Yoshua

10 Fumu Adoni-Zedeke wa gu Yelusalema wavuile egi Yoshua watambula dimbo dia Ayi, wadishiyi. Wakalegela nji dimbo diene ndaga nu fumu yadio gifua luholo luakalegele muene dimbo dia Yeliko nu fumu yadio. Wavuile nji egi enya gu Gibeona adivuile nu Isalele, adi nji mujinga mukatshi diawo. 2 Hene, wavuile woma wavula handaga dimbo dia Gibeona diakhalele diakoma, diakhalele gifua dimbo dia ufumu. Diakhalele diakoma gubalega dimbo dia Ayi, mala agasue a mu dimbo diene akhalele masuta a ngolo. 3 Fumu Adoni-Zedeke wa gu Yelusalema watumile mbimbi gudi fumu Hohama wa gu Hebrone nu gudi fumu Philama wa gu Yalemuta, nu gudi fumu Yafia wa gu Lakishe nu gudi fumu Debile wa gu Eglone egi: 4 “Izenu mungukuatese ha guluisa Gibeona, handaga ayi gudivua nu Yoshua nu enya Isalele.” 5 Hene, mafumu awa thano a enya Amole (fumu wa gu Yelusalema, fumu wa gu Hebrone, fumu wa gu Yalemuta, fumu wa gu Lakishe nu fumu wa gu Eglone) adibungishile hamoshi nu masuta awo, ayile mujieta dimbo dia Gibeona ha gudiluisa.

6 Gungima mala a gu Gibeona atumile mbimbi gudi Yoshua gu phundo ya gu Gilegale egi: “Ubembigo* ahiga aye. Iza muphushi utuhuluise, utukuatese! Mafumu agasue a enya Amole a gu khanda ya milundu adibungisa ha gutuluisa.” 7 Hene Yoshua wakatugile gu Gilegale, wayile nu masuta agasue nu masuta akhalele mujiya gulua ita muabonga.

8 Yehowa wawambelele Yoshua egi: “Waavuilago woma, handaga ngaahanyi ha mago aye. Gushigo nga muthu mumoshi mukatshi diawo mbawumagana gutuama diaye.” 9 Yoshua wakatugile gu Gilegale, wawendele phipha yagasue, wayile gualuisa mu gisagumuisa. 10 Yehowa waabuishile tunga-tunga gutuama dia enya Isalele. Enya Isalele ashiyile athu avula mukatshi diawo gu Gibeona, a alanduile mu njila idi mukanduga gu Bete-Holone, ayile nu guashiya uu nu gu Azeka nu gu Makeda. 11 Hakhalele ene mulenga enya Isalele mubulumuga mu mulundu wa Bete-Holone, Yehowa waanogesele may’a-nzanza akoma mu dilu uu nu gu Azeka, afuile. Athu afuile gu may’a-nzanza akhalele avula gubalega athu anyi enya Isalele ashiyile nu phogo ya khusa.

12 Mu lusugu luene, Yehowa wabingile enya Amole ha meso a enya Isalele. Mu tangua diene, Yoshua wawambelele Yehowa gutuama dia enya Isalele egi:

13 Hene, kumbi diamaganele, ngonda nji yamaganele uu nu tangua enya Isalele avutudile mbalagaji jiawo gubola. Ndaga yene idi ya gusonega mu mukanda wa Jashale. Kumbi diamaganele hakatshi na katshi dia dilu, mu lusugu luene luagasue diashiwugilego mu phushi. 14 Khenji guakhalele galego nu lusugu luko ikhale gutuama nga gungima gifua lusugu lununu, tangua Yehowa wategelele dijui dia muthu; handaga Yehowa wakhalele mulua mukunda nu Isalele.

15 Gungima Yoshua nu enya Isalele agasue avutugile gu phundo ya gu Gilegale.

16 Mu tangua diene, mafumu thano alengele, ayile gudisuega mu wina dia seso gu Makeda. 17 Gungima athu ayile muwambela Yoshua egi amonyi mafumu thano agudisuega mu wina dia seso gu Makeda. 18 Hene Yoshua wazuelele egi: “Hagenu maseso akoma ha mufulo wa wina diene dia seso, muhage athu akhale guatalela. 19 Uvi enue athu ako muasala mumaganago, landulenu mbalagaji jienu, muashiye. Muabembigo hagula angine mu membo awo, handaga Yehowa Nzambi wenu waahanyi ha mago enu.”

20 Yoshua nu enya Isalele ashiyile athu avula mukatshi diawo, a ashiyile mukut’awo agasue, phamba ndambo ya athu anyi alengele mu membo akhalele nu ibayi yakola ene asalele nu monyo. 21 Athu agasue avutugile mu guhuima gudi Yoshua gu phundo ya gu Makeda. Gushigo nga muthu walolele guzuela mbimbi yabola mukunda nu enya Isalele. 22 Gungima Yoshua wazuelele egi: “Katulenu maseso muahagi ha mufulo wa wina dia seso, muzole mafumu thano adi mukatshi, muze nawo gudi ame.” 23 Azolele mafumu awa thano mu wina dia seso: fumu wa gu Yelusalema, fumu wa gu Hebrone, nu fumu wa gu Yalemuta, nu fumu wa gu Lakishe nu fumu wa gu Eglone. Ayile nawo gudi muene. 24 Tangua ayile nu mafumu ene agasue gudi Yoshua, Yoshua watamegele mala agasue a gu Isalele, wawambelele mafumu a masuta ayile n’enji gu ita egi: “Suenenu. Hagenu ikanzo yenu gungima dia shingo jia mafumu awa.” Asuenele, ahagele ikanzo yawo gungima dia shingo jia mafumu ene. 25 Yoshua waawambelele egi: “Muvuigo woma, mubuigo tunga-tunga. Khalenu nu gikhesa nu ngolo, handaga yene ndaga Yehowa mbawukalagala mbalagaji jienu jiagasue mudi muluisa.”

26 Gungima Yoshua waashiyile, waakudigile gu mitshi* thano, waabembele gu mitshi yene uu nu mu ngueze. 27 Hashiwugile tangua, Yoshua wawambelele athu egi a akatule gu mitshi, a abishile mu wina dia seso dinyi adisuegele. Gungima ahagele maseso akoma ha mufulo wa wina dia seso diene, maseso ene ana khala guene uu nu mangino.

28 Mu lusugu luene, Yoshua watambudile dimbo dia Makeda, wadishiyile nu phogo ya khusa. Washiyile fumi’a dimbo diene nu athu enji agasue. Gushigo nga nu muthu wasalele nu monyo. Wakalegele fumu wa gu Makeda gifua muakalegele muene fumu wa gu Yeliko.

29 Gungima Yoshua nu enya Isalele agasue akatugile gu Makeda, ayile gu Libena, aluishile dimbo diene. 30 Yehowa wahanele nji dimbo diene nu fumu yadio ha mago a enya Isalele, ashiyile dimbo diene nu athu agasue nu phogo ya khusa. Nga muthu mumoshi gasalelego nu monyo. Akalegele fumu wa dimbo diene gifua luholo akalegele fumu wa gu Yeliko.

31 Gungima Yoshua nu enya Isalele agasue akatugile gu Libena, ayile gu Lakishe. Ahagele phundo yawo guene, aluishile dimbo diene. 32 Yehowa wahanele Lakishe ha mago a enya Isalele, atambudile dimbo diene mu lusugu lua mbadi. Adishiyile nu athu agasue* akhalele mukatshi nu phogo ya khusa, gifua luholo akalegele dimbo dia Libena.

33 Gungima Holama, fumu wa gu Gezele, wayile mukuatesa Lakishe, uvi Yoshua wamushiyile nu athu enji. Guasalelego nga muthu mumoshi nu monyo.

34 Gungima Yoshua nu enya Isalele agasue akatugile gu Lakishe, ayile gu Eglone. Ahagele phundo yawo guene, aluishile dimbo diene. 35 Atambudile dimbo diene mu lusugu luene, adishiyile nu phogo ya khusa. Mu lusugu luene, ashiyile athu agasue akhalele mu dimbo diene gifua luholo akalegele gu Lakishe.

36 Gungima Yoshua nu enya Isalele agasue akatugile gu Eglone, ayile gu Hebrone, aluishile dimbo diene. 37 Atambudile dimbo diene, adishiyile, ashiyile nji fumu yadio nu membo agasue akhalele hehi nu athu agasue akhalele mukatshi nu phogo ya khusa. Nga muthu mumoshi gasalelego nu monyo. Yoshua washiyile dimbo diene nu athu agasue akhalele mukatshi gifua luholo luakalegele muene gu Eglone.

38 Gungima Yoshua nu enya Isalele agasue ayile gu Debile, aluishile dimbo diene. 39 Watambudile dimbo diene, wadishiyile nu fumu yadio nu membo agasue akhalele hehi nu athu agasue akhalele mukatshi nu phogo ya khusa. Nga muthu mumoshi gasalelego nu monyo. Wakalegele dimbo dia Debile nu fumu yadio gifua luholo luakalegele muene dimbo dia Hebrone nu dimbo dia Libena nu fumu yadio.

40 Yoshua watambudile mavu agasue a gu khanda ya milundu nu Negebe nu Shefela, nu mavu a gu khanda ya mbongo ya milundu. Washiyile mafumu awo agasue, nga muthu mumoshi gasalelego nu monyo. Washiyile ima yagasue yakhalele nu monyo gifua luholo Yehowa Nzambi wa Isalele wazuelele. 41 Yoshua watambudile mavu sendese gu Kadeshe-Barnea uu nu gu Gaza nu mavu agasue a Goshene uu nu gu Gibeona. 42 Yoshua wabingile mafumu ene agasue nu mavu awo mu tangua diene dimoshi, handaga Yehowa Nzambi wa Isalele wakhalele mulua mukunda nu Isalele. 43 Gungima Yoshua nu enya Isalele agasue avutugile gu phundo gu Gilegale.