Mukanda wa Luka
23 Mukut’awo agasue azugile, ayile n’enji gumbo dia Philato. 2 Asendesele gumufunda egi: “Tuasanga muthu yowu mulumbugisa gifutshi gietu. Muene wana tunyisa athu ha gufuta gitadi gudi Sezale, udi nji guditamega egi Klisto, fumu.” 3 Philato wamuhudile egi: “Aye udi Fumu wa Enya Yuda ba?” Yesu wamuvutudile egi: “Aye hakhaye wayizuela.” 4 Gungima Philato wawambelele mafumu a nganga-nzambi nu athu avula egi: “Ngushigo mumona nga gima gimoshi giabola giakalagala muthu yowu.” 5 Uvi ene akolesele mbimbi jiawo egi: “Udi mulumbugisa athu, wana longesa mu Yudea yagasue, sendese gu Galilea uu nu ha fundo edi tudi.” 6 Havuile Philato ngenyi, wahudile ha gujiya gula Yesu wakhalele muenya gu Galilea. 7 Hakotelesele muene egi Yesu wakhalele muenya gu membo anyi akhalele muhinyina Helode, wamutumile gudi muene, handaga mu masugu ene, Helode wakhalele nji gu Yelusalema.
8 Tangua Helode wamonele Yesu, wasuangulugile muavula. Sendese mualeha, wakhalele mukamba gumona Yesu, handaga wavuile ndaga jiavula mukunda nu Yesu; wakhalele gudifelela ha gumona Yesu mukalagala ndaga imoshi ya gushimana. 9 Wamuhudile mihu matangua avula, uvi muene gamuhanelego mvutu. 10 Uvi, mafumu a nganga-nzambi nu alongeshi a mikhuala azugile, asendesele gumufunda nu khabu jiagasue. 11 Gungima, Helode nu masuta enji asendesele gumusegulula. Amusudigile mulele wabonga ha gumulela, gungima wamuvutuile gudi Philato. 12 Mu lusugu luene, Helode nu Philato abuile mafuta, uvi thomo akhalele mbalagaji.
13 Gungima Philato watamegele mafumu a nganga-nzambi nu ahinyinyi nu athu. 14 Waawambelele egi: “Enue muaji nu yala owu ha gumufunda egi udi mulumbugisa athu. Uvi tangua ngamusophesa ha meso enu, ngamonelego nga ndaga imoshi yabola imudi gumufundjila. 15 Yadiago, Helode nji gamonelego nga ndaga imoshi gudi muthu yowu, hene amuvutula gudi esue. Muthu yowu gatshitshilego nga ndaga imoshi yajiya gumubata gu gufua. 16 Ngudi muza gumuhana ndola, gungima ngumubembe.” 17 —— 18 Uvi athu avula azuelele mu dijui diakola egi: “Shiya muthu yowu, uvi tuzolele Barabase!” 19 (Barabase wambiwe mu bologo handaga wakhalele mukatshi dia athu alumbugile mafumu a leta nu washiyile muthu.) 20 Philato waatamegele luko, handaga wakhalele mutshigina gubemba Yesu. 21 Gungima, azuelele mu dijui diakola egi: “Akhokhewe ha mutshi! Akhokhewe ha mutshi!”* 22 Muene waawambelele hugo dia thathu egi: “Mukunda natshi? Ndaga itshi yabola yakalagala muthu yowu? Ame ngushigo mumona nga gima gimoshi giabola gia gumushiyila. Hene, ngudi gumuhana phamba ndola, gungima ngumubembe.” 23 Uvi ene akalugugile mangololo, akhalele mutoga mu dijui diakola egi Yesu ashiyiwe,* mbimbi jiawo jiabalegele ngolo. 24 Hene, Philato wakalegele gifua muakhalele mutoga ene. 25 Wabembele muthu akhalele mutoga ene yago wambiwe mu bologo, handaga washinjigile athu ha gulumbugila mafumu nu washiyile muthu, uvi waahanele Yesu gifua luholo akhalele mutshigina ene.
26 Hakhalele ene muya n’enji, masuta akuatele yala mumoshi, jina dienji Simona, muenya gu dimbo dia Silene, muene wakatugile gu mahia. Amuhanele mutshi wa lamba* ha gubatela Yesu. 27 Athu avula akhalele mulandula Yesu. Mukatshi diawo guakhalele nu akhetu akhalele gudikuata mukondo mudila nu muvua gikenene mukunda nu muene. 28 Yesu wabalumugile gu khanda yakhalele akhetu, wazuelele egi: “Ana akhetu a gu Yelusalema, bembenu gudila mukunda nu ame. Uvi dilenu mukunda nu enue nu an’enu; 29 handaga mu masugu adi muza athu mbaazuela egi: ‘Akhetu a ikunya* nu anyi avalelego ana nu anyi awamueselego ana, akhale nu gusuanguluga!’ 30 Mbaawambela milundu yaleha egi: ‘Tubuilenu!’ Mbaawambela nji milundu yahihia egi: ‘Tutshuigenu!’ 31 Gula ene akalagala ndaga eji gudi mutshi wa gibisu, gudi mutshi wa gimigina mbayikhala gikuatshi?”
32 Ajile nji nu nzangi mbadi ha gujishiya hamoshi nu muene. 33 Ahetele n’enji ha fundo diana tamegewa egi Gibozo-bozo gia Muto; masuta amukhokhele ha mutshi hamoshi nu nzangi jiene, muko gu koko dienji dia madia,* uvi muko gu koko dienji dia mahidi.* 34 Uvi Yesu wakhalele muzuela egi: “Tata, atotesele, handaga ashigo mujiya ndaga adi mukalagala.” Gungima, ene atele mubela* ha gudikhaphela milele yenji ya holu. 35 Athu avula akhalele agumagana ha gutala ndaga yakhalele mukalegewa. Uvi mafumu a athu akhalele gumulela egi: “Muene wahuluishile athu ako, adihuluise hakhenji gula muene udi Klisto watombewe gudi Nzambi.” 36 Masuta nji akhalele gumulela, ajile gudi muene, amuhanele vinyo ilakhua,* 37 amuwambelele egi: “Gula udi Fumu wa Enya Yuda, dihuluise hakhaye.” 38 Asonegele isona holu dienji yakhalele muzuela egi: “Yowu Fumu wa Enya Yuda.”
39 Nzangi imoshi mukatshi dia nzangi jiakhokhewe n’enji ha mutshi yasendesele gumushinga egi: “Gula udi Klisto, dihuluise hakhaye, utuhuluise nji nu esue!” 40 Uvi nzangi iko yasendesele gumubalela egi: “Aye ushigo muvuila Nzambi woma nga hazonda, luholo udi muhanewa ndola ya luholo lumoshi nu muthu yowu ba? 41 Idi yatagana egi tuhanewe ndola eyi mukunda nu ndaga tuakalegele; uvi muthu yowu gakalegelego nga ndaga imoshi yabola.” 42 Gungima wazuelele egi: “Yesu, ngutangize tangua mbawuza mu Ufumu waye.” 43 Yesu wamuvutudile gamba: “Giamatshidia ngudi guguwambela mangino egi, mbawukhala nu ame mu Phaladiso.”
44 Hahetele kumbi dia midi,* phipha yabuile mu gifutshi giagasue uu nu mu kumbi dia thathu* gungima dia midi, 45 handaga tangua diakhalelego muhana luko muanya; rido ya mu tempelo yatawugile ha katshi na katshi. 46 Yesu wakalugile mu dijui diakola egi: “Tata, ngabemba nyuma yami ha mago aye.” Gungima dia guzuela ngenyi, wafuile. 47 Hamonele fumu wa masuta ndaga yakalegewe, watumbuishile Nzambi, wazuelele egi: “Giamatshidia, yala yowu wakhalele muthu wabonga.” 48 Athu avula akhalele hene ha gutala ndaga yakhalele mukalegewa. Hamonele ene ndaga eji, avutugile gumbo diawo agudikuata mukondo. 49 Athu agasue akhalele mujiya Yesu akhalele agumagana ndambo gualeha. Akhetu anyi akhalele gumulandula sendese gu Galilea akhalele nji hene. Ene nji amonele ndaga eji jiagasue.
50 Guakhalele nu muthu mumoshi, jina dienji Yozefe, muene wakhalele mukatshi dia enya Tribinale Yakoma ya Enya Yuda; wakhalele nji muthu wabonga nu watagana gu meso a Nzambi. 51 (Muthu yowu ganginyilego mu giphungi giawo giabola gia gushiya Yesu.) Muene wakhalele muenya gu dimbo dia Alimataya gu Yudea, wakhalele munengena Ufumu wa Nzambi. 52 Wayile mumona Philato ha gumutoga kimbi gia Yesu. 53 Watuluile kimbi gia Yesu, wagilangele mulele wa linene wabonga, wagibandesele mu malumba* asongewe mu seso, anyi akhalele khenji afundjiwago nga muthu mumoshi. 54 Yakhalele mu Lusugu lua Gudilondega, handaga Lusugu lua Guhuluguga luakhalele mutshigina gusendesa. 55 Akhetu anyi akhalele mulandula Yesu sendese gu Galilea ajile nji, akhalele mutala malumba,* amonele luholo abandesele kimbi gia Yesu. 56 Gungima, ayile ha gulondega ima ya vumba diabonga nu maji a mananashi. Uvi, akhalele naye guhuluguga mu Lusugu lua Guhuluguga, gifua luholo mukhuala wakhalele mutoga.