Mukanda wa Mbadi Gudi Timote
3 Uvi jiya ndaga eji, mu masugu a gisugishilo, matangua a lamba nu ndaga jiakola mbajikhala guene. 2 Handaga athu mbaakhala gudizumba ene hakhawo, mbaakhala muzumba makuta, mbaakhala gudisunzula, mbaakhala enya lulendo, athu ana shinga Nzambi, mbaakhadigo mutumagela mvuaji jiawo, mbaakhadigo muhana mersi, mbaakhadigo a gujinginyina gudi athu ako,* 3 ene mbaakhadigo muzumba athu ako, mbaakhadigo gudivua nu athu ako, mbaakhala mumbila athu ako mambo, mbaakhadigo gudikanda, mbaakhala enya khuta, mbaakhadigo muzumba ndaga jiabonga, 4 mbaakhala mbalagaji jia mafuta awo, enya muto wakola, enya lulendo luavula, mbaakhala muzumba phamba ima yana guasuanguluisa uvi Nzambi ndo. 5 Mbaamonesa egi ana kombelela Nzambi, uvi makalegelo awo mbaashigo mumonesa egi ana gumukombelela; tuna athu a luholo elu. 6 Ako mukatshi diawo adi mungina mu gisuegi mu jinzo nu adi mukuata akhetu aleba anyi adi nu masumu, adi mutuamezewa gu nzala jia maluholo avula, 7 ana longuga tangua diagasue, uvi khenji ahetelego nga hazonda ujiyi wa diago wa giamatshidia.
8 Gifua luholo Yanese nu Yambelese akhalele mutuna ndaga jiakhalele muzuela Moize, athu ene nji ana tuna giamatshidia. Matangi’awo abolele gale diago. Nzambi gana guatshigina ndo luko handaga abolesele gale gutshigina guawo. 9 Uvi ene mbaashigo muya gutuama handaga athu agasue mbaamona guheya guawo haphelo, gifua muamonegele guheya gua Yanese nu Yambelese. 10 Uvi aye walandudile muabonga malongo ami nu luholo ngana gudituameza nu felela diami nu gutshigina guami nu guhuiminyina guami nu guzumba guami nu gukolesela guami 11 nu luholo ngasagesewe nu malamba ngamonele gu Antiokia nu gu Ikoniome nu gu Liseta. Ngakolesele mu malamba awa, Fumu wanguhuluishile mu malamba ene agasue. 12 Athu agasue adi mutshigina gukhala ya gujinginyina gudi Nzambi mu gudivua nu Klisto Yesu mbaamonesewa nji malamba. 13 Athu abola nu enya mambo mbaakalagala ndaga jiabola gubalega, mbaahuiga athu, ene nji mbaahuigiwa.
14 Uvi aye landula ndaga walongesewe nu jinyi agutshiginyishile. Udi mujiya akhuatshi agulongesele najio. 15 Sendese ulenge waye wana jiya mbimbi* ya Nzambi inyi yajiya gugubuisa muthu watema hagula wajiya guhuluga, handaga wana sha gutshigina gudi Klisto Yesu. 16 Ndaga jiagasue jidi mu Mukanda wa Nzambi jiasonegewe mu ukuateshi wa nyuma ya Nzambi nu jidi nu ndando ha gulongesa, ha gubalela, ha guvutula ndaga mu njila, ha guhana ndola mu gudivua nu mikhuala ya Nzambi 17 hagula muthu wa Nzambi akhale diago watagana nu akhale hehi ha gukalagala mudimo wagasue wabonga.