Mikhuala
33 Mbimbi jiazuelele Moize muthu wa Nzambi wa giamatshidia ha gushimbiga enya Isalele, gutuama egi afue jienyeji. 2 Wazuelele egi:
“Yehowa wakatugile gu Sinayi, wajile,
Muene waazogele gifua muanya gu Seyile.
Wazogele mu lutumbu gifua muanya sendese gu khanda ya milundu ya Parane,
Wakhalele nu inunu nu inunu ya athu a gijila,
Masuta enji akhalele gu koko dienji dia madia.
3 Muene wakhalele muzumba athu enji;
Athu awo agasue a gijila adi ha mago aye.
Akhalele ya gukhala gu malu aye;
Akhalele mutegelela mbimbi jiaye.
4 (Moize watuhanele mukhuala,
Mukhuala wene udi khapho mukunda nu ajigulu* a Yakoba.)
5 Muene wabuile fumu gu Yeshuluna,*
Tangua mafumu a athu adibungishile
Hamoshi nu iphuta yagasue ya Isalele.”
6 Wazuelele mukunda nu Ribene egi:
“Ribene akhale nu monyo, gafuigo,
Athu a mu giphuta gienji abuigo azonda.”
7 Wazuelele mbimbi eji ha gushimbiga Yuda:
“Oo Yehowa, tegelela dijui dia Yuda,
Muvutule gudi athu enji.
Mago enji aluile ima yenji,
Mukuatese ha gubinga mbalagaji jienji.”
8 Wazuelele mukunda nu Levi egi:
“Tumime nu Ulime waye* udi mukunda nu muthu udi wa gujinginyina gudi aye,
Munu walolele gu Masa.
Wamuluishile gu meya a Meriba,
9 Muthu wazuelele gudi sh’enji nu gin’enji egi: ‘Ngaanemeselego.’
Gajiyilego nga ene aphangi’enji a mala,
Watunyile nu ene an’enji.
Handaga wabambele mbimbi yaye,
Wanemesele nji gikotelo giaye.
10 Alongese Yakoba badesizio aye
Nu mikhuala yaye gudi Isalele.
Ahane uhafu hagula uzole vumba diabonga mukunda nu aye*
Nu mulambu wagasue ha giwotshielo giaye.
11 Oo Yehowa, mushimbige, muhane ngolo,
Suanguluga nu midimo ya mago enji.
Bogola malu* a athu adi muzuga ha gumuluisa,
Hagula athu anyi anago gumuzumba azugigo luko.”
12 Wazuelele mukunda nu Benjame egi:
“Muthu Yehowa wana zumba akhale mu ubambi hehi n’enji;
Hadi muene gumubamba lusugu lua mudidi,
Muene mbawukhala ha phanga jienji.”
13 Mukunda nu Yozefe wazuelele egi:
“Yehowa ashimbige mavu enji
Nu ima yabalega gubonga ya mu dilu,
Nu mame nu meya a ito adi mukatuka gosh’a mavu,
14 Nu ima yabalega gubonga yana zola kumbi
Nu ima yabalega gubonga yana zoga mbeji nu mbeji,
15 Nu ima yabalega gubonga yana katuga mu milundu ikulu*
Nu ima yabalega gubonga ya mu tumilundu tuana khala guene tangua diagasue,
16 Nu ima yabalega gubonga ya ha mavu nu ima yagasue yana zoga hene,
Nu mu gutshigina gua Muthu wana khala mukatshi dia gamutshi ga miya.
Ize ha muto wa Yozefe,
Holu dia gibozo-bozo gia muto wa muthu wakhaphumuiwe nu aphangi’enji.
17 Ngolo jienji jidi gifua jia ngombe ya mulume ya somi,
Mbinga jienji jidi gifua mbinga jia ngombe ya mulume ya mu foto.*
Muene mbawulutula athu nu mbinga* jiene
Mbawalutula mukut’awo agasue uu nu gu suga ya mavu.
Mbinga jiene jidi inunu nu inunu ya enya giphuta gia Efrayime,
Nu inunu ya enya Manase.”
18 Wazuelele mukunda nu Zabulona egi:
“Oo Zabulona, khala nu gusuanguluga tangua udi muzoga,
Aye Isakale, khala nu gusuanguluga mu tenta jiaye.
19 Mbaatamega athu gu mulundu.
Guene mbaahana milambu ya athu ana tshita ndaga jiabonga.
Handaga mbaazola umonyi wavula mu mita yakoma
Nu umonyi udi wagusuega mu gishegele.”
20 Mukunda nu Gade wazuelele egi:
“Muthu udi mukomesa mididilo ya Gade ashimbigiwe.
Udi ya gubanda guene gifua khoshi,
Udi hehi ha guzavumuna koko, yadiago, gibozo-bozo gia muto.
21 Mbawutomba shinda dia thomo mukunda nu muene,
Handaga guene ana bamba shinda dia muthu wana hana mikhuala.
Mafumu a athu mbaadibungisa.
Muene mbawukalagala ndaga jiabonga mukunda nu Yehowa,
Muene nu Isalele mbaatumagela badesizio a Nzambi.”
22 Wazuelele mukunda nu Dane egi:
“Dane udi gifua mutumba wa khoshi.
Mbawuzuga tshilumugu gu Bashana.”
23 Wazuelele mukunda nu Nefetali egi:
“Nefetali mbawusuanguluga handaga Yehowa mbawumutshigina,
Nu mukunda nu ishimbigo yenji yavula.
Zula khanda ya mayilo a kumbi nu ya sud.”
24 Wazuelele mukunda nu Asele egi:
“Nzambi wahanele Asele ana avula.
Aphangi’enji amukalegele ndaga jiabonga gubalega athu ako,
Anginyise* ikanzo yenji mu maji.
25 Ima yaye ya gukangela mufulo idi ya utadi nu ya kuivre,
Mbawukhala mu ubambi masugu agasue.
26 Gushigo nga nu muthu mumoshi udi gifua Nzambi wa giamatshidia wa Yeshuluna,
Munu wana balega dilu ha guza gugukuatesa
Nu wana guza mu matuta mu lutumbu luenji.
27 Nzambi udi fundo dia gulengela sendese mualeha,
Mbawumibata nu mbawumibamba mayilago.
Mbawukaya mbalagaji jienu gutuama dienu,
Mbawuzuela egi: ‘Amaneselenu!’
28 Isalele mbawukhala mu ubambi,
Gito gia meya gia Yakoba mbagidikhalela
Mu mavu adi nu mbuto nu matombe ahe-ahe,
Dilu dienji mbadinogesa mame.
29 Oo Isalele, khala nu gusuanguluga!
Nanyi udi gifua aye,
Athu ahuluishiwe gudi Yehowa,
Tshibu yaye yana gugubamba
Nu phogo yaye ya khusa yakoma.
Mbalagaji jiaye mbajivua woma gutuama diaye,
Mbawadiata ha kunda.”*