Mukanda wa Thomo wa Mafumu

20 Lusugu lumoshi, Fumu Bene-Hadada wa gu Siliya wabungishile masuta enji agasue nu mafumu ako 32 nu tubalu nu phusu-phusu jiawo. Wakandugile, wajietele dimbo dia Samaliya, wadiluishile. 2 Gungima watumine athu mu dimbo gudi Ahaba fumu ya gu Isalele ha gumuwambela egi: “Bene-Hadada wazuela egi: 3 ‘Utadi waye wa siliva nu wolo waye udi wami, akaji’aye abalega gubonga nu an’aye abalega gubonga adi ami.’” 4 Ahaba wavutuile egi: “Fumu gifua luholo wazuela, ame nu ima yami yagasue tudi ha mago aye.”

5 Gungima athu ene avutugile luko, azuelele egi: “Bene-Hadada wazuela egi: ‘Ngagutumila mbimbi egi udi naye gunguhana utadi waye wa siliva nu wolo waye nu akaji’aye nu an’aye.’ 6 Uvi hamene mu tangua edi, mbangutuma enya mudimo ami gudi aye, mbaakamba muabonga mu inzo yaye nu mu jinzo jia enya mudimo aye, mbaatambula ima yaye yagasue ya ndando mbaaya nayo.’”

7 Fumu wa gu Isalele watamegele akulu agasue a mu gifutshi, waawambelele egi: “Ngabuba, talenu enue hakhenu, muthu yowu udi mutshigina diago gutubatela malamba. Wangutogi akaji’ami nu an’ami nu utadi wami wa siliva nu wolo wami, ngatunyilego.” 8 Akulu agasue nu athu agasue amuwambelele egi: “Umuvuilago, utshiginago.” 9 Ahaba wawambelele athu atumile Bene-Hadada egi: “Wambelenu fumi’ami egi mbangutshita ndaga jiagasue jiatogi muene mu mbala ya thomo, uvi ngajiyilego gutshita ndaga jiatoga muene mu mbala eyi.” Athu ene ayile muwambela Bene-Hadada ndaga yene.

10 Bene-Hadada watumidile Ahaba mbimbi egi: “Gula guasala nga ndambo ya fuphi gu Samaliya ha guzalesa gikata gia koko gia muthu wagasue udi gungulandula, nzambi jinguhane ndola yakola!” 11 Fumu wa gu Isalele wavutudile egi: “Muwambelenu egi: ‘Muthu udi musudiga iluilo ya ita gashigo naye gudihala gifua muthu udi guyikatula.’” 12 Havuile Bene-Hadada mvutu yene, muene nu mafumu ako akhalele munua matombe mu tenta* jiawo. Wawambelele mbala imoshi enya mudimo enji egi: “Dilondenu ha guya gualuisa!” Adilondele ha guya muluisa dimbo.

13 Uvi profete mumoshi wayile gudi Ahaba fumu wa gu Isalele, wamuwambelele egi: “Yehowa wazuela egi: ‘Udi mumona thundu eyi yakoma ya athu? Mangino ngudi guyihana ha mago aye, ngenyi mbawujiya egi ame ngudi Yehowa.’” 14 Ahaba wamuhudile egi: “Mbayikalegewa luholo lutshi?” Muene wamuvutuile egi: “Yehowa wazuela egi: ‘Mbayikalegewa mu njila ya masuta a mavuala anyi ana tuamezewa gudi baguvernere a baprovense.’” Gungima Ahaba wahudile egi: “Nanyi mbawusendesa ita?” Muene wamuvutudile egi: “Aye!”

15 Ahaba watangele masuta agasue a mavuala akhalele mutuamezewa gudi baguvernere a baprovense, akhalele 232; gungima watangele mala agasue a gu Isalele, akhalele 7 000. 16 Azogele mu dimbo mu midi. Mu tangua diene, Bene-Hadada nu mafumu ako 32 akhalele gumukuatesa akhalele munua matombe mu tenta,* matombe ene a akuatele. 17 Tangua masuta a mavuala anyi akhalele mutuamezewa gudi baguvernere a baprovense azogele, Bene-Hadada watumile athu mbala imoshi ha guya mutala. Ajile gumuwambela egi: “Mala azoga gu Samaliya.” 18 Bene-Hadada wazuelele egi: “Gula aji ha gukamba guhuima, akuatenu muze nawo nu monyo, uvi gula aji ha gulua ita, akuatenu nji muze nawo nu monyo.” 19 Uvi tangua masuta a mavuala anyi akhalele mutuamezewa gudi baguvernere a baprovense nu masuta agasue akhalele gualandula azogele mu dimbo, 20 muthu wagasue washiyile mbalagaji wenji. Enya Siliya alengele, enya Isalele a alanduile. Fumu Bene-Hadada wa gu Siliya walengele holu dia gabalu genji nu masuta ako akhalele muwendesa tubalu. 21 Uvi fumu wa gu Isalele wazogele mu dimbo, wayile nu gushiya tubalu nu phusu-phusu jiawo. Wabingile* diago enya Siliya.

22 Gungima profete wajile gudi fumu wa gu Isalele, wamuwambelele egi: “Nda ulondege masuta aye, tangiza nji ndaga udi naye gutshita handaga mu gisendeselo gia givo gidi muza,* fumu wa gu Siliya mbawuza luko guguluisa.”

23 Enya mudimo a fumu wa gu Siliya amuwambelele egi: “Atubingi handaga Nzambi wawo udi Nzambi wa milundu. Uvi gula tuaaluisa ha fundo dishigo nu milundu, mbatudi guabinga. 24 Tala ndaga udi naye gutshita: Katula mafumu agasue mu mafundo awo, uhage baguvernere. 25 Gungima bungisa* masuta gifua anyi wakhalele nawo thomo nu tubalu nu phusu-phusu gifua jinyi wakhalele najio thomo. Tuye tualuise ha fundo dishigo nu milundu, mbatudi guabinga diago.” Bene-Hadada wavuile malongo awo, watshitshile gifua luholo amuwambelele.

26 Mu gisendeselo gia givo,* Bene-Hadada wabungishile masuta a gu Siliya, wayile gu Afeka ha guluisa Isalele. 27 Masuta a gu Isalele adibungishile, azudile nji ima ya gudia, ayile ha guatagana. Tangua masuta a gu Isalele ahagele phundo yawo gutuama diawo, akhalele gifua tumahunji mbadi tua khombo, uvi enya Siliya azalele mu gifutshi giagasue. 28 Gungima muthu wa Nzambi wa giamatshidia wasuenele gudi fumu wa gu Isalele, wamuwambelele egi: “Yehowa wazuela egi: ‘Luholo enya Siliya azuelele egi: “Yehowa udi Nzambi wa milundu, uvi gashigo Nzambi wa mafundo ashigo nu milundu,” ngudi muhana thundu eyi yagasue ha mago aye; ngenyi mbawujiya egi ame ngudi Yehowa.’”

29 Asalele masugu 7 mu phundo jiawo jiakhalele sambua nu sambua. Mu lusugu lua 7, ita yasendesele. Athu a gu Isalele ashiyile masuta a gu Siliya 100 000 mu lusugu lumoshi, anyi akhalele muwenda ha malu. 30 Masuta asalele, alengele, ayile mu dimbo dia Afeka. Uvi gibayi gia dimbo giabuidile masuta 27 000 anyi asalele. Bene-Hadada nji walengele, wanginyile mu dimbo, wadisuegele mu sugu ya mukatshi.

31 Enya mudimo enji amuwambelele egi: “Tuavuile egi mafumu a gu Isalele ana vuila athu khenda.* Tuabuba, tuhane njila tusudige sagi mu mbunda nu ngonji gu muto, tuye gudi fumu wa gu Isalele. Mbala iko wajiya gugubemba nu monyo. 32 Asudigile sagi mu mbunda nu ngonji gu muto, ayile gudi fumu wa gu Isalele, amuwambelele egi: “Muenya mudimo waye Bene-Hadada wazuela egi: ‘Ngabuba, ngubembe nu monyo.’” Muene waavutudile egi: “Yowu genji nu monyo? Bene-Hadada udi phangi’ami.” 33 Athu ene amonele egi mvutu yene yakhalele gijiyishilo giakatuga gudi nzambi, akotelesele nji egi ndaga yazuelele fumu yakatugile diago mu mutshima wenji. Azuelele egi: “Bene-Hadada udi phangi’aye.” Fumu wazuelele egi: “Ndenu mumuzule.” Gungima Bene-Hadada wajile gudi Ahaba, Ahaba wamunginyishile ha phusu-phusu.

34 Bene-Hadada wamuwambelele egi: “Mbanguguvutudila membo tata wami watambudile gudi sh’aye. Wajiya guhaga mazando* gu Damase gifua luholo tata wahagele mazando gu Samaliya.”

Ahaba wamuvutuile egi: “Luholo tuakota naye gikotelo,* ngudi gugubemba ha guya.”

Ngenyi Ahaba wakotele n’enji gikotelo, wamubembele ha guya.

35 Mukatshi dia ana a baprofete* Yehowa wawambelele mun’a profete mumoshi ha guwambela muthu akhalele n’enji egi: “Ngabuba, nguwase.” Uvi muthu muene watunyile gumuwasa. 36 Hene wamuwambelele egi: “Luholo watuna gutumagela mbimbi ya Yehowa, gula tuadikhapha naye, khoshi iza gugushiya.” Tangua muthu muene wayile, khoshi yazogele yamushiya.

37 Gungima wawambelele muthu muko egi: “Ngabuba, nguwase.” Muthu muene wamuwasele, wamunamenesele.

38 Gungima profete muene wayile munengena fumu mu khulo ya njila, waditshuigile mulele gu meso hagula athu amujiyigo. 39 Tangua fumu wakhalele mubalega, profete muene wazuelele mu dijui diakola egi: “Fumu, ame muenya mudimo waye ngakhadi muya ha fundo ita yakhala yakola, suta mumoshi waji nu muthu mumoshi gudi ame, wanguwambela egi: ‘Tala muthu yowu muabonga, gula walenga ngudi muzula monyo waye ha fundo dienji, gula ndo mbawufuta talanta imoshi* ya utadi wa siliva.’ 40 Uvi tangua muenya mudimo waye wakhadi mutshita ndaga jiko, muthu muene walengi.” Fumu wa gu Isalele wamuwambelele egi: “Mbawudi muhanewa ndola, aye hakhaye wadifuisa milonga.” 41 Gungima profete muene wakatudile mbala imoshi mulele gu meso, fumu wa gu Isalele wamujiyile mbala imoshi egi udi profete. 42 Profete muene wazuelele egi: “Yehowa wazuela egi: ‘Luholo wabembi muthu ngazuedi egi udi naye gushiyiwa, aye mbawufua ha fundo dienji.* Athu aye mbaafua ha fundo dia athu enji.’” 43 Fumu wa gu Isalele wavutugile gumbo dienji gu Samaliya; wavuile gikenene, muila wamulebele.