Mukanda wa Mbadi wa Gudilanduluila
18 Yosafata wabuile nu umonyi nu lutumbu luavula, uvi wadivuile nu Ahaba hagula muenya fami yenji adizule mu ulo nu muenya fami ya Ahaba. 2 Gungima dia ivo, Yosafata wayile mutala Ahaba gu Samaliya. Ahaba washiyile imeme nu ngombe jiavula, wahanele milambu mukunda nu Yosafata nu athu akhalele n’enji. Wabubidile* nji Yosafata ha guya muluisa Ramote ya gu Gileade. 3 Gungima Fumu Ahaba wa gu Isalele wawambelele Fumu Yosafata wa gu Yuda egi: “Mbawuya gungutuala gu Ramote ya gu Gileade ba?” Yosafata wamuvutudile egi: “Ame nu aye tudi muthu mumoshi, athu ami nu athu aye adi nji muthu mumoshi; mbatuya gugutuala gu ita.”
4 Uvi Yosafata wawambelele fumu wa gu Isalele egi: “Ngabuba, hula gale Yehowa.” 5 Fumu wa gu Isalele wabungishile baprofete 400, waahudile egi: “Tudi naye guya muluisa Ramote ya gu Gileade nga ndo?” Ene amuvutudile egi: “Nda, Nzambi wa giamatshidia mbawuhana Ramote ya gu Gileade ha mago aye.”
6 Gungima Yosafata wazuelele egi: “Gushigo nu profete wa Yehowa haha ba? Tuyenu gale tumuhule.” 7 Fumu wa gu Isalele wawambelele Yosafata egi: “Gudi nu muthu mumoshi wasala munu tuajiya guhula Yehowa mu njila yenji; uvi ngana gumuzumba ndo handaga gana zuela ndo ndaga jiabonga mukunda nu ame, tangua diagasue wana zuela phamba ndaga jiabola. Profete muene jina dienji Mikaya mun’a Imela.” Uvi Yosafata wamuwambelele egi: “Fumu, uzuedigo ndaga ya luholo elu.”
8 Fumu wa gu Isalele watamegele muenya mudimo wenji mumoshi wakhalele nu ufumu wavula mu inzo yenji, wamuwambelele egi: “Nda mu phushi uze nu Mikaya mun’a Imela.” 9 Fumu wa gu Isalele nu Yosafata fumu wa gu Yuda akhalele muthu nu muthu ha nguasa yenji ya ufumu a gusudiga milele ya ufumu. Akhalele a gukhala ha fundo dia gusuwila* mbuto ha mufulo wa dimbo dia Samaliya, baprofete agasue akhalele muzuela profesi gutuama diawo. 10 Sedesiase mun’a Kenana walondele mbinga jia utadi, wazuelele egi: “Yehowa wazuela egi: ‘Aye mbawuwasa* enya Siliya nu mbinga eji uu nu tangua mbawaamanesela.’” 11 Baprofete ako agasue akhalele nji muzuela profesi jia luholo lumoshi, akhalele muzuela egi: “Nda gu Ramote ya gu Gileade, mbawubinga; Yehowa mbawuhana dimbo diene ha mago aye.”
12 Muthu wayile mutamega Mikaya wamuwambelele egi: “Tala! Baprofete adi muzuela ndaga jiabonga mukunda nu fumu. Ngabuba, aye nji zuela ndaga jiabonga gifua baprofete ene.” 13 Uvi Mikaya wamuwambele egi: “Ngudi guguwambela giamatshidia mu jina dia Yehowa Nzambi wa monyo egi ndaga jiagasue jiza gunguwambela Nzambi wami, jiene nguza muzuela.” 14 Tangua ahetele gudi fumu, fumu wamuhudile egi: “Mikaya, tudi naye guya muluisa dimbo dia Ramote ya gu Gileade nga ndo?” Mikaya wamuhanele mvutu mbala imoshi egi: “Ndenu, mbamubinga; dimbo diene mbadihanewa diago ha mago enu.” 15 Fumu wamuwambelele egi: “Mbala guvula gutshi ngudi naye guguwambela ha gudiloga egi udi naye gunguwambela phamba giamatshidia mu jina dia Yehowa?” 16 Mikaya wamuvutudile egi: “Ngamona enya Isalele agasue a gumuangagana holu dia milundu gifua imeme ishigo nu mubambi. Yehowa wazuela egi: “Ashigo nu mutuameji. Muthu wagasue avutuge gu inzo yenji mu guhuima.’”
17 Fumu wa gu Isalele wawambelele Yosafata egi: “Ngaguwambelele gami egi: ‘Ganago guzuela ndaga jiabonga mukunda nu ame, phamba jiabola.”
18 Gungima Mikaya wazuelele egi: “Henyaha tegelela mbimbi ya Yehowa: Ngamonyi Yehowa ya gukhala ha nguasa yenji ya ufumu, masuta agasue a mu dilu agumagana ako gu koko dienji dia madia, ako gu koko dienji dia mahidi. 19 Yehowa wahudi egi: ‘Nanyi uya muhuiga fumu Ahaba wa gu Isalele hagula aye gu Ramote ya gu Gileade afue guene?’ Anjelo akhadi yowu muzuela ndaga imoshi, muko muzuela ndaga iko. 20 Gungima muanjelo mumoshi wasuenyi wamagana gutuama dia Yehowa, wazuedi egi: ‘Ame nguya gumuhuiga.’ Yehowa wamuhudi egi: ‘Uya mutshita luholo lutshi?’ 21 Muene wamuvutudila egi: ‘Ngudi muya guene ha gutuma baprofete enji agasue ha gumba mambo.’ Hene Nzambi wamuwambela egi: ‘Udi muya diago gumuhuiga, mbawubinga, nda utshite ndaga wazuela.’ 22 Yehowa watumi muanjelo ha guza muhuiga baprofete aye hagula azuele ndaga jia mambo, uvi mu guzuela guabonga Yehowa udi mutshigina gugubatela malamba.”
23 Sedesiase mun’a Kenana wasuenele, wawasele Mikaya mbanda, wazuelele egi: “Luholo lutshi nyuma ya Yehowa yangubalega ame ha guza muzuela nu aye?” 24 Mikaya wamuvutuile egi: “Mbawujiya ndaga yene lusugu mbawungina mu sugu ya mukatshi ha gudisuega.” 25 Gungima fumu wa gu Isalele wazuelele egi: “Kuatenu Mikaya, muhanenu gudi Amona fumu wa dimbo nu gudi Yoashe mun’a fumu. 26 Awambelenu egi: ‘Fumu wazuela egi: “Mbenu muthu yowu mu bologo, khalenu gumuhana gadipha gazonda nu ndambu ya meya uu nu tangua mbanguvutuga mu guhuima.”’” 27 Uvi Mikaya wazuelele egi: “Gula wavutuga mu guhuima, zuela egi ishigo Yehowa wazuedi nu ame.” Gungima wazuelele luko egi: “Mukut’enu agasue mujimbilago mbimbi eji.”
28 Hene, fumu wa gu Isalele nu fumu Yosafata wa gu Yuda ayile gu Ramote ya gu Gileade. 29 Fumu wa gu Isalele wawambelele Yosafata egi: “Ngudi musudiga milele iko ha guya gu ita hagula athu angujiyigo, uvi aye sudiga milele yaye ya ufumu.” Hene, fumu wa gu Isalele wasudigile milele iko, ayile gu ita. 30 Fumu wa gu Siliya wawambelele bakomanda a masuta enji akhalele muwendesa phusu-phusu egi: “Mudi naye guluisa phamba fumu wa gu Isalele, muluishigo athu ako ikhale masuta nga bakomanda.” 31 Tangua bakomanda ene amonele Yosafata, atangijile egi muene fumu wa gu Isalele, hene ayile gumuluisa. Yosafata wasendesele gukaluguga ha gutoga ukuateshi, Yehowa wamukuatesele; Nzambi watshitshile mbala imoshi egi athu ene akatuge gudi muene. 32 Tangua bakomanda ene amonele egi ishigo fumu wa gu Isalele, abembele mbala imoshi gumulandula.
33 Uvi muthu mumoshi walabele genji gusonona mufula, wakuatele fumu wa gu Isalele ha hulu dia mahala a gazagu genji ga ita. Fumu wawambelele muthu wakhalele muwendesa phusu-phusu yenji egi: “Balumuga, nguzole ha fundo didi muluiwa ita* handaga nganamana mangololo.” 34 Ita yakolele mu lusugu luene; akhalele naye gukuatesa fumu wa gu Isalele ha gusala ya gumagana mu phusu-phusu yenji gutuama dia enya Siliya uu nu mu ngueze. Hashiwugile tangua, fumu wafuile.