Mukanda wa Thomo Gudi Timote

2 Thomo ngudi mutoga egi bubilenu Nzambi, kombelelenu, kalagalenu isambu mukunda nu athu ako, muhanenu mersi. Kalagalenu ndaga eji jiagasue mukunda nu athu a maluholo agasue 2 nu mukunda nu mafumu nu ahinyinyi agasue hagula tukhale tedie nu tukhale mu guhuima, tumonese egi tudi ya gujinginyina gudi Nzambi nu tukalagale ndaga jiagasue mu luholo luabonga. 3 Ndaga eyi idi yabonga nu idi yatagana gu meso a Nzambi, Muhuluishi wetu, 4 udi mutshigina egi athu a maluholo agasue ahuluge nu ahete ujiyi wa diago wa giamatshidia. 5 Handaga Nzambi udi mumoshi, mutageneshi nji udi mumoshi hakatshi dia Nzambi nu athu. Muthu muene udi Klisto Yesu 6 yago wadihanele gifua mulambu watagana mukunda nu athu agasue.* Athu adi naye guzuelela ndaga eyi mu tangua diatagana. 7 Mukunda nu ndaga yene, angutombele ha gukhala mulongeshi nu ha gukhala mupostolo hagula ngulongese enya ifutshi iko amonese gutshigina nu ajiye giamatshidia. Ngudi muzuela giamatshidia, ngushigo mumba mambo.

8 Ngudi mutshigina egi mala akombelele mu mafundo agasue. Tangua adi muthuphula mago awo mu isambu, ayikalagale nu mutshima waphelegeta. Akhadigo nu khabu, akhadigo nji nu giphapha. 9 Luholo lumoshi nji, akhetu adi naye gusudiga mu luholo luabonga* nu luatagana, adi naye gukhala nu matangi abonga.* Ashigo naye gudisagesa muavula mu ndaga yatadila luholo lua gulondega sanga, gudisembega nu wolo nu misanga nga nu milele ya ndando yakola. 10 Uvi adilondege mu makalegelo abonga ha gumonesa egi adi agujinginyina gudi Nzambi.

11 Tangua akhetu adi mulonguga, akhale tedie nu atumagele mala. 12 Ngushigo muhana mukhetu njila ha gulongesa nga ha gukhala fumu ya yala, uvi udi naye guhena tedie.* 13 Handaga Adama wafugiwe gutuama egi Eva afugiwe. 14 Adama gahuigiwego, uvi mukhetu wahuigiwe diago, nu washiyile mukhuala wa Nzambi. 15 Akhetu mbaahuluishiwa mukunda nu gubuta guawo gula adi nu gutshigina nu guzumba nu gula adi aphelegeta gu meso a Nzambi nu adi nu matangi abonga.*