Mukanda wa Thomo Gudi Enya gu Tesalonike

1 Ame Phaula hamoshi nu Silase nu Timote, ngudi musonegela hungu dia gu Tesalonike didi mu gudivua nu Tata Nzambi nu Fumu Yesu Klisto.

Khenda jiavula jia Nzambi nu guhuima guenji gukhale nu enue.

2 Tangua diagasue tuana hana Nzambi mersi mu isambu yetu ha tuana gumitangiza mukut’enu agasue. 3 Handaga gutuama dia Tata Nzambi tuanago gujimbila mudimo muana kalagala, handaga muana sha gutshigina gudi muene, nu mukunda nu guzumba guenu nu luholo muana kolesela mu malamba mukunda nu felela muana khala nadio gudi Fumu wetu Yesu Klisto. 4 Tudi mujiya egi Nzambi wana gumizumba muavula, wamitombele 5 handaga lukuma luabonga tuana longesa luahetelego gudi enue phamba mu mbimbi, uvi luahetele nu ngolo nu nyuma yabonga nu gutshigina guakola. Enue mujiya athu a luholo lutshi tuabuile mukatshi dienu mukunda nu gubonga guenu. 6 Mualanduile gifezegeselo gietu nu gia Fumu ngatshima muataganele nu malamba avula, uvi muatshiginyile mbimbi ya Nzambi nu gusuanguluga guana hana nyuma yenji. 7 Ngenyi, muahanele gifezegeselo giabonga gudi alandudi agasue a gu Maseduane nu a gu Akaya.

8 Ndaga ya giamatshidia idi egi, mualongeselego mbimbi ya Yehowa phamba gu Maseduane nu gu Akaya, uvi mafundo agasue avile luholo muashile gutshigina gudi Nzambi. Na tushigo nu ndaga iko ya guzuela. 9 Handaga athu ene hakhawo amuzuelela luholo tuadimonele n’enu mbala ya thomo nu luholo muabembele isongo yenu ha gubua ahiga a Nzambi wa monyo nu wa giamatshidia. 10 Mudi munenga nji guza gua Mun’enji mu dilu, yonu muene wafuzumuile mu gufua, yakotelesa egi Yesu, munu udi gutuhuluisa gu khabu jia Nzambi jidi muza.