Mukanda wa Mbadi wa Gudilanduluila

20 Gungima enya gu Moaba nu enya Amona adibungishile nu enya Amonime* ako, ajile ha guluisa Yosafata. 2 Athu awambelele Yosafata egi: “Thundu yakoma ya athu idi muza ha guguluisa, akatuga gu khanda ya kianga* nu gu Edome; henyaha adi gale gu Hasasona-Tamare, yakotelesa egi Ene-Gedi.” 3 Yosafata wavuile woma, watshitshile yagasue ha gukamba Yehowa. Hene wawambelele enya Yuda agasue ha gutuna gudia. 4 Gungima enya Yuda adibungishile ha gutoga ukuateshi gudi Yehowa; akatugile mu membo agasue a gu Yuda ha guza mukamba utuameji wa Yehowa.

5 Yosafata wamaganele gutuama dia hungu dia Yuda nu dia Yelusalema gu inzo ya Yehowa gutuama dia gibanzala gihe-gihe. 6 Wazuelele egi :

“Oo Yehowa Nzambi wa akhakh’etu, ishigo aye udi Nzambi mu dilu ba? Ishigo aye wana hinyina ma ufumu agasue a mu ifutshi ba? Koko diaye diana khala nu ngolo, gushigo nga nu muthu wajiya gumagana gutuama diaye. 7 Oo Nzambi wetu, ishigo aye wakayele enya gifutshi gigi gutuama dia athu aye enya Isalele ba? Ishigo nji aye wahanele gifutshi egi gudi ajigulu* a futa diaye Abalahama hagula gibue giawo mayilago ba? 8 Ene ajile mukhala mu gifutshi giene, atungile nji fundo dia gijila mu gifutshi giene mukunda nu jina diaye; azuelele egi: 9 ‘Gula lamba diatubuila, ikhale phogo ya khusa, nga usopheshi, nga misongo ya gisambugila, nga nzala yakola, esue mbatuza mumagana gutuama dia inzo eyi nu gutuama diaye (handaga jina diaye didi mu inzo eyi); mu tangua diene dia lamba, mbatugutamega ha gutukuatesa. Mbatugutoga, aye mbawutuvuila nu mbawutuhuluisa.’ 10 Henyaha enya Amona nu enya Moaba nu athu a gu khanda ya milundu ya Seyile adi muza. Aye watunyishile enya Isalele ha gualuisa tangua azogele mu gifutshi gia Ejipitu. Akondomogele, ayidile mu njila iko, a ashiyilego. 11 Uvi henyaha tala! Ene adi muza ha gutukaya mu mavu etu anyi watuhanele gifua khapho. 12 Oo Nzambi wetu, aye wajiyilego guahana ndola ba? Handaga esue tushigo nu ngolo gutuama dia thundu eyi yakoma ya athu adi muza gutuluisa, tushigo nji mujiya itshi tuajiya gutshita. Uvi meso etu adi mutala gudi aye.”

13 Mu tangua diene, enya Yuda agasue akhalele agumagana gutuama dia Yehowa nu akaji’awo nu an’awo,* nu ana azonda.

14 Gungima, nyuma ya Yehowa yajile gudi Yahaziele mun’a Zakaliya, mujigulu wa Benaya munu wakhalele mukatshi dia hungu. Benaya wakhalele mun’a Yeyele, mun’a Matania muenya Levi, wakhalele mujigulu wa Asafe. 15 Wazuelele egi: “Enya Yuda agasue nu enue enya gu Yelusalema nu Fumu Yosafata, tegelelenu! Yehowa udi gumiwambela egi: ‘Muvuigo woma, mubuigo tunga-tunga mukunda nu thundu eyi yakoma ya athu, handaga ita ishigo yenu uvi idi ya Nzambi. 16 Hamene mudi naye gubulumuga ha guya guatagana. Ene mbaakandugila mu njila ya Sisi, mbamuasanga gu songi ya baba* hehi nu mavu a luselenga a Yeluele. 17 Mbamushigo mulua ita eyi. Khalenu ha fundo dienu, khalenu ya gumagana, talenu luholo Yehowa mbawumihuluisa. Oo enya Yuda nu enya gu Yelusalema, muvuigo woma, mubuigo tunga-tunga. Hamene, zogenu muye mutagane nawo, Yehowa mbawukhala n’enu.’”

18 Hene Yosafata washiwugile mbala imoshi phala mu mavu; enya Yuda agasue nu enya gu Yelusalema afugamele nji gutuama dia Yehowa ha gukombelela Yehowa. 19 Gungima enya Levi anyi akhalele ajigulu a Kehate nu a Kora azugile ha gutumbuisa Yehowa Nzambi wa Isalele mu dijui diakola.

20 Mu lusugu lualanduile, azugile nu gimenegena giagasue, ayile mu mavu a luselenga a Tekoa. Hakhalele ene muya, Yosafata wamaganele, wazuelele egi: “Oo enya Yuda nu enue enya gu Yelusalema, ngutegelelenu! Khalenu nu gutshigina gudi Yehowa Nzambi wenu hagula muajiya gukhala nu gikhesa.* Khalenu nji nu gutshigina gudi baprofete enji, ngenyi mbamubinga.”

21 Gungima dia guta maga nu athu, watombele athu anyi akhalele yagusudiga milele ya gijila ha guya gutuama dia masuta, ha guyimbila Yehowa nu gumutumbuisa egi: “Hanenu Yehowa mersi, handaga guzumba guenji gua giamatshidia guana khala mayilago.”

22 Tangua asendesele guyimba nu gusuanguluga guagasue ha gutumbuisa Nzambi, Yehowa watshitshile egi enya Amona nu enya Moaba nu athu a gu khanda ya milundu ya Seyile anyi ajile muluisa Yuda, adiluise, hene athu ene adishiyile. 23 Enya Amona nu enya Moaba abalumugile athu a gu khanda ya milundu ya Seyile asendesele guashiya, a amanesele. Tangua amanesele gushiya athu a gu Seyile, ene nji adishiyile.

24 Uvi tangua enya Yuda ahetele gu inzo yaleha ya mutaledi ya mu mavu a luselenga, atalele gu khanda yakhalele thundu yene ya athu, amonele imbi yawo ya gubanda mu mavu; nga muthu gasalelego nu monyo. 25 Hene Yosafata nu athu enji ajile, azudile ima yawo; asangele ima yavula mukatshi dia athu ene nu milele nu ima iko ya ndando inyi azudile, akhalelego nu luholo lua gubata nga gima giko. Atshitshile masugu thathu ha gututa ima yene handaga yakhalele yavula. 26 Mu lusugu lua nguana, adibungishile mu Baba dia Belaka, atumbuishile Yehowa guene. Gishina giene ahanele fundo diene jina egi baba dia Belaka;* diana tamegewa ngenyi uu nu mangino.

27 Gungima mala agasue a gu Yuda nu a gu Yelusalema nu fumu wawo Yosafata, avutugile gu Yelusalema nu gusuanguluga handaga Yehowa waakuatesele ha gubinga mbalagaji jiawo. 28 Anginyile gu Yelusalema nu gushiga phungi nu ima ya gushigila miziki yana khala nu shinga nu itare,* gungima ayile gu inzo ya Yehowa. 29 Ma ufumu agasue a mu ifutshi iko avuidile Nzambi woma tangua avuile egi Yehowa waluishi mbalagaji jia enya Isalele. 30 Gishina giene ufumu wa Yosafata wakhalele mu guhuima, Nzambi walanduile gumuhana guhuima gu khanda jiagasue.

31 Yosafata walanduile guhinyina gu Yuda. Wakhalele nu ivo 35 tangua diabuile muene fumu, wahinyine ivo 25 gu Yelusalema. Jina dia gin’enji diakhalele Azuba, mun’a Shili. 32 Yosafata walanduile makalegelo a sh’enji Asa. Walanduile diago gifezegeselo gienji, wakalegele ndaga jiabonga gu meso a Yehowa. 33 Uvi mafundo a gukombelela* akatudiwego, athu azudilego nji desizio mu mitshima yawo ha gukombelela Nzambi wa akhakh’awo.

34 Ndaga jiko jiakalegele Yosafata sendese gu gisendeselo uu nu gu suga, jidi jia gusonega mu mukanda wa Yehu mun’a Hanani; ndaga jiene jiasonegewe mu Mukanda wa Mafumu a gu Isalele. 35 Gungima dia ndaga jiene, Fumu Yosafata wa gu Yuda wakotele gikotelo nu Fumu Ahaziya wa gu Isalele, munu wakhalele mutshita ndaga jiabola. 36 Yosafata wadivuile nu Ahaziya ha gulonda masuwa hagula aye gu Tarsise, alondele masuwa ene gu Esione-Gebele. 37 Uvi Eliezele mun’a Dodavahu wa gu Malesha wazuelele profesi mukunda nu Yosafata egi: “Luholo wakota gikotelo nu Ahaziya, Yehowa mbawubolesa midimo yaye.” Hene masuwa ene abundugile, akhalelego luko nu luholo lua guya gu Tarsise.