Mukanda wa Thomo wa Mafumu
21 Gungima dia ndaga jiene, mulonga umoshi wabuile mukunda nu gilanga gia vinyo gia Nabote muenya gu Yizelele. Gilanga giene giakhalele gu Yizelele hehi nu inzo ya fumu Ahaba wa gu Samaliya. 2 Ahaba wawambelele Nabote egi: “Nguhane gilanga giaye gia vinyo ngugibuise gilanga giami gia ima ya gudia handaga gidi hehi nu inzo yami. Ame mbanguguhana gilanga giko gia vinyo giabonga ha fundo dia gilanga giaye. Nga ndo gula watshigina, wajiya gungudigila nagio.” 3 Uvi Nabote wavutuile Ahaba egi: “Ngajiyilego gutangiza nga hazonda ha guguhana khapho dia akhakh’ami, handaga Yehowa watunyishile ndaga yene.” 4 Ahaba wavutugile gumbo dienji nu khabu, gasuangulugilego nu mvutu yamuhanele Nabote muenya Yizelele hazuelele muene egi: “Ngajiyilego guguhana khapho dia akhakh’ami.” Wayile mubanda ha gitanda phala gu gibayi, watunyile gudia.
5 Mukaji’enji Yezabele wajile, wamuhudile egi: “Mukunda natshi udi nu gikenene giavula? Mukunda natshi watuna gudia?” 6 Wamuvutuile egi: “Ngawambela Nabote muenya gu Yizelele egi: ‘Ngudigile gilanga giaye gia vinyo, nga ndo gula watshigina ngajiya guguhana gilanga giko gia vinyo ha fundo dia gilanga giaye.’ Uvi muene wazuedi egi: ‘Ngajiyilego guguhana gilanga giami gia vinyo.’” 7 Mukaji’enji Yezabele wamuwambelele egi: “Nanyi udi fumu wa Isalele, ishigo aye? Zuga udie ndambo ya ima, udisagesago. Ame hakhami mbangudi guguhana gilanga gia vinyo gia Nabote muenya gu Yizelele.” 8 Wasonegele mikanda mu jina dia Ahaba, wayimbile kashe ya Ahaba. Wayitumile gudi akulu nu gudi manene a mu dimbo diakhalele Nabote. 9 Wasonegele mu mikanda yene egi: “Hagenu lusugu lumoshi athu adi naye gutuna gudia, mukhalese Nabote gutuama dia athu. 10 Mudi naye gutamega mala a gituhu muyadi, muakhalese gutuama dienji, amufunde egi: ‘Watshi Nzambi mukumbu, watshi nji fumu mukumbu!’ Gungima mudi naye guzoga n’enji hanze ya dimbo, mumusonone maseso ha gumushiya.”
11 Hene, mala a mu dimbo diakhalele Nabote nu akulu nu manene a mu dimbo diene akalegele ndaga gifua luholo yakhalele yagusonega mu mikanda yaatumidile Yezabele. 12 Ahagele lusugu athu akhalele naye gutuna gudia, mu lusugu luene akhalesele Nabote gutuama dia athu. 13 Mala a gituhu muyadi ajile, akhalele gutuama dia Nabote, asendesele gumufunda gutuama dia athu egi: “Nabote watshi Nzambi mukumbu, watshi nji fumu mukumbu!” Gungima amubatele hanze ya dimbo, amusonuene maseso, amushiyile. 14 Atumidile Yezabele mbimbi egi: “Nabote washiyiwa nu maseso.”
15 Tangua Yezabele wavuile egi Nabote washiyiwa nu maseso, wawambelele Ahaba egi: “Nda uzule gilanga gia vinyo ginyi Nabote muenya gu Yizelele watunyile gugudigila, handaga Nabote gashigo luko nu monyo. Wafui gale.” 16 Havuile Ahaba egi Nabote wafui gale, wabulumugile ha guya muzula gilanga gia vinyo gia Nabote muenya gu Yizelele.
17 Uvi Yehowa wawambelele Eliya muenya gu Tishebe egi: 18 “Nda umone Ahaba fumu wa Isalele wana hinyina gu Samaliya. Udi mu gilanga gia vinyo gia Nabote, wayi guene ha gugizula. 19 Udi naye gumuwambela egi: ‘Yehowa wazuela egi: “Washiya muthu, henyaha udi mutshigina nji guzula khapho dienji?”’ Gungima muwambele egi: ‘Yehowa wazuela egi: “Ha fundo jimbua jialenji mahatshi a Nabote, diene fundo mbajilenza nji mahatshi aye.”’”
20 Ahaba wawambelele Eliya egi: “Aa mbalagaji wami, wangumona!” Muene wamuvutudile egi: “Ayi ngagumona. Nzambi wazuela egi: ‘Luholo wadihanyi* ha gutshita ndaga jiabola gu meso a Yehowa, 21 henyaha ngudi gugubatela malamba. Mbangushiya ajigulu aye agasue nu mala agasue* a mu fami yaye, ikhale athu adi a guleba anyi ashigo nu ndando gu Isalele. 22 Mbangubuisa fami yaye gifua fami ya Yeloboama mun’a Nebate, mbanguyibuisa nji gifua fami ya Basha mun’a Ahiya, handaga wanguhanyi khabu, watumi nji Isalele ha gutshita gubola.’ 23 Yehowa wazuedi nji mukunda nu Yezabele egi: ‘Jimbua mbajidia Yezabele mu gilanga gia gu Yizelele. 24 Muthu wagasue wa mu fami ya Ahaba mbawufua mu dimbo, jimbua mbajimudia; munu mbawufua mu temu, tunjila tua gosa mbatumudia. 25 Yadiago, khenji guakhalele galego nu muthu muko wakhalele gudihana* ha gutshita ndaga jiabola gu meso a Yehowa gifua Ahaba. Mukaji’enji Yezabele wakhalele gumutuma ha gutshita ndaga jiene. 26 Ahaba wakalegele ndaga jiabalega gubola, wakombelele isongo ya usala* gifua muakhalele mutshita enya Amole agasue anyi Yehowa wakayele gutuama dia enya Isalele.’”
27 Havuile Ahaba ndaga jiene, watawile milele yenji, wasudigile sagi ha muila, watunyile nji gudia. Wakhalele mubanda holu dia sagi, wakhalele nji muwenda nu mulegelege. 28 Gungima Yehowa wawambelele Eliya muenya gu Tishebe egi: 29 “Wamonyi luholo Ahaba wadibulumuisa gutuama diami? Mbangushigo gumubatela malamba hadi muene nu monyo handaga wadibulumuisa gutuama diami. Mbangubata malamba mu fami yenji mu masugu a mun’enji.”