Mukanda wa Mbadi wa Gudilanduluila
13 Mu givo gia 18 gia uhinyinyi wa fumu Yeloboama, Abiya wabuile fumu gu Yuda. 2 Wahinyine ivo thathu gu Yelusalema. Jina dia gin’enji diakhalele Mikaya mun’a Uliele wa gu Gibea. Abiya nu Yeloboama akhalele nji gudiluisa.
3 Abiya wayile gu ita nu masuta a ngolo 400 000 anyi alongugile* gulua ita. Yeloboama nji walondele masuta 800 000 ha guya mulua nu Abiya, akhalele masuta a ngolo anyi alongugile* ha gulua ita. 4 Abiya wamagenele gu Mulundu wa Semalayime udi gu khanda ya milundu ya Efrayime. Wazuelele egi: “Oo Yeloboama nu enya Isalele agasue, ngutegelelenu! 5 Enue mushigo mujiya egi Yehowa Nzambi wa Isalele wahanele Davidi nu an’enji ufumu gu Isalele mayilago, mu njila ya gikotelo gia mungua ba?* 6 Uvi Yeloboama mun’a Nebate, muenya mudimo wa Salomo mun’a Davidi, walumbugidile fumu wenji. 7 Athu a githuhu, athu aheya, ayile gu khanda yenji. Alumbugidile Roboama mun’a Salomo munu wakhalele muvuala, nu wakhalele muvua woma. Roboama gakhalelego nji nu luholo lua gumagana gutuama diawo muene hakhenji.
8 “Henyaha enue mudi mutangiza egi muajiya guluisa ufumu wa Yehowa udi ha mago a ana a Davidi handaga mudi athu avula nu mudi nu isongo ya wolo ya ana a ngombe yamilondele Yeloboama gifua nzambi ba? 9 Enue muakayele nganga-nzambi jia Yehowa, ajigulu a Alona nu enya Levi, muatombele nganga-nzambi jienu hakhenu gifua muana tshita athu a mu ifutshi iko. Muthu wagasue munu wakhalele muza* nu mutumba wa ngombe ya mulume nu imeme 7 ya milume, muakhalele gumubuisa nganga-nzambi wa nzambi jia mambo. 10 Uvi esue Nzambi wetu udi Yehowa, tuamubembelego; nganga-nzambi jietu, ajigulu a Alona, ana kalegela Yehowa mudimo, enya Levi ana guakuatesa nji mu mudimo wene. 11 Ana hana milambu ya guwotshia idi mukanduisa mishi gudi Yehowa nu uhafu wa vumba diabonga gimenegena nu ngueze. Ana haga nji mapha* mu thundu holu dia mesa a wolo wabonga. Ngueze yagasue ana lemesa gihagelo gia mienda gia wolo nu mienda yenji, handaga tuana tagenesa ginemo gietu mukunda nu Yehowa Nzambi wetu. Uvi enue muamutunyile gale genu. 12 Henyaha tegelelenu! Nzambi wa giamatshidia udi nu esue, muene udi gututuameza; nganga-nzambi jienji jidi haha ha gushiga phungi hagula tumiluise. Oo mala a gu Isalele, muluishigo Yehowa Nzambi wa akhakh’enu handaga mbamushigo mubinga.
13 Uvi Yeloboama watumile masuta ha gubandemena enya Yuda hagula a aluise gungima; ngenyi masuta akhalele ako gutuama dia enya Yuda, ako mubandemena gungima diawo. 14 Tangua mala a gu Yuda abalumugile, amonele egi akhalele naye gulua gutuama nu gungima. Hene, asendesele gudidila Yehowa hagula a akuatese; mu tangua diene, nganga-nzambi jiakhalele mushiga phungi mu dijui diakola. 15 Mala a gu Yuda ambile milolo ya ita. Hambile ene milolo ya ita, Nzambi wa giamatshidia wakuatesele Abiya nu enya Yuda ha gubinga Yeloboama nu enya Isalele agasue. 16 Enya Isalele alengele gutuama dia enya Yuda, Nzambi waahanele ha mago a enya Yuda. 17 Abiya nu masuta enji ashiyile masuta a enya Isalele avula; masuta ashiyiwe akhalele 500 000, mukut’awo agasue akhalele mujiya* gulua ita. 18 Mala a gu Isalele avuishiwe musonyi mu tangua diene, uvi mala a gu Yuda abingile handaga ashile mutshima* gudi Yehowa Nzambi wa akhakh’awo. 19 Abiya walanduile Yeloboama, wamutambudile nji membo awa: Betele nu membo enji a hehi, Yeshana nu membo enji a hehi nu Efalayine nu membo enji a hehi. 20 Yeloboama gakhalelego luko nu ngolo gifua ha thomo hakhalele Abiya muhinyina; gungima Yehowa wamuhanele ndola, wafuile.
21 Uvi Abiya wabuile nu ngolo jiavula. Gungima wazudile akhetu 14 mu ulo, wavualele ana a mala 22 nu a akhetu 16. 22 Ndaga jiko jiaditadila Abiya nu ima iko yatshitshile muene, nu ndaga jiazuelele muene, jidi jia gusonega* mu mukanda wa profete Ido.