Yoshua
24 Yoshua wabungishile iphuta yagasue ya Isalele gu Shekeme, watamegele nji akulu a gu Isalele nu mafumu nu manzuji nu atuameji; amaganele gutuama dia Nzambi wa giamatshidia. 2 Yoshua wawambelele athu agasue egi: “Yehowa Nzambi wa Isalele wazuela egi: ‘Akhakh’enu ajingile ivo yavula ha sambua diko dia muta,* (Tera sh’a Abalahama nu Naore) akhalele mukalegela nzambi jiko.
3 “‘Gungima ngazudile khakh’enu Abalahama ha sambua diko dia muta,* ngamuwendesele mu gifutshi giagasue gia Kanana, ngavudishile ajigulu* enji. Ngamuhanele Izake; 4 gungima ngahanele Izake Yakoba nu Ezau. Ngahanele Ezau Mulundu wa Seyile gifua khapho dienji; uvi Yakoba nu an’enji abulumugile gu Ejipitu. 5 Gungima ngatumine Moize nu Alona, ngabatele malamba gu Ejipitu, ngamizolele guene. 6 Tangua ngazolele ash’enu gu Ejipitu, ene ahetele gu kianga. Enya Ejipitu a alanduile nu phusu-phusu jia ita nu masuta akhalele muwendesa tubalu uu nu gu Kianga Giabenga. 7 Ash’enu asendesele gungudidila ame Yehowa, hene ngahagele phipha hakatshi dienu nu enya Ejipitu, ngavutudile meya a kianga, atshuigile enya Ejipitu; enue hakhenu muamonele ndaga ngakalegele gu Ejipitu. Gungima muatshitshile ivo yavula* mu mavu a luselenga.
8 “‘Ngamibatele mu mavu a enya Amole akhalele ha sambua diko* dia Yordane, ene amiluishile. Uvi ngaahanele ha mago enu hagula muajiya guzula mavu awo, ngaamanesele gutuama dienu. 9 Gungima Balaka mun’a Siphola, fumu wa gu Moaba, waluishile enya Isalele. Watamegele Balama mun’a Beole ha gumita mukumbu. 10 Uvi ngategelelego Balama. Hene wamishimbigile mbala jiavula, ngamihuluishile ha mago enji.
11 “‘Gungima muazawugile Yordane, muahetele gu Yeliko. Mafumu* a gu Yeliko nu enya Amole nu enya Phelese nu enya Kanana nu enya Hete nu enya Gilegase nu enya Hivi nu enya Yebuse amiluishile, uvi ngaahanele ha mago enu. 12 Ngatshitshile egi alebe muila* gutuama dienu, hene alengele gutuama dienu gifua mafumu mbadi a enya Amole. Alengelego mukunda nu phogo jienu jia khusa, nga mukunda nu mata enu a manana. 13 Ngamihanele gifutshi ginyi muamonelego lamba ha guheta nu membo muatungilego, muakhalele muene. Muadile mabundu a mitshi ya vinyo nu a mitshi ya olive inyi muakunyilego.’
14 “Hene, vuilenu Yehowa woma, mukalegelenu nu mutshima waphelegeta nu giamatshidia. Katulenu nzambi jinyi akhakh’enu akombelele ha sambua diko dia muta* nu gu Ejipitu, kombelelenu Yehowa. 15 Uvi gula muamona egi idi yabola ha gukombelela Yehowa, mangino ditombelenu nzambi mudi naye gukombelela, nzambi jinyi akhakh’enu akombelele ha sambua diko dia muta,* nga nzambi jia enya Amole mu mavu mudi mujinga. Uvi ame nu enya fami yami mbatukombelela getu Yehowa.”
16 Athu amuvutudile egi: “Matangi ajiyilego gutujila ha gubemba Yehowa ha guya mukombelela nzambi jiko. 17 Yehowa Nzambi wetu muene watuzolele nu ash’etu gu Ejipitu mu inzo ya uhiga, wakalegele ndaga eji jia gushimana ha meso etu, watubambele mu njila yagasue tuakhalele muwenda nu mu mavu a athu agasue tuabalegele. 18 Yehowa wakayele athu agasue nu ene enya Amole akhalele thomo mu mavu awa. Hene, esue nji mbatukombelela Yehowa handaga muene udi Nzambi wetu.”
19 Gungima Yoshua wawambelele athu egi: “Enue muajiyilego gukombelela Yehowa, handaga muene udi Nzambi wa gijila; udi Nzambi wana tshigina egi athu amukombelele phamba muene. Gula muamulumbugila nu muatshita gubola, muene mbagashigo gumitotesela. 20 Gula muabemba Yehowa, muakombelela nzambi jia ngenji, muene nji mbawumituna nu mbawumishiya ikhale wakalegele ndaga jiabonga mukunda nu enue.”
21 Uvi athu avutuile Yoshua egi: “Ndo, esue mbatukombelela Yehowa!” 22 Yoshua wawambelele athu egi: “Enue hakhenu mudi matemue a ndaga muazuela. Muatomba enue hakhenu ha gukombelela Yehowa.” Ene amuvutudile egi: “Tudi matemue.”
23 “Gula idi ngenyi, katulenu nzambi jia ngenji jidi mukatshi dienu, khalenu ya gujinginyina gudi Yehowa Nzambi wa Isalele nu mutshima wenu wagasue.” 24 Athu awambelele Yoshua egi: “Mbatukombelela Yehowa Nzambi wetu nu mbatutumagela mbimbi yenji!”
25 Hene, Yoshua wakotele gikotelo nu athu mu lusugu luene, waahanele mikhuala gu Shekeme ha gulandula. 26 Gungima Yoshua wasonegele mbimbi jiene mu mukanda wa Mikhuala wa Nzambi, wazudile seso diakoma wadihagele ha mushin’a mutshi wakoma udi hehi nu fundo dia gijila dia Yehowa.
27 Yoshua wawambelele luko athu agasue egi: “Talenu! Seso edi mbadikhala temue wetu handaga diavui ndaga jiagasue Yehowa watuwambela. Mbadikhala temue mukunda nu enue hagula mutunyigo Nzambi wenu.” 28 Gungima Yoshua wawambelele athu ha guya, muthu nu muthu wavutugile mu mavu amuhanewe gifua khapho.
29 Gungima dia ndaga eji, Yoshua mun’a Nune muenya mudimo wa Yehowa wafuile nu ivo 110. 30 Amufundjile gu Timenata-Sela mu mavu enji amuhanewe, gu khanda ya milundu ya Efrayime, gu khanda ya nord ya Mulundu wa Gashi. 31 Enya Isalele akhalele mukombelela Yehowa masugu agasue akhalele Yoshua nu monyo nu mu masugu agasue a akulu anyi asalele nu monyo gungima dia gufua guenji, anyi ajiyile ndaga jiagasue Yehowa wakalegele mukunda nu enya Isalele.
32 Afundjile ifuwa ya Yozefe inyi enya Isalele azudile tangua azogele gu Ejipitu gu Shekeme, mu gitshinyi gia mavu giasumbile Yakoba gudi ana a Hamole sh’a Shekeme. Waasumbile nu makuta 100 a utadi; mavu ene abuile khapho dia ana a Yozefe.
33 Eleazale mun’a Alona wafuile nji. Amufundjile gu gamulundu ga mun’enji Fineyase ganyi amuhanele gu khanda ya milundu ya Efrayime.