Mukanda wa Mbadi wa Gudilanduluila
28 Ahaza wakhalele nu ivo 20 tangua diabuile muene fumu, wahinyine ivo 16 gu Yelusalema. Gakalegelego ndaga jiabonga gu meso a Yehowa, galanduilego gifezegeselo gia khakh’enji Davidi. 2 Uvi walanduile makalegelo abola a mafumu a gu Isalele. Walondele nji isongo ya utadi ya nzambi jia Bale. 3 Wahanele nji milambu ha gukanduisa mishi mu Baba dia Mun’a Hinoma,* wakondele nji an’enji a mala ha tshuya. Walanduile makalegelo abola a enya ifutshi inyi Yehowa wakayele gutuama dia enya Isalele. 4 Wakhalele muhana milambu nu gukanduisa mishi ya milambu yene mu mafundo a gukombelela,* nu mu tumilundu, nu ha mishina mitshi yagasue yakoma yakhalele nu mayiji avula.
5 Gishina giene, Yehowa Nzambi wenji wamuhanele ha mago a fumu wa gu Siliya, hene amubingile, akuatele athu avula ayile nawo gu Damase. Nzambi wamuhanele nji ha mago a fumu wa gu Isalele, muene nji wamubingile, washiyile athu enji avula. 6 Pheka mun’a Lemaliya washiyile athu 120 000 gu Yuda mu lusugu lumoshi, mukut’awo agasue akhalele mala a ngolo. Waashiyile handaga atunyile Yehowa Nzambi wa akhakh’awo. 7 Zikri, suta dia mu giphuta gia Efrayime washiyile Maseya mun’a fumu, nu Azelikame munu wakhalele mutalela inzo ya fumu, nu Elkana muthu wa mbadi gungima dia fumu. 8 Enya Isalele akuatele nji aphangi’awo 200 000, akhetu, nu ana a mala, nu ana a akhetu; atambudile nji ima yavula, ayile nayo gu Samaliya.
9 Uvi profete wa Yehowa mumoshi jina dienji Odede wakhalele guene. Wayile gutuama dia masuta anyi ajile gu Samaliya, waawambelele egi: “Tegelelenu! Yehowa Nzambi wa akhakh’enu wahanyi enya Yuda ha mago enu handaga waavuila khabu, enue muaashiyi nu khuta yagasue. Nzambi hakhenji wadimonela ndaga yene. 10 Henyaha, mudi mutshigina egi enya Yuda nu enya gu Yelusalema abue enya mudimo enu a mala nu a akhetu. Mudi mutangiza egi enue mushigo nu gubola gu meso a Yehowa Nzambi wenu ba? 11 Henyaha ngutegelelenu, vutulenu athu muakuatshi mukatshi dia aphangi’enu, handaga Yehowa wamivuila khabu jiakola.”
12 Hene mafumu ako a mu giphuta gia Efrayime, Azariya mun’a Yohanana, nu Belekiya mun’a Meshilemota, nu Yehizekiya mun’a Shaluma, nu Amasa mun’a Hadalayi, ayile mutagana nu masuta akatugile gu ita, atunyile ndaga masuta ene atshitshile, 13 a awambelele egi: “Mujigo nu athu muakuatshi gu ita, gula ndo tubua mu gubola gu meso a Yehowa. Gubola guetu gudi gale guakoma, Nzambi nji wavuila gale enya Isalele khabu. Ndaga mudi mutshigina gutshita iza gutulezela gubola guko.” 14 Hene, masuta azudile athu akuatele ene nu ima yatambudile ene gu ita, ayihanele gudi mafumu nu gudi athu agasue adibungishile. 15 Gungima athu anyi atangewe majina azudile athu akuatewe gu ita, azudile nji milele mukatshi dia ima yatambudiwe gu ita mukunda nu athu agasue anyi akhalele thowa mukatshi diawo. A ahanele milele yene ha gusudiga nu jisaphata nu ima ya gudia nu ya gunua, nu maji ha gudikunga. Abatele nji athu akhalele a guleba holu dia phunda, ayile nawo gudi aphangi’awo gu Yeliko, dimbo dia samba. Gungima avutugile gu Samaliya.
16 Mu tangua diene, Fumu Ahaza watogele ukuateshi gudi mafumu a gu Asiliya. 17 Enya Edome ajile luko muluisa enya Yuda; anginyile mu mavu awo gu ngolo, akuatele athu, ayile nawo. 18 Enya Filistiya ayile nji muluisa membo a gu Shefela nu Negebe mu mavu a Yuda, atambudile Bete-Shemeshe, nu Ayalona nu Gedelote nu Soko nu membo enji a hehi, nu Timena nu membo enji a hehi, nu Gimezo nu membo enji a hehi. Gungima asendesele gukhala guene. 19 Yehowa wavuishile enya Yuda musonyi mukunda nu Fumu Ahaza wa gu Isalele,* handaga Ahaza wabembele enya Yuda ha gulandula gutshita ndaga jiabola, jinyi jiaatumile ha gulumbugila luko Yehowa muavula.
20 Gungima Fumu Tilagate-pilenesele wa gu Asiliya wajile gumuluisa; ha fundo dia gumukuatesa, wamubatele malamba. 21 Ahaza wazudile ima yagasue yakhalele mu inzo ya Yehowa, nu mu inzo ya fumu, nu mu jinzo jia manene, wahanele kado gudi fumu wa gu Asiliya. Ikhale ngenyi gahetelego nga ukuateshi umoshi. 22 Mu tangua diene dia lamba, Fumu Ahaza wakalegele luko ndaga jiavula jiabola, gakhalelego ya gujinginyina gudi Yehowa. 23 Wasendesele guhana milambu gudi nzambi jia gu Damase jinyi jiamubingile, wakhalele muzuela egi: “ Luholo nzambi jia mafumu a gu Siliya jidi guakuatesa, ame nji nguza muhana nzambi jiene milambu hagula jingukuatese.” Uvi nzambi jiene jiamubatele malamba, jiabatelele nji enya Isalele agasue malamba. 24 Ahaza wabungishile nji ikadigilo ya mu inzo ya Nzambi wa giamatshidia, gungima wayibatuile itshinyi-itshinyi; wakangele mifulo ya inzo ya Yehowa, walondele iwotshielo yenji hakhenji mu phambu jiagasue jia mabala-bala* a gu Yelusalema. 25 Walondele mafundo a gukombelela mu membo agasue a gu Yuda ha guhana milambu* gudi nzambi jiko. Wahanele Yehowa Nzambi wa akhakh’enji khabu.
26 Ndaga jiko jiakalegele Ahaza nu ima yagasue yatshitshile muene sendese gu gisendeselo uu nu gu suga, jidi jia gusonega mu Mukanda wa Mafumu a gu Yuda nu a gu Isalele. 27 Gungima Ahaza wafuile gifua muafuile akhakh’enji, amufundjile mu dimbo dia Yelusalema. Uvi amufundjilego mu malumba a mafumu a gu Isalele. Mun’enji Ezekiase wabuile fumu ha fundo dienji.