Mukanda wa Thomo wa Mafumu

6 Mu givo gia 480 gungima dia guzoga gua enya Isalele* gu Ejipitu, Salomo wasendesele gutunga inzo ya Yehowa* mu mbeji ya Zive* (yakotelesa egi mbeji ya mbadi). Yakhalele mu givo gia nguana sendese habuile muene fumu gu Isalele yagasue. 2 Inzo yatungile Fumu Salomo mukunda nu Yehowa yakhalele guleha bakude* 60, gukoma bakude 20 nu gitala gia bakude 30. 3 Fundo dia gunginyila gutuama dia tempelo* diakhalele guleha* bakude 20, diakhalele luholo lumoshi nu gukoma gua inzo. Sendese gutuama dia inzo, fundo diene diakhalele gukoma bakude kumi.

4 Walondele fenetre* gu inzo. 5 Watungile nji inzo iko gu muila wa gibayi gia inzo; yajietele ibayi ya inzo, yakotelesa egi ibayi ya tempelo,* nu sugu ya mukatshi. Walondele nji sugu gu khanda jiagasue. 6 Sugu jia inzo iko yatungile muene jinyi jiakhalele hashi jiakhalele gukoma bakude thano. Etaje ya thomo yakhalele gukoma bakude 6, etaje ya mbadi yakhalele gukoma bakude 7. Wazondesele ibayi yakhalele mukhulo yagasue ya inzo gu etaje yagasue hagula anginyisago nga gima gu ibayi ya inzo.

7 Adiangele gusonga maseso ajile mutungila inzo, gishina giene athu avuilego matululu a marto nga a iphangu nga a ikadigilo iko ya utadi tangua akhalele mutunga inzo yene. 8 Mufulo wa inzo ya hashi wakhalele gu khanda ya sud* ya inzo. Gikalo* giakhalele mukondomoga ha gukanduga gu etaje ya thomo, gungima giakhalele mukanduga uu nu gu etaje ya mbadi. 9 Watungile inzo yene, wayimanesele. Walondele plafo nu mabaya a sedre nu mabaya ako akoma a sedre akhalele mu ndonga. 10 Watungile sugu gu khanda jiagasue jia Tempelo, sugu yagasue yakhalele nu gitala gia bakude 5. Wakuatenesele sugu jiene gu Tempelo nu mabaya a sedre.

11 Mu tangua diene, Yehowa wawambelele Salomo egi: 12 “Gula watumagela diago mikhuala yami yagasue nu wanemesa badesizio ami, ame nji mbangutagenesa ndaga ngalayele sh’aye Davidi mukunda nu inzo udi mutunga. 13 Mbangukhala nji mukatshi dia enya Isalele, mbangushigo mubemba athu ami.”

14 Salomo walanduile gutunga inzo, wayimanesele. 15 Watshuigile* ibayi ya mukatshi dia inzo nu mabaya a sedre sendese hashi uu nu gu plafo, watshuigile nji mabaya a jenevriye hashi mukatshi dia inzo. 16 Wabatuile sugu ya bakude 20 mukatshi dia inzo gu khanda ya gungima nu mabaya a sedre sendese hashi uu nu gu plafo. Walondele sugu ya mukatshi guene,* Fundo Diabalega Gijila. 17 Tempelo,* yakotelesa egi gitshinyi gia inzo gia gutuama, yakhalele bakude 40. 18 Alondele ifuanesa yakhalele gifua mabundu a mathethe nu ya iyaji ya gusagumuna gu mabaya a sedre ahagele mukatshi dia inzo. Ibayi yagasue yakhalele yagutshuiga mabaya a sedre; nga seso dimoshi diakhalelego mumonega.

19 Walondele sugu ya mukatshi mu tempelo ha guhaga mushete wa gikotelo wa Yehowa. 20 Sugu ya mukatshi yakhalele guleha bakude 20, gukoma bakude 20 nu gitala gia bakude 20. Wayikungile wolo wabonga, watshuigile mabaya a sedre gu muila wa giwotshielo. 21 Salomo wakungile wolo wabonga mukatshi dia inzo, wasunuine malenge a wolo gutuama dia sugu ya mukatshi, malenge ene akhalele agukunga wolo. 22 Wakungile wolo gu inzo yagasue, wakungile nji wolo gu giwotshielo giagasue giakhalele hehi nu sugu ya mukatshi.

23 Walondele basheribe mbadi nu mabaya a mutshi wa pine* mu sugu ya mukatshi. Sheribe wagasue wakhalele nu gitala gia bakude 10. 24 Hambu dimoshi dia sheribe wa thomo diakhalele bakude 5, diko nji diakhalele bakude 5. Sendese gu songi ya hambu dia thomo uu nu gu songi ya hambu dia mbadi, bakude akhalele 10. 25 Mahambu a sheribe wa mbadi akhalele nji bakude 10. Basheribe ene mbadi akhalele luholo lumoshi, akhalele nji gukoma gumoshi. 26 Sheribe wagasue wakhalele nu gitala gia bakude 10. 27 Wahagele basheribe mu sugu ya mukatshi ya monzo.* Mahambu a basheribe ene akhalele agusununa, songi ya hambu dia sheribe mumoshi diakhalele mukuata gu gibayi gimoshi, dia sheribe muko diakhalele mukuata gu gibayi giko. Songi jia mahambu akhalele hakatshi na katshi dia inzo jiadikumile. 28 Gungima wakungile basheribe ene wolo.

29 Walondele ifuanesa ya basheribe nu ya samba nu ya iyaji ya gusagumuna mu ibayi yagasue ya inzo ha Fundo Diabalega Gijila nu ha Fundo dia Gijila.* 30 Wanamigile wolo hashi ha Fundo Diabalega Gijila nu ha Fundo dia Gijila. 31 Walondele ijidigo ya mufulo wa sugu ya mukatshi nu mabaya a mutshi wa pine, nu makunji akhalele gu khanda nu makunji a mufulo gifua gitshinyi gia thano.* 32 Mifulo yagasue mbadi yalondewe nu mabaya a mutshi wa pine. Walondele ifuanesa ya basheribe nu ya samba nu ya iyaji ya gusagumuna gu mifulo yene, wayikungile wolo. Anamigile wolo holu dia basheribe nu dia samba nu marto. 33 Wakalegele nji luholo lumoshi mukunda nu ijidigo ya mufulo wa Tempelo* yalondewe nu mabaya a mutshi wa pine, ya gitshinyi gia nguana.* 34 Walondele mifulo mbadi nu mabaya a mutshi wa jenevriye. Mufulo wagasue wakhalele nu ijidigo mbadi yakhalele nu ima* yakhalele guyikuatesa ha gubalumuga khanda nu khanda. 35 Walondele ifuanesa ya basheribe nu samba nu iyaji ya gusagumuna, wayikungile wolo.

36 Watungile luphango lua gibanzala gia mukatshi nu ndonga thathu jia maseso a gusonga nu ndonga imoshi ya mabaya a sedre.

37 Fondasio ya inzo ya Yehowa yahagewe mu givo gia nguana, mu mbeji ya Zive.* 38 Amanesele gutunga inzo yagasue mu givo gia 11 mu mbeji ya Bule* (yakotelesa egi mbeji ya 8), gifua luholo yakhalele naye gutungiwa. Salomo wayitungile mu ivo 7.