Gumonesa Gudi Yone
13 Gungima, yamagenele* holu dia ishegele ya kianga.
Ngamonele shitu ya mu foto imoshi muzoga mu kianga, yakhalele nu mbinga kumi nu mito sambadi. Holu dia lumbinga luagasue hakhalele nu gipho gia ufumu, uvi holu dia mito yenji hakhalele nu majina adi mushinga* Nzambi. 2 Shitu ya mu foto ngamonele yakhalele gifua gisupha,* malu enji akhalele gifua malu a shitu ya urse, kano dienji diakhalele gifua kano dia khoshi. Dragona yahanele shitu ya mu foto ngolo jienji nu nguasa yenji ya ufumu nu uhinyinyi wakoma.
3 Ngamonele egi mukatshi dia mito yenji, umoshi wakhalele mumonega gifua wanamenesewe phuta yakhalele naye guyishiya, uvi phuta yene yayile. Athu agasue a ha mavu akhalele mulandula shitu ya mu foto nu gushimana. 4 Akombelele dragona handaga yahanele uhinyinyi gudi shitu ya mu foto nu akombelele shitu ya mu foto mu mbimbi jiji: “Nanyi udi gifua shitu eyi ya mu foto? Nanyi wajiya gulua naye?” 5 Ayihanele kano ha guzuela ndaga jiakoma nu jidi mushinga Nzambi. Ayihanele nji ngolo jia gutshita gifua muatshigina yene mbeji 42. 6 Yakanguile kano dienji ha gushinga Nzambi nu jina dienji nu fundo diana khala muene nu athu ana khala mu dilu. 7 Ayihanele njila ha guluisa athu a gijila nu ha guabinga. Ayihanele ufumu ha guhinyina iphuta yagasue nu athu a ilema yagasue, a mazuelelo agasue nu ifutshi yagasue. 8 Athu agasue a ha mavu mbaayikombelela. Sendese gu gisendeselo gia mavu, gushigo nga jina dimoshi mukatshi diawo diasonegewe mu rulo ya monyo ya Mun’a Gimeme munu washiyiwe.
9 Muthu udi nu matshui a guvua avue. 10 Gula muthu udi naye guya mu uhiga, mbawuya mu uhiga. Muthu mbawushiya muthu gu phogo ya khusa,* muene nji mbawushiyiwa gu phogo ya khusa. Ndaga eyi idi mutoga athu a gijila ha gukolesela nu ha gukhala nu gutshigina.
11 Ngamonele shitu iko ya mu foto muzoga mu mavu. Yakhalele nu mbinga mbadi gifua jia mun’a gimeme, uvi yasendesele guzuela gifua dragona. 12 Idi mukalegela uhinyinyi wagasue wa shitu ya mu foto ya thomo ha meso ayo. Idi mutshita egi mavu nu athu adi hene akombelele shitu ya mu foto ya thomo, inyi yakhalele nu phuta yatshiginyile guyishiya uvi yavile muabonga. 13 Idi mutshita ndaga jiakoma jia gushimana, idi mutshita nji egi tshuya tukatuge mu dilu tubulumuge ha mavu ha meso a athu.
14 Luholo ayihanele njila ha gukalagala ndaga jia gushimana ha meso a shitu ya mu foto ya thomo, idi muhuiga athu a ha mavu tangua idi guatuma ha gulondega gifuanesa gia shitu ya mu foto ya thomo inyi yawasewe phogo uvi yafile ndo. 15 Ayihanele njila ha gumba muhehe* wa monyo gudi gifuanesa gia shitu ya mu foto ya thomo, hagula gifuanesa gia shitu ya mu foto giajiya guzuela nu gushiya athu agasue adi mutuna gugikombelela.
16 Idi mutuma athu agasue gu ngolo nu athu azonda, nu athu akoma, nu enya umonyi, nu phutu nu ahiga, nu athu ashigo ahiga ha guhagewa njimbu gu koko diawo dia madia nga ha mbombo jiawo, 17 nu hagula nga muthu mumoshi gasumbigo nu gasumbisago, phamba muthu munu udi nu njimbu, yakotelesa jina dia shitu ya mu foto nga mutango wa jina diayo. 18 Ndaga eyi idi mutoga gukhala nu ndunge: Muthu watema atange mutango wa shitu ya mu foto, handaga udi mutango wa athu. Mutango wene udi 666.