Yoshua
1 Gungima dia gufua gua Moize muenya mudimo wa Yehowa, Yehowa wawambelele Yoshua* mun’a Nune, muenya mudimo wa Moize egi: 2 “Moize muenya mudimo wami wafui. Henyaha nda uzawuge Muta wa Yordane nu athu awa agasue, enya Isalele, ndenu mu gifutshi ngudi guahana. 3 Mbangumihana fundo diagasue mbamumba kulu gifua luholo ngalayele Moize. 4 Mididilo ya mavu enu mbayisendesa mu mavu a luselenga uu nu gu Libane uu nu gu muta wakoma, Efrata, mu mavu agasue a enya Hete, mbayiya uu nu gu Kianga Giakoma* gu khanda ya mayilo a kumbi. 5 Gushigo nga muthu mbawugubinga masugu agasue a monyo waye. Mbangukhala naye gifua luholo ngakhalele nu Moize. Mbangushigo gugutuna, mbangushigo nji gugubemba. 6 Khala nu gikhesa nu ngolo, handaga aye mbawukuatesa athu awa ha guzula gifutshi ngadilogele gudi akhakh’awo ha guahana.
7 “Khala nu gikhesa nu ngolo jiavula, tumagela muabonga Mikhuala yagasue yaguhanele muenya mudimo wami Moize. Uyibembigo ha guya gu koko dia madia nga dia mahidi, hagula ukalagale ndaga nu gutema guagasue fundo diagasue mbawuya. 8 Mbimbi jidi mu mukanda owu wa Mukhuala jishigo naye gukatuga mu kano diaye; udi naye gujitanga mu dijui dialeba* phipha nu muanya, hagula utumagele muabonga ndaga jiagasue jidi jia gusonega mu mukanda wene; ngenyi mbawubinga mu ndaga udi mukalagala nu mbawukalagala ndaga nu gutema. 9 Ngaguwambela egi khala nu gikhesa nu ngolo. Udigitago, uvuigo woma handaga ame Yehowa Nzambi waye ngudi naye fundo diagasue udi muya.”
10 Gungima Yoshua wawambelele atuameji a athu egi: 11 “Balegenu mukatshi dia phundo, wambelenu athu egi: ‘Londenu ima ya gudia handaga guasala masugu thathu muzawuge Muta wa Yordane, ha guya muzula gifutshi gidi gumihana Yehowa Nzambi wenu.’”
12 Yoshua wawambelele enya giphuta gia Ribene nu gia Gade nu gitshinyi gia giphuta gia Manase egi: 13 “Wungulugenu ndaga Moize muenya mudimo wa Yehowa wamiwambelele egi: ‘Yehowa Nzambi wenu udi gumihana guhuima, wamihanyi nji gifutshi egi. 14 Akaji’enu nu an’enu nu shitu jienu mbaakhala mu mavu amihanele Moize ha sambua edi* dia Yordane, uvi enue masuta agasue a ngolo mbamuzawuga gutuama dia aphangi’enu ya gudilonda ha guya mulua ita. Mudi naye guakuatesa 15 uu nu tangua Yehowa mbawuhana aphangi’enu guhuima, gifua luholo luamihanele muene guhuima. Ene mbaazula nji mavu adi guahana Yehowa Nzambi wenu. Gungima mbamuvutuga ha gukhala mu mavu amihanewe, mavu Moize muenya mudimo wa Yehowa wamihanele gu khanda ya mazogelo a kumbi a Yordane.’”
16 Avutudile Yoshua egi: “Mbatutshita ndaga jiagasue watuwambela, mbatuya nji fundo diagasue mbawututuma. 17 Mbatugutegelela gifua luholo tuategelele ndaga jiagasue jiatuwambelele Moize. Yehowa Nzambi waye akhale nu aye gifua luholo luakhalele muene nu Moize. 18 Muthu wagasue mbawutuna mbimbi jiaye nu mbawutuna gutumagela ndaga jiagasue mbawumuwambela mbawushiyiwa. Ayi, khala nu gikhesa nu ngolo.”