Mukanda wa Thomo Gudi Enya gu Tesalonike

3 Tangua tuamonele egi tuahuila ha gunengena guvua mene jienu, tuazuelele egi muabonga tusale getu hakhetu gu Atene. 2 Tuamitumidile phangi’etu Timote, muenya mudimo wa Nzambi* mukunda nu lukuma luabonga luatadila Klisto, ha gumikolesa nu ha gumikuatesa ha gukhala nu gutshigina guakola 3 hagula malamba akola mudi mutagana nawo alebesago nga muthu mumoshi mukatshi dienu. Handaga mudi mujiya muabonga egi tuajiyilego gulenga malamba a luholo lulu. 4 Tangua tuakhalele n’enu, tuadiangele gumiwambela egi mbatutagana nu malamba, malamba ene enyawa tudi mutagana nawo gifua luholo mudi mujiya. 5 Ngakhalele nu uhote wavula wa gumimona, hene ngatumile muthu ha gujiya gula mudi ya gujinginyina gudi Nzambi. Ngakhalele muvua woma egi Diabulu* wajiya gumilola, ngenyi mudimo wetu wajiya gulaba gudiyila.

6 Timote waheta gale luenyelu. Watuwambela mene jienu jiabonga jiatadila gujinginyina guenu gudi Nzambi nu guzumba guenu. Watuwambela egi mudi nji nu uhote wavula wa gutumona gifua luholo tudi nu uhote wenu. 7 Gishina giene aphangi, ngatshima tudi mutagana nu malamba, uvi tuahetshi gikhesa mukunda nu enue nu luholo muasadi ya gujinginyina gudi Nzambi. 8 Tuaheta luko ngolo,* handaga mudi musala ya gujinginyina mu ufuta wenu nu Fumu. 9 Tuana hana Nzambi mvudi yavula mukunda nu enue handaga muana gutusuanguluisa muavula. 10 Tuana lomba Nzambi muavula mukunda nu enue phipha nu muanya hagula tumimone,* tumikuatese ha gukolesa gutshigina guenu.

11 Henyaha tudi musamba hagula Tata wetu Nzambi nu Fumu wetu Yesu atukuatese hagula tuajiya guza gumimona. 12 Fumu amikuatese ha gukula nu ha gudizumba muavula mukatshi dienu nu ha guzumba athu agasue gifua luholo tuana gumizumba. 13 Akolese nji mitshima yenu, mukhale athu a gijila ashigo nu gubola gutuama dia Tata Nzambi, tangua Fumu wetu Yesu mbawuza muvutuga nu athu enji agasue a gijila.