Mukanda wa Thomo wa Mafumu

10 Fumu-mukhetu wa gu Sheba wavuile lumene lua lukuma lua Salomo, lukuma luenji luakhalele mutumbuisa jina dia Yehowa. Hene, wajile ha gumulola nu mihu yakola. 2 Wahetele gu Yelusalema nu enya mudimo avula diago, nu shamo jiakhalele mubata maji a balesame nu wolo wavula nu maseso a ndando yakola. Wayile gudi Fumu Salomo, wamuwambelele ndaga jiagasue jiakhalele mu mutshima wenji. 3 Salomo wamuhanele mvutu gu mihu yenji yagasue. Guakhalelego nga nu ndaga yakhalele yakola diago gudi* fumu ha gumukotelesela.

4 Tangua fumu-mukhetu wa gu Sheba wamonele ndunge jiagasue jia Salomo nu inzo yatungile muene, 5 nu ima ya gudia akhalele muhaga ha mesa enji, nu mafundo enya mudimo enji akhalele mukhala mu tangua dia gudia, nu luholo enya mudimo enji ako akhalele muhaga ima gu mesa, nu milele yawo, nu athu akhalele gumuhana matombe, nu milambu yenji ya guwotshia yakhalele muhana muene tangua diagasue gu inzo ya Yehowa, wadihudile diago muavula.* 6 Hene wawambelele fumu egi: “Ndaga ngavuile mu gifutshi giami mukunda nu ndaga udi mutshita* nu mukunda nu ndunge jiaye jidi jia giamatshidia. 7 Uvi ngatshiginyilego ndaga jiene uu nu tangua ngaza gudimuenela ame hakhami. Ndaga ngamona jishigo nga gitshinyi gia ndaga ngavuile. Ndunge jiaye nu umonyi waye idi diago yavula gubalega ndaga anguwambelele. 8 Athu aye adi nu gusuanguluga! Enya mudimo aye anyi ana magana tangua diagasue gutuama diaye nu ana tegelela ndunge jiaye adi diago nu gusuanguluga! 9 Yehowa Nzambi waye atumbuishiwe. Muene waguhagele ha nguasa ya ufumu gu Isalele, handaga wasuangulugile nu aye. Yehowa wana zumba Isalele ivo nu ivo, wagutombele ha gukhala fumu hagula usophese ndaga mu luholo luatagana nu giamatshidia.”

10 Gungima wahanele fumu wolo batalanta* 120 nu maji avula a balesame nu maseso a ndando yakola. Sendese mu lusugu luene, khenji abatelego luko maji a balesame avula gifua anyi fumu-mukhetu wa gu Sheba wahanele Fumu Salomo.

11 Masuwa a Hirame akhalele mubata wolo akatugile gu Ofile, akhalele nji mubata mitshi yavula ya algume* nu maseso a ndando yavula. 12 Fumu walondele makunji a inzo ya Yehowa nu makunji a inzo ya fumu nu mabaya a mutshi wa algume, nu itare* nu ima iko ya gushigila miziki mukunda nu ayimbi a ngimbo. Uu nu mangino khenji abatelego luko mabaya a mitshi ya algume ya luholo elu mu gifutshi nu yana monegago luko.

13 Fumu Salomo wahanele nji fumu-mukhetu wa gu Sheba ima yagasue yatshiginyile muene nu inyi yatogele muene holu dia ima iko yadiangele gumuhana muene mukunda nu khadilo dia fumu dia guhana.* Gungima mukhetu muene wavutugile mu gifutshi gienji nu enya mudimo enji.

14 Givo nu givo, Salomo wakhalele muheta wolo wakhalele gunema batalanta 666, 15 holu dia wolo nu ima yagasue yakhalele mubata enya mungenda nu mafumu agasue a enya Alabe nu gudi baguvernere a mu gifutshi.

16 Fumu Salomo walondele tshibu jiakoma 200 jia wolo wagubungisa nu utadi uko (yakhalele mutoga bashekele* 600 a wolo ha gulonda tshibu imoshi), 17 walondele nji tshibu jiazonda-zonda* 300 jia wolo wagubungisa nu utadi uko (yakhalele mutoga bamine* thathu a wolo ha gulonda tshibu imoshi yazonda). Gungima fumu wahagele tshibu jiene mu Inzo ya Gishitu gia Libane.

18 Fumu walondele nji nguasa yakoma ya ufumu nu mazo a ngiamba, wayikungile wolo wabonga. 19 Guakhalele nu gikalo giakhalele nu mafundo 6 a gudiatela ha gukanduga gu nguasa ya ufumu. Gu thunda ya nguasa guakhalele guagujietesa nu gima gimoshi giakhalele gifua yangi diazonda, gu khanda nu khanda ya nguasa yene guakhalele nu mago; ifuanesa mbadi ya khoshi yakhalele ya gumagana hehi nu mago ene. 20 Khoshi 12 jiakhalele jia gumagana holu dia mafundo 6 a gudiatela a gikalo, gu songi ya fundo diagasue dia gudiatela guakhalele nu khoshi imoshi. Guakhalelego nga nu ufumu uko wakhalele nu nguasa ya ufumu ya luholo elu.

21 Makhopho agasue a Fumu Salomo akhalele a wolo; ima yagasue ya mu Inzo ya Gishitu gia Libane yalondewe nu wolo wabonga. Guakhalelego nga nu gima gimoshi gialondewe nu utadi wa siliva, handaga mu masugu a Salomo akhalele ndo muzula utadi wa siliva nu ndando. 22 Fumu wakhalele nu masuwa a gu Tarsise akhalele muya mu kianga hamoshi nu masuwa a Hirame. Mu ivo yagasue thathu, masuwa a gu Tarsise akhalele muza mbala imoshi nu wolo nu utadi wa siliva nu mazo a ngiamba nu jitshima nu njila jiana tamegewa egi phaona.

23 Fumu Salomo wakhalele nu umonyi wavula nu ndunge jiavula gubalega mafumu agasue a ha mavu. 24 Athu agasue a ha mavu akhalele mutshigina gumona* Salomo ha guvua ndunge jiamuhanele Nzambi. 25 Muthu wagasue mukatshi diawo wakhalele mubata kado: ima ya utadi wa siliva nu ima ya wolo, milele, iluilo, maji a balesame nu tubalu nu phunda. Akhalele mutshita ngenyi givo nu givo.

26 Salomo walanduile guvudisa phusu-phusu nu tubalu.* Wakhalele nu phusu-phusu 1 400 nu tubalu* 12 000. Wahagele phusu-phusu jiene mu membo atungile muene mukunda nu phusu-phusu nu gu Yelusalema hehi nu fundo diakhalele muene.

27 Gu Yelusalema, fumu wavudishile utadi wa siliva gifua maseso, mitshi ya sedre yabuile nji yavula gifua mitshi ya sikomole gu Shefela.

28 Tubalu tua fumu Salomo tuakhalele mukatuga gu Ejipitu. Enya mungenda a fumu akhalele musumba* tubalu tuene tuavula mu ndando yahagewe. 29 Ha gusumba phusu-phusu imoshi gu Ejipitu akhalele muhana bashekele* 600 a utadi wa siliva, uvi mukunda nu gabalu gamoshi akhalele muhana bashekele 150 a utadi wa siliva. Gungima akhalele gujidigila mafumu agasue a enya Hete nu mafumu a gu Siliya.