Mukanda wa Thomo wa Mafumu

16 Eji ndaga Yehowa wawambelele Yehu mun’a Hanani mukunda nu Basha. Wazuelele egi: 2 “Ngaguzudile mu fuphi, ngagubuishile fumu wa athu ami enya Isalele, uvi aye walanduile makalegelo a Yeloboama, watumile athu ami enya Isalele ha gutshita gubola hagula anguhane khabu mukunda nu gubola guawo. 3 Henyaha ngudi mukomba diago Basha nu inzo yenji; mbangubuisa inzo yenji gifua inzo ya Yeloboama mun’a Nebate. 4 Muthu wagasue wa mu fami ya Basha mbawufua mu dimbo, jimbua mbajimudia; uvi muthu wagasue wa mu fami yenji mbawufila mu temu, tunjila tua gosa mbatumudia.”

5 Ndaga jiko jiakalegele Basha, nu ima yatshitshile muene nu ngolo jienji, jidi jia gusonega mu mukanda wa mene jia mafumu a gu Isalele. 6 Gungima Basha wafuile gifua muafuile akhakh’enji, amufundjile gu Tilesa. Mun’enji Ela wabuile fumu ha fundo dienji. 7 Yehowa wazuelele ndaga jiene mukunda nu Basha nu fami yenji mu njila ya profete Yehu mun’a Hanani, handaga Basha wahanele Yehowa khabu mukunda nu ndaga jiagasue jiabola jiakalegele muene gu meso enji nu handaga washiyile Nadabe. Fami yenji yabuile gifua fami ya Yeloboama.

8 Mu givo gia 26 gia uhinyinyi wa Fumu Asa wa gu Yuda, Ela mun’a Basha wabuile fumu wa Isalele gu Tilesa. Wahinyile ivo mbadi. 9 Muenya mudimo wenji Zimiri, fumi’a ndambo ya masuta akhalele muwendesa phusu-phusu jia ita, wamuyidile giphungi tangua matombe amukuatele gu Tilesa mu inzo ya Alesa, munu wakhalele mutuameza inzo ya fumu gu Tilesa. 10 Zimiri wanginyile, wamushiyile. Yakhalele mu givo gia 27 gia uhinyinyi wa Fumu Asa wa gu Yuda. Zimiri wabuile fumu ha fundo dienji. 11 Habuile muene fumu nu hakhalele muene ha nguasa yenji ya ufumu, washiyile athu agasue a mu fami ya Basha. Gabembelego nga yala* mumoshi, ikhale enya fami yenji* nga mafuta enji. 12 Ngenyi Zimiri washiyile athu agasue a mu fami ya Basha, gifua luholo Yehowa wazuelele mukunda nu Basha mu njila ya profete Yehu. 13 Ndaga yene yakalegewe mukunda nu gubola guagasue guakalegele Basha nu mun’enji Ela nu gubola guatumine ene enya Isalele ha gutshita tangua diahanele ene Yehowa Nzambi wa Isalele khabu nu isongo yawo ya gituhu. 14 Ndaga jiko jiakalegele Ela nu ima yagasue yatshitshile muene, idi ya gusonega mu mukanda wa mene jia mafumu a gu Isalele.

15 Mu givo gia 27 gia uhinyinyi wa Fumu Asa wa gu Yuda, Zimiri wabuile fumu. Wahinyile masugu 7 gu Tilesa. Mu tangua diene, masuta a Isalele akhalele mu phundo ha guluisa dimbo dia Gibetona dia enya Filistiya. 16 Gungima masuta akhalele mu phundo avuile egi: “Zimiri wayila fumu giphungi, wamushiyi.” Hene mu lusugu luene, masuta agasue* azanguile Omeli, munu wakhalele fumu wa masuta, amubuishile fumu wa Isalele mu phundo. 17 Omeli nu masuta agasue akhalele n’enji akatugile gu Gibetona, ayile mujieta dimbo dia Tilesa. 18 Tangua Zimiri wamonele egi dimbo diatambudiwa, wayile ha fundo dia gudisuegela diakhalele mu inzo ya fumu, wambile inzo tshuya, wafuile. 19 Ndaga eji jiakalegewe mukunda nu gubola guakalegele muene gu meso a Yehowa, luholo lualanduile muene makalegelo a Yeloboama nu mukunda nu gubola guatumine muene enya Isalele ha gukalagala. 20 Ndaga jiko jiakalegele Zimiri nu luholo luayidile muene fumu giphungi, idi ya gusonega mu mukanda wa mene jia mafumu a gu Isalele.

21 Mu tangua diene, athu a gu Isalele adikhaphele mu mahunji mbadi. Athu ako akhalele gu khanda ya Tibeni mun’a Ginata, akhalele mutshigina gumubuisa fumu; ako akhalele gu khanda ya Omeli. 22 Uvi athu akhalele gu khanda ya Omeli abingile athu akhalele gu khanda ya Tibeni mun’a Ginata. Hene Tibeni wafuile, Omeli wabuile fumu.

23 Mu givo gia 31 gia uhinyinyi wa Fumu Asa wa gu Yuda, Omeli wabuile fumu wa Isalele, wahinyile ivo 12. Mu ivo 6 ya thomo, wahinyine gu Tilesa. 24 Gungima wasumbile mulundu wa Samaliya gudi Shemele mu ndando ya batalanta* mbadi a utadi wa siliva, watungile dimbo gu mulundu wene. Wahanele dimbo diene jina egi Samaliya,* handaga jina dia fumi’a mulundu wene diakhalele Shemele. 25 Omeli walanduile gukalagala ndaga jiabola gu meso a Yehowa, watshitshile gubola guavula gubalega mafumu agasue ahinyine gutuama dienji. 26 Walanduile makalegelo agasue a Yeloboama mun’a Nebate nu gubola guatumine muene enya Isalele ha gukalagala tangua ahanele Yehowa Nzambi wa Isalele khabu nu isongo yawo ya gituhu. 27 Ndaga jiko jiakalegele Omeli nu ima yatshitshile muene nu ita yabingile muene, idi ya gusonega mu mukanda wa mene jia mafumu a gu Isalele. 28 Gungima Omeli wafuile gifua muafuile akhakh’enji, amufundjile gu Samaliya. Mun’enji Ahaba wabuile fumu ha fundo dienji.

29 Ahaba mun’a Omeli wabuile fumu gu Isalele mu givo gia 38 gia uhinyinyi wa Fumu Asa wa gu Yuda. Ahaba wahinyile Isalele gu Samaliya ivo 22. 30 Ahaba mun’a Omeli wakalegele ndaga jiabola gu meso a Yehowa gubalega mafumu agasue ahinyine gutuama dienji. 31 Ahaba wakalegele ndaga jiabola gifua jinyi jiakalegele Yeloboama mun’a Nebate. Watshitshile nji ndaga jiko jiabola: wazudile Yezabele mun’a fumu Etebala wa gu Sidona mu ulo; wasendesele nji gukombelela Bale. 32 Watungile giwotshielo mukunda nu Bale mu inzo* ya Bale yatungile muene gu Samaliya. 33 Ahaba walondele nji mutshi wa gijila.* Wakalegele ndaga jiavula ha guhana Yehowa Nzambi wa Isalele khabu gubalega mafumu agasue a Isalele ahinyine gutuama dienji.

34 Mu masugu a uhinyinyi wa Ahaba, Hiele muenya gu Betele watungile luko dimbo dia Yeliko. Hatungile muene fondasio jia dimbo, mun’enji wa somi Abirame wafuile; hahagele muene mifulo ya dimbo, Seguba mun’enji wa gasala-songi wafuile, gifua luholo Yehowa wazuelele mu njila ya Yoshua mun’a Nune.