Mukanda wa Mbadi wa Gudilanduluila
26 Gungima athu agasue a gu Yuda abuishile Oziase fumu ha fundo dia sh’enji Amazia. Mu tangua diene, Oziase wakhalele nu ivo 16. 2 Oziase watungile luko dimbo dia Elote, wadihanele luko gudi enya Yuda hafuile fumu Amazia* gifua muafuile akhakh’enji. 3 Oziase wakhalele nu ivo 16 habuile muene fumu, wahinyine ivo 52 gu Yelusalema. Jina dia gin’enji diakhalele Yekoliya, wakhalele muenya gu Yelusalema. 4 Oziase wakhalele mutshita ndaga jiabonga gu meso a Yehowa gifua muatshitshile sh’enji Amazia. 5 Wakhalele mulandula gukamba Nzambi hakhalele Zakaliya nu monyo, muene wamulongesele guvuila Nzambi wa giamatshidia woma. Hakhalele Oziase mukamba Yehowa, Nzambi wa giamatshidia wakhalele gumushimbiga.
6 Wayile muluisa enya Filistiya, wabudile hulu gu gibayi gia dimbo dia Gate nu gu gibayi gia dimbo dia Yabena nu gu gibayi gia dimbo dia Asedode; gungima watungile membo mu mavu a Asedode nu mu mavu a enya Filistiya. 7 Nzambi wa giamatshidia wakhalele gumukuatesa ha gubinga enya Filistiya nu enya Alabe akhalele mujinga gu Gulebale nu ha gubinga enya Meunima. 8 Enya Amona asendesele guhana Oziase gitadi. Lukuma luenji luamuanganele uu nu gu Ejipitu, handaga wabuile diago nu ngolo jiavula. 9 Oziase watungile nji jinzo jialeha jiakhalele nu ibayi yakola gu Yelusalema hehi nu Mufulo wa Khomo, hehi nu Mufulo wa mu Baba, hehi nji nu makunji akhalele mukuata gibayi. 10 Watungile nji jinzo jialeha mu mavu a luselenga, wahagele nji mawina* a meya avula (handaga wakhalele nu shitu jiavula); watshitshile nji ngenyi gu Shefela nu mu baba.* Wakhalele nu adimi a mahia nu athu akhalele mutshita midimo mu ilanga ya vinyo gu milundu nu gu Karmele handaga wakhalele muzumba midimo ya ilanga.
11 Oziase wabungishile nji masuta akhalele nu iluilo ha gulua ita. Tangua akhalele muya mulua ita, akhalele guakhapha mu mahunji. Sekretere Yeyele nu mukuateshi Maseya akhalele mutanga masuta ene, nu gusonega majina awo mu utuameji wa Hananiya munu wakhalele fumu mukatshi dia masuta a Oziase. 12 Mafumu agasue a fami jia iphuta yawo anyi akhalele mutuameza masuta ene a ngolo akhalele 2 600. 13 Akhalele mutuameza masuta 307 500 anyi akhalele hehi ha gulua ita, akhalele masuta a ngolo, akhalele mukuatesa fumu ha guluisa mbalagaji jienji. 14 Oziase wahanele masuta agasue tshibu nu milumbu nu ifulu nu tuzawu tua ita nu mata a manana nu maseso a lanse. 15 Oziase wawambelele nji enya ndunge ha gulonda mashinyi a guluila ita. Alondele mashinyi ene gu Yelusalema, gungima a ahagele holu dia jinzo jialeha nu mu khomo jia ibayi; mashinyi ene akhalele atagana ha gusonona mifula nu maseso akoma. Lukuma luenji luamuanganele mu mafundo agasue handaga wahetele ukuateshi wavula diago, wabuile nji nu ngolo.
16 Uvi habuile muene nu ngolo, lulendo luamukuatele, luamubatele lamba. Walumbugidile nji Yehowa Nzambi wenji handaga wanginyile mu tempelo ya Yehowa ha guwotshia uhafu ha giwotshielo gia uhafu. 17 Nganga-nzambi Azariya nu nganga-nzambi jiko jia Yehowa 80 jinyi jiakhalele nu gikhesa jiamulanduile mu tempelo mu phushi. 18 Atunyishile Fumu Oziase, amuwambelele egi: “Oziase, ishigo aye udi naye guwetshia uhafu mukunda nu Yehowa! Phamba nganga-nzambi jidi naye guwetshia uhafu handaga adi ajigulu a Alona, ene aphelegetesewe. Zoga ha fundo dia gijila handaga walumbugila Yehowa Nzambi, gishina giene mbagashigo guguhana ginemua Mukunda nu ndaga wakalagala.”
19 Uvi Oziase wakhalele nu longa dia guwetshiela uhafu ha mago, wavuile khabu jiakola; hakhalele muene muvuila nganga-nzambi khabu, hute diamuzogele ha mbombo, ha meso a nganga-nzambi mu inzo ya Yehowa hehi nu giwotshielo gia uhafu. 20 Tangua Azariya fumu wa nganga-nzambi nu nganga-nzambi jiagasue jiamutalele, jiamonele hute ha mbombo yenji! Jiamuzolele mu phushi hanze, muene nji wazogele mu phushi, handaga Yehowa wamuhanele ndola.
21 Fumu Oziase wasalele nu hute uu nu hafuile muene. Wakhalele gudikhalela mu inzo yenji hakhenji handaga wakhalele muenya hute, amutunyishile nji ha guya gu inzo ya Yehowa. Mun’enji Yotama wakhalele mutuameza inzo ya fumu, wakhalele nji musophesa athu a mu gifutshi.
22 Ndaga jiko jiakalegele Oziase sendese gu gisendeselo uu nu gu suga, jiasonegewe gudi profete Yeshaya mun’a Amoza. 23 Gungima Oziase wafuile gifua muafuile akhakh’enji, amufundjile hehi nu malumba a akhakh’enji uvi yakhalele mu mavu a mafumu. Handaga azuelele egi: “Udi muenya hute.” Mun’enji Yotama wabuile fumu ha fundo dienji.