienji.

51 Ahaziya mun’a Ahaba wabuile fumu wa Isalele gu Samaliya mu givo gia 17 gia uhinyinyi wa fumu Yosafata wa gu Yuda. Wahinyine ivo mbadi gu Isalele. 52 Wakhalele mutshita ndaga jiabola gu meso a Yehowa. Walanduile gifezegeselo gia sh’enji nu gin’enji nu gifezegeselo gia Yeloboama mun’a Nebate, munu watumile enya Isalele ha gutshita gubola. 53 Walanduile gukombelela Bale nu gumufugamela, wakhalele muhana Yehowa Nzambi wa Isalele khabu gifua muatshitshile sh’enji.