Yoshua
3 Gungima Yoshua wazugile nu gimenegena giagasue. Muene nu enya Isalele* agasue akatugile gu Shitime, ayile gu Yordane. Abandele guene gutuama dia guzawuga muta.
2 Gungima dia masugu thathu, atuameji a athu abalegele mu phundo yagasue. 3 Awambelele athu egi: “Gula muamona enya Levi anyi adi nganga-nzambi mubata mushete wa gikotelo wa Yehowa Nzambi wenu, mudi naye gukatuga mbala imoshi ha fundo mudi, muwulandula. 4 Uvi mushigo naye gusuena hehi nu mushete wene, mudi naye gukhala gualeha nawo ha mutango wa bakude 2 000;* hagula muajiya gujiya njila mudi naye guya, handaga khenji muayilego mu njila yene.”
5 Yoshua wawambelele athu egi: “Diphelegetesenu handaga hamene Yehowa mbawukalagala ndaga jia gushimana mukatshi dienu.”
6 Gungima Yoshua wawambelele nganga-nzambi egi: “Zulenu mushete wa gikotelo, balegenu gutuama dia athu.” Hene, azudile mushete wa gikotelo, abalegele gutuama dia athu.
7 Gungima Yehowa wawambelele Yoshua egi: “Mangino ngudi musendesa gugukanduisa gu meso a enya Isalele agasue, hagula ajiye egi ngudi naye gifua luholo ngakhalele nu Moize. 8 Udi naye guwambela nganga-nzambi jidi mubata mushete wa gikotelo egi: ‘Gula muaheta gu khulo ya Muta wa Yordane, mudi naye gungina mukatshi dia muta, mumagana.’”
9 Yoshua wawambelele enya Isalele egi: “Izenu haha mutegelele ndaga jiazuedi Yehowa Nzambi wenu.” 10 Gungima wazuelele egi: “Ndaga eji mbajimonesa egi Nzambi wa monyo udi mukatshi dienu nu mbawukaya diago enya Kanana, enya Hete nu enya Hivi, enya Phelese nu enya Gilegase, enya Amole nu enya Yebuse gutuama dienu. 11 Talenu! Mushete wa gikotelo wa Fumu wa ha mavu agasue uza mungina mu Muta wa Yordane gutuama dienu. 12 Henyaha, tombenu mala 12 mu iphuta ya Isalele; mu giphuta giagasue, zulenu yala mumoshi. 13 Tangua nganga-nzambi jidi mubata Mushete wa gikotelo wa Yehowa Fumu wa ha mavu agasue jiza munginyisa ikanzo yawo mu Muta wa Yordane, meya a Muta wa Yordane adi mukatuga gu thunda mbaabemba gubulumuga, mbaamagana gifua gibayi.”
14 Hakatugile athu gu tenta jiawo, gutuama egi azawuge Yordane, nganga-nzambi jiakhalele mubata mushete wa gikotelo jiabalegele gutuama diawo. 15 Tangua nganga-nzambi jiakhalele mubata Mushete jiahetele gu Yordane, jianginyishile ikanzo yawo mu muta (Muta wa Yordane wana zala mu sungi yagasue ya gukatula mbuto), 16 meya akhalele mukatuga gu thunda ha gubulumuga amaganele. Amaganele gifua gibayi gualeha nu Adama, dimbo didi hehi nu Saletana; uvi meya akhalele mubulumuga gu khanda ya Kianga gia Araba, Kianga gia Mungua,* abulumugile uu nu tangua amiginyile. Meya akhalelego luko mubulumuga, athu azawugile ha sambua dia Yeliko. 17 Nganga-nzambi jiakhalele mubata mushete wa gikotelo wa Yehowa jiasalele ya gumagana mu mavu a gimigina, mukatshi dia Muta wa Yordane uu nu tangua enya Isalele agasue azawugile Muta wa Yordane mu mavu a gimigina.