Mukanda wa Mbadi wa Gudilanduluila
25 Amazia wakhalele nu ivo 25 habuile muene fumu, wahinyine ivo 29 gu Yelusalema. Jina dia gin’enji diakhalele Yehodane muenya gu Yelusalema. 2 Amazia wakhalele mukalagala ndaga jiabonga gu meso a Yehowa, uvi gajitshitshilego nu mutshima wenji wagasue. 3 Tangua Amazia wakolesele ufumu wenji, washiyile enya mudimo enji anyi ashiyile sh’enji. 4 Uvi gashiyilego an’awo, ha gutumagela ndaga jidi jia gusonega mu mukanda wa mikhuala wa Moize, mu mukanda wene Yehowa wazuelele egi: “Atata ashigo naye gufua mukunda nu an’awo, ana nji ashigo naye gufua mukunda nu ash’awo; muthu nu muthu udi naye gufua mukunda nu gubola guenji.”
5 Amazia wabungishile enya Yuda, waahagele gifua muakhalele fami jia mu giphuta giawo mu utuameji wa mafumu a athu 1 000 nu wa mafumu a athu 100. Watshitshile ngenyi mukunda nu enya Yuda agasue nu enya giphuta gia Benjame. Wasonegele majina a athu akhalele nu ivo sendese 20 nu holu. Athu akhalele mujiya gulua* ita anyi akhalele atagana ha gutshita mudimo wa gisuta, akhalele 300 000. Akhalele mujiya gukalegela mulumbu nu tshibu yakoma. 6 Amazia waluwile masuta a ngolo 100 000 a gu Isalele, waahanele batalanta* a utadi wa siliva 100. 7 Uvi muthu mumoshi wa Nzambi wa giamatshidia wajile gumumona, wamuwambelele egi: “Oo fumu, uyigo nu masuta a gu Isalele handaga Yehowa gashigo nu Isalele, gashigo nji nga nu muthu mumoshi wa mu giphuta gia Efrayime. 8 Nda hakhaye gu ita, khala nu gikhesa, uvi gula waya nawo, Nzambi wa giamatshidia mbawugubuisa gutuama dia mbalagaji jiaye, handaga Nzambi udi nu ngolo jia gugukuatesa nga jia gugubuisa.” 9 Hene Amazia wahudile muthu wa Nzambi wa giamatshidia egi: “Na itshi ngutshita mukunda nu batalanta 100 ngahanele masuta a gu Isalele?” Muthu wa Nzambi wa giamatshidia wamuvutudile egi: “Yehowa udi nu ngolo jia guguhana ima yavula gubalega inyi wahanyi.” 10 Hene Amazia wawambelele masuta a gu Efrayime anyi ajile gudi muene ha guvutuga gumbo diawo, uvi ene avuidile enya Yuda khabu jiakola. Avutugile gumbo diawo nu khabu jiabala.
11 Gungima Amazia wahetele gikhesa, wayile nu masuta enji mu Baba dia Mungua, washiyile mala 10 000 a gu Seyile. 12 Mala a enya Yuda akuatele nji athu 10 000 nu monyo. Hene ayile nawo holu dia seso diakoma, a alutuile hashi, mukhut’awo agasue abogogele itshinyi-itshinyi. 13 Uvi masuta anyi Amazia wawambelele ha guvutuga gumbo diawo hagula amutuadigo gu ita, ayile muluisa membo a gu Yuda, sendese gu Samaliya uu nu gu Bete-Holone; ashiyile athu 3 000, atambudile nji ima yavula.
14 Hashiyile Amazia enya gu Edome, wavutugile, uvi wazudile nzambi jia isongo jia enya gu Seyile wayile najio, wajibuishile nzambi jienji. Wasendesele gufugama gutuama dia isongo yene, wahanele nji milambu hagula izole mishi mukunda nu isongo yene. 15 Hene Yehowa wavuidile Amazia khabu jiakola, wamutumile profete ha guya gumuwambela egi: “Mukunda natshi udi mukombelela nzambi jia athu awa, jinyi jiahuluishilego athu awo ha mago aye?” 16 Hakhalele muzuela profete, fumu wamuwambelele egi: “Esue tuagutombi ha gukhala muhanyi wa malongo wa fumu? Hena, gula ndo tudi gugushiya!” Hene profete wahenele genji tedie, uvi gungima wazuelele luko egi: “Ngudi mujiya egi Nzambi wazudi desizio dia gugushiya mukunda nu ndaga eyi watshitshi nu luholo watuna gutegelela longo ngaguhana.”
17 Fumu Amazia wa gu Yuda watele maga nu athu akhalele gumuhana malongo, gungima watumile athu ha guya muwambela Yoase mun’a Yoahaza mujigulu wa Yehu fumu wa gu Isalele egi: “Iza tulue ita.”* 18 Fumu Yoase wa gu Isalele watumidile Fumu Amazia wa gu Yuda mbimbi egi: “Mutshi wa miya wa gu Libane watumidile mutshi wa sedre wa gu Libane mbimbi egi: ‘Hana mun’aye wa mukhetu mu ulo gudi mun’ami wa yala.’ Uvi shitu ya mu foto ya gu Libane yabalegele yadiatele mutshi wa miya. 19 Aye wazuedi egi: ‘Tala! Ngabinga* enya Edome.’ Wabua nu lulendo udi mutshigina egi a gutumbuise, uvi khala gumbo diaye.* Mukunda natshi udi gudikambela lamba nu gubua guaye nu udi munginyisa nji enya Yuda mu mulonga wene?”
20 Uvi Amazia watunyile gumutegelela, handaga Nzambi wa giamatshidia watshiginyile egi ndaga jikalegewe ngenyi ha guahana ha mago a mbalagaji wawo, handaga ene akombelele nzambi jia enya Edome. 21 Fumu Yoase wa gu Isalele wayile mulua ita nu Fumu Amazia wa gu Yuda gu Bete-Shemeshe mu mavu a enya Yuda. 22 Masuta a gu Isalele abingile enya Yuda, hene masuta a enya Yuda alengele muthu nu muthu wayile gumbo dienji.* 23 Fumu Yoase wa gu Isalele wakuatele Fumu Amazia wa gu Yuda mun’a Yoase, mujigulu wa Yoahaza* gu Bete-Shemeshe; gungima wayile n’enji gu Yelusalema. Yoase wabudile gibayi gia Yelusalema sendese gu Mufulo wa Efrayime uu nu gu Mufulo wa Khomo, hulu diene diakhalele dia bakude 400.* 24 Muene wazudile wolo wagasue nu utadi wa siliva nu ima yagasue yakhalele mutalela Obede-Edome mu inzo ya Nzambi wa giamatshidia, nu inyi yakhalele mu sugu akhalele mubamba ima ya ndando mu inzo ya fumu, nu athu akuatele muene gu ita. Gungima wavutugile gu Samaliya.
25 Gungima dia gufua gua Yoase mun’a Yoahaza fumu wa gu Isalele, Amazia mun’a Yoase fumu wa gu Yuda wasalele luko nu monyo ivo 15. 26 Ndaga jiko jiakalegele Amazia sendese gu gisendeselo uu nu gu suga, jidi jia gusonega mu Mukanda wa Mafumu a gu Yuda nu a gu Isalele. 27 Athu ako a gu Yelusalema asendesele guyila Amazia giphungi sendese tangua diabembele muene gulandula Yehowa. Hene walengele, wayile gu Lakishe, uvi atumile athu ha gumulandula gu Lakishe, amushiyile guene. 28 Amubatele holu dia tubalu, avutugile n’enji, amufundjile nu akhakh’enji mu dimbo dimoshi dia gu Yuda.