Yoshua
5 Mafumu agasue a enya Amole anyi akhalele gu khanda ya mayilo a kumbi a Yordane nu mafumu agasue a enya Kanana anyi akhalele hehi nu kianga avuile egi Yehowa wamiginyisa muta wa Yordane gutuama dia enya Isalele uu nu tangua azawuga. Havuile ene ngenyi woma waakuatele, alebele mila mukunda nu enya Isalele.
2 Mu tangua diene, Yehowa wawambelele Yoshua egi: “Londa ana a phogo a seso, umbe luko mala a gu Isalele gu mukanda.” 3 Hene Yoshua walondele ana a phogo a seso, wambile mala a gu Isalele gu mukanda gu Gibeate-Halalote.* 4 Yoshua wambile mala ene gu mukanda handaga mala agasue akatugile gu Ejipitu, anyi akhalele atagana ha gulua ita afuile mu mavu a luselenga mu njila gungima dia gukatuga gu Ejipitu. 5 Athu agasue akatugile gu Ejipitu ambiwe gu mukanda, uvi athu agasue anyi avualewe mu mavu a luselenga mu njila gungima dia gukatuga gu Ejipitu, akhalele khenji ambiwago gu mukanda. 6 Enya Isalele awendele ivo 40 mu mavu a luselenga uu nu tangua athu agasue afuile, yakotelesa egi mala akhalele atagana ha gulua ita anyi akatugile gu Ejipitu nu atunyile gutumagela mbimbi ya Yehowa. Yehowa wadilogele mukunda nu ene egi mbaashigo mumona nga hazonda gifutshi ginyi Yehowa wadilogele gudi akhakh’etu ha gutuhana, gifutshi giazala pha nu miliki nu wigi. 7 Hene an’awo azudile fundo diawo. Ene athu Yoshua wambile gu mukanda handaga ambiwego gu mukanda tangua akhalele mu vuayaje.
8 Tangua amanesele gumba athu agasue gu mukanda, asalele mu phundo mu mafundo awo uu nu tangua phuta jiawo jiayile.
9 Gungima Yehowa wawambelele Yoshua egi: “Mangino ngamikatula musonyi wamihanele enya gu Ejipitu.” Sendese mu tangua diene, fundo diene diana tamegewa uu nu mangino egi Gilegale.
10 Enya Isalele alanduile gukhala mu phundo jiawo gu Gilegale, akalegele Pake mu lusugu lua 14 lua mbeji yene mu ngueze mu mavu a luselenga a Yeliko. 11 Mu lusugu lualanduile, gungima dia Pake, asendesele gudia mbuto jia mu gifutshi; mu lusugu luene adile mapha ashigo nu levire nu mbuto jia gukalanga. 12 Mu lusugu lualanduile tangua adile mbuto jia mu gifutshi, mana abembele gumuenega; guakhalelego luko nu mana mukunda nu enya Isalele, uvi asendesele gudia mbuto jia mu gifutshi gia Kanana mu givo giene.
13 Tangua Yoshua wakhalele hehi nu Yeliko, wamonele yala mumoshi wa gumagana gutuama dienji nu phogo ya khusa ha mago. Yoshua wayile gudi yala muene, wamuhudile egi: “Udi gu khanda yetu nga gu khanda ya mbalagaji jietu?” 14 Muthu muene wamuvutuile egi: “Ndo, ngaji haha handaga ngudi fumu wa masuta a Yehowa.” Hene Yoshua wafugamele, washiwugile phala mu mavu, wamuhudile egi: “Fumu itshi udi mutshigina guwambela muenya mudimo waye?” 15 Fumu wa masuta a Yehowa wavutudile Yoshua egi: “Katula saphata jiaye, handaga fundo udi ya gumagana didi dia gijila.” Yoshua wakatudile saphata jienji mbala imoshi.