Mukanda wa Thomo wa Mafumu
17 Eliya* muenya gu Tishebe wakhalele mujinga gu Gileade wawambelele Ahaba egi: “Ngudi guguwambela giamatshidia mu jina dia Yehowa Nzambi wa Isalele udi nu monyo munu ngana kombelela* egi, mu ivo eyi thathu, mame mbashigo mubua, mvula nji mbayishigo munoga, uu nu tangua mbanguzuela luko!”
2 Yehowa wawambelele Eliya egi: 3 “Katuga haha, nda gu khanda ya mazogelo a kumbi udisuege mu baba dia Kelita* gu khanda ya mazogelo a kumbi a Yordane. 4 Mbawukhala munua meya a gamuta, mbangutuma ikuanga guene ha gugubatela ima ya gudia.” 5 Eliya wakatugile mbala imoshi, watshitshile gifua muamuwambelele Yehowa. Wayile mukhala mu baba dia Kelita* gu khanda ya mazogelo a kumbi a Yordane. 6 Ikuanga yakhalele gumubatela mapha nu misunyi mu gimenegena nu mu ngueze, wakhalele munua meya a gu gamuta. 7 Uvi gungima dia masugu azonda, gamuta gene gamiginyile, handaga mvula yakhalelego luko munoga mu gifutshi.
8 Yehowa wamuwambelele luko egi: 9 “Nda gu Salefata ya gu Sidona, ukhale guene. Mbanguwambela mukhetu mumoshi wa gafunda wa mu dimbo diene ha guguhana ima ya gudia.” 10 Hene Eliya wayile gu Salefata. Hahetele muene ha mufulo wa dimbo, wamonele mukhetu mumoshi wa gafunda mutshiaya khunyi. Wamutamegele, wamuwambelele egi: “Ngabuba, ngubatele ndambo ya meya mu khopho ngunue.” 11 Hakhalele muya mukhetu muene ha guzula meya, wamutamegele luko, wamuwambelele egi: “Ngabuba, ngubatele nji gitshinyi gia dipha.” 12 Mukhetu muene wamuvutudile egi: “Ngudi guguwambela giamatshidia mu jina dia Yehowa Nzambi waye udi nu monyo egi, ngushigo nu dipha. Ngudi phamba nu koko dimoshi dia phupha mu bungu diakoma nu ndambo ya maji mu bungu diazonda. Henyaha ngaji mutshiaya ndambo ya khunyi hagula nguye ngulonde ima ya gudia mukunda nu ame nu mun’ami wa yala. Yene ima yatusala, gula tuadia, gungima mbatudi mufua getu.”
13 Eliya wamuwambelele egi: “Uvuigo woma. Nda utshite gifua luholo wazuela. Uvi ngulondele thomo gadipha gazonda gifua munengu nu ima idi guene, ungubatele. Gungima wajiya giwa gulonda ndambo ya ima ya gudia mukunda nu aye nu mun’aye wa yala. 14 Handaga Yehowa Nzambi wa Isalele wazuela egi: “Phupha mbayishigo muhua mu bungu diakoma, maji mbaashigo nji muhua mu bungu diazonda uu nu lusugu Yehowa mbawunogesa mvula mu gifutshi.” 15 Mukhetu muene wayile, wakalegele ndaga gifua luholo luazuelele Eliya. Muene nu fami yenji nu Eliya akhalele nu ima ya gudia masugu avula. 16 Phupha yahuilego mu bungu diakoma, maji ahuilego nji mu bungu diazonda, gifua luholo Yehowa wazuelele mu njila ya Eliya.
17 Gungima dia ndaga jiene, mukhetu muene fumi’a inzo, mun’enji wa yala wakatele misongo. Misongo yene yakolele, mona muene wafuile.* 18 Mukhetu muene wawambelele Eliya egi: “Muthu wa Nzambi wa giamatshidia, ndaga itshi ngagutshita?* Waji haha ha gunguwunguluisa gubola guami nu ha gushiya mun’ami wa yala ba?” 19 Uvi Eliya wawambelele mukhetu muene egi: “Nguhane mun’aye.” Wazudile mona ha mago a mukhetu muene, wakandugile n’enji gu sugu ya gosa, fundo diakhalele mubanda muene. Wamubandesele ha gitanda* gienji. 20 Eliya wakombelele Yehowa egi: “Oo Yehowa Nzambi wami, wabata nji lamba gudi mukhetu owu wa gafunda wanguyambi gumbo dienji? Washiya mun’enji?” 21 Gungima Eliya wabandele holu dia mona mbala thathu, wakombelele Yehowa mu dijui diakola egi: “Oo Yehowa Nzambi wami, ngabuba, vutula monyo wa mona yowu.” 22 Yehowa wavuile gisambu gia Eliya, monyo wa mona muene wavutugile mu thulo, wasendesele guhuima.* 23 Eliya wazudile mona muene, wakatugile n’enji gu sugu ya gosa, wabulumugile monzo. Wamuhanele gudi gin’enji, wamuwambelele egi: “Tala, mun’aye udi nu monyo.” 24 Mukhetu muene wawambelele Eliya egi: “Henyaha ngajiya egi udi diago muthu wa Nzambi wa giamatshidia, ndaga wana zuela mu jina dia Yehowa jidi jia giamatshidia.”