Yoshua
2 Hakhalele ene gu Shitime, Yoshua mun’a Nune watumile mala mbadi mu mafumbe ha guya mutala gifutshi mu gisuegi. Waawambelele egi: “Ndenu mutale gifutshi nu dimbo dia Yeliko.” Ayile, ahetele gu inzo ya mukhetu mumoshi wa thambi, jina dienji Rahabe; akhalele guene. 2 Athu ayile muwambela fumu wa gu Yeliko egi: “Tala! Mala a gu Isalele aji haha mu phipha ha gutala gifutshi mu gisuegi.” 3 Hene fumu wa gu Yeliko watumile athu ha guwambela Rahabe egi: “Zola athu aji haha, anyi adi gumbo diaye handaga aji mutala gifutshi giagasue mu gisuegi.”
4 Uvi mukhetu muene wasuegele mala ene mbadi. Wazuelele egi: “Ayi mala ene aji gumbo diami, uvi ngushigo mujiya gula akatuga gui. 5 Ayi gawo mu phipha tangua mufulo wa dimbo watshigina gukangewa. Ngushigo mujiya fundo ayi, uvi gula muaahata muphushi, mudi guakuata.” 6 (Uvi muene waanginyishile holu dia yangi, waasuegele mukatshi dia tumitshi tua linene tuakhalele tuaguhaga mu ndonga guene.) 7 Athu ene ahatele mala ene gu khanda ya Muta wa Yordane, mu mafundo ana zawuga ha malu. Hazogele athu akhalele gualandula, mufulo wa dimbo wakangewe.
8 Gutuama egi mala ene abande, mukhetu muene wanginyile holu dia yangi, fundo akhalele. 9 Waawambelele egi: “Ngudi mujiya egi Yehowa mbawumihana gifutshi, mukut’etu agasue tudi gumivuila woma wavula. Athu agasue a mu gifutshi aleba muila mukunda nu enue, 10 handaga tuavuile luholo Yehowa wamiginyishile meya a Kianga Giabenga gutuama dienu tangua muazogele gu Ejipitu, nu ndaga muakalegele mafumu mbadi a enya Amole, Sihona nu Oga, anyi muashiyile ha sambua diko* dia Yordane. 11 Tangua tuavuile ndaga yene, tuavuile woma wavula, muila watulebele mukunda nu enue handaga Yehowa Nzambi wenu muene udi Nzambi mu dilu nu ha mavu. 12 Henyaha ngabuba, dilogenu mu jina dia Yehowa gutuama diami egi luholo ngamimonesela guzumba gua giamatshidia, enue nji mbamumonesela enya inzo ya tata wami guzumba gua giamatshidia; mudi naye nji gunguhana gijiyishilo gidi mumonesa egi mbamutagenesa mbimbi jienu.* 13 Mudi naye guhuluisa tata wami nu mama nu aphangi’ami a mala nu a akhetu nu athu awo agasue; mudi naye gutuhuluisa* hagula tufuigo.”
14 Mala ene amuwambelele egi: “Mbatuhana mionyo yetu mukunda nu enue!* Gula wawambelelego nga muthu ndaga tuajila, esue mbatugumonesela guzumba gua giamatshidia nu mbatutagenesa ndaga tuagulayi tangua Yehowa mbawutuhana gifutshi.” 15 Gungima waabulumuishile nu shinga ha fenetre, handaga inzo yenji yakhalele hehi nu gibayi gia dimbo. Inzo ya mukhetu muene yakhalele holu dia gibayi gia dimbo. 16 Gungima waawambelele egi: “Ndenu gu khanda ya milundu, disuegenu guene masugu thathu hagula athu adi gumihata amimonyigo. Gula athu ene avutuga, muajiya giwa guya.”
17 Mala ene amuwambelele egi: “Mbatutagenesa ndaga watutogi ha gudiloga 18 gula wakalagala ndaga eji: Tangua mbatungina mu gifutshi, udi naye gujitshiga shinga eyi yabenga ha fenetre udi gutubulumuishila. Udi naye gutamega sh’aye nu gin’aye nu aphangi’aye nu fami ya sh’aye ha gudibungisa gumbo diaye. 19 Uvi gula muthu wazoga ha mufulo wa inzo yaye, mahatshi enji mbaakhala holu dia muto wenji, esue mbatushigo mukhala nu gubola. Uvi gula ndaga yabola yabuila muthu wagasue mbawukhala nu aye mu inzo, mahatshi enji mbaakhala ha mito yetu. 20 Uvi gula wawambela athu ndaga tuajila, mbatushigo munemesa ndaga watutogi ha gudiloga.” 21 Mukhetu muene waavutudile egi: “Ayi, ngavua.”
Waazolele, ayile gawo. Gungima wajitshigile shinga yabenga ha fenetre. 22 Mala ene akatugile, ayile gu khanda ya milundu, akhalele guene masugu thathu uu nu tangua athu akhalele gualandula avutugile. Athu ene a akambele mu njila jiagasue, uvi a amonelego. 23 Mala ene mbadi akatugile gu khanda ya milundu, abulumugile; azawugile muta, ayile gudi Yoshua mun’a Nune. Amuwambelele ndaga jiagasue jiaabuidile. 24 Gungima awambelele Yoshua egi: “Yehowa wahana gifutshi giagasue ha mago etu. Athu agasue a mu gifutshi giene muila waaleba mukunda nu esue.”