Lutango
23 Gungima Balama wawambelele Balaka egi: “Tunga iwotshielo 7 ha fundo edi, ngushiyile ngombe 7 jia milume nu imeme 7 ya milume. 2 Balaka wakalegele mbala imoshi gifua muazuelele Balama. Gungima Balaka nu Balama azanguile ngombe ya mulume nu gimeme gia mulume, ahanele mulambu ha iwotshielo yagasue. 3 Balama wawambelele Balaka egi: “Aye sala haha hehi nu mulambu waye wa guwotshia, ame ngaya. Mbala iko Yehowa uza muta maga nu ame. Nguza guguwambela ndaga yagasue iza gunguwambela muene.” Balama wayile gu songi ya gamulundu.
4 Gungima Nzambi watele maga nu Balama, Balama wamuwambelele egi: “Ngatungi iwotshielo 7 mu ndonga, ngahanyi nji ngombe ya mulume nu gimeme gia mulume ha iwotshielo yagasue.” 5 Yehowa wawambelele Balama mbimbi jiaguwambela Balaka. Wamuwambelele egi: “Vutuga gudi Balaka, muwambele ndaga ngaguwambela ha guzuela.” 6 Balama wavutugile, wasangele Balaka nu mafumu agasue a gu Moaba a gumagana hehi nu mulambu wenji wa guwotshia. 7 Gungima watele gishima egi:
“Balaka fumu wa gu Moaba wangutamegele sendese gu Alama,
Sendese gu milundu ya gu khanda ya mazogelo a kumbi; wazuelele egi:
‘Iza ungutele ajigulu a Yakoba mukumbu.
Ayi, iza usegulule enya Isalele.’
8 Luholo lutshi ngajiya guta mukumbu gudi athu anyi Nzambi gatelego mukumbu?
Luholo lutshi ngajiya gusegulula athu Yehowa gaseguluilego?
9 Ha ngudi holu dia maseso, ngudi guamona,
Ngudi guamona ha ngudi holu dia tumilundu.
Adi agudikhalela guene ene hakhawo;
Adikhaphumuna ene hakhawo nu ifutshi iko.
10 Nanyi wajiya gutanga ajigulu a Yakoba adi avula gifua fuluguta dia mavu?
Nanyi wajiya gutanga nga giene gitshinyi gimoshi mukatshi dia itshinyi nguana ya enya Isalele?
Ngufue gami gifua muana gufua athu abonga,
Gisugishilo giami gikhale gifua giawo.”
11 Gungima Balaka wawambelele Balama egi: “Itshi wangutshita? Ngagutamega ha guta mbalagaji jiami mukumbu, uvi henyaha aye udi guashimbiga.” 12 Muene wamuvutudile egi: “Ngudi muzuela phamba ndaga jinyi Yehowa wanguwambela ha guzuela.”
13 Balaka wamuwambelele egi: “Ngabuba, iza tuye ha fundo diko hagula wajiya guamona. Ushigo guamona mukut’awo agasue uvi uza mumona phamba ndambo mukatshi diawo; ngutele nawo mukumbu ha fundo diene.” 14 Wamubatele mu dihia dia Sofime gu songi ya Phisega, gungima watungile iwotshielo 7, wahanele ngombe ya mulume nu gimeme gia mulume ha iwotshielo yagasue. 15 Balama wawambelele Balaka egi: “Aye sala haha hehi nu mulambu waye wa guwotshia tangua nguya muta maga nu Nzambi gunu.” 16 Yehowa watele maga nu Balama, wamuwambelele mbimbi jiaguwambela Balaka. Wamuwambelele egi: “Vutuga gudi Balaka, muwambele ndaga ngaguwambela ha guzuela.” 17 Hene Balama wavutugile, wamusangele yowu munengenena hehi nu mulambu wenji wa guwotshia, mafumu a gu Moaba akhalele n’enji. Balaka wamuhudile egi: “Yehowa wazuela egi itshi?” 18 Gungima Balama watele gishima egi:
“Balaka zuga, tegelela.
Oo mun’a Siphola, ngutegelele.
19 Nzambi gashigo muthu ha gumba mambo,
Muene gashigo mun’a muthu ha gusombegesa matangi enji.*
Gula muene wazuela ndaga imoshi, mbagashigo guyitagenesa ba?
Gula wazuela, mbagashigo guyikalagala ba?
20 Tegelela! Ngatamegewe ha gushimbiga;
Henyaha muene waashimbiga, ngajiyilego guyisombegesa.
21 Muene gajiyilego guhana njila egi akalegele wanga ha gutshita ajigulu a Yakoba gubola,
Gajiyilego gubemba egi nga ndaga imoshi ya lamba ibuile enya Isalele.
Yehowa Nzambi wawo udi nawo,
Ene adi gumutumbuisa muavula gifua fumu mukatshi diawo.
22 Nzambi waazolele gu Ejipitu.
Muene udi gifua mbinga jia ngombe yakoma ya mulume mukunda nu ene.
23 Handaga ajiyilego gukalegela wanga ha gutshita ajigulu a Yakoba gubola,
Ajiyilego nji guphonga ha gutshita enya Isalele gubola.
Henyaha ajiya guzuela mukunda nu Yakoba nu enya Isalele egi:
‘Talenu ndaga Nzambi wakalagala!’
24 Wawa athu mbaazuga gifua khoshi,
Ene adi gifua khoshi mbayidizugila hakhayo.
Mbayishigo mubanda uu nu tangua mbayidia shitu yakuatshi,
Uu nu tangua mbayinua mahatshi a shitu jiashiyi ene.”
25 Balaka wawambelele Balama egi: “Gula wajiyilego guata mukumbu, waashimbigago nji.” 26 Balama wavutudile Balaka egi: “Ngaguwambela egi mbangutshita ndaga yagasue mbayizuela Yehowa.”
27 Balaka wawambelele Balama egi: “Ngabuba, iza tuye ha fundo diko. Mbala iko Nzambi wa giamatshidia wajiya gutshigina egi ungutele nawo mukumbu guene.” 28 Balaka wayile nu Balama gu songi ya Pheole, fundo diana monega Yeshimona.* 29 Gungima Balama wawambelele Balaka egi: “Tunga iwotshielo 7 ha fundo edi, ngushiyile ngombe 7 jia milume nu imeme 7 ya milume.” 30 Balaka wakalegele gifua muazuelele Balama, wahanele ngombe ya mulume nu gimeme gia mulume ha iwotshielo yagasue.