Yoshua

6 Mu tangua diene, mifulo ya dimbo dia Yeliko yakhalele ya gukanga muabonga diago mukunda nu enya Isalele; guakhalelego nga nu muthu wakhalele mungina nga guzoga.

2 Gungima Yehowa wawambelele Yoshua egi: “Tala, ngahana Yeliko nu fumi’enji nu masuta enji a ngolo ha mago aye. 3 Enue masuta, mukut’enu agasue mudi naye guwenda mu khulo ya dimbo, mudi naye gudijieta mbala imoshi. Mbamutshita ngenyi masugu 6. 4 Nganga-nzambi 7 jidi naye gubata phungi* 7 gutuama dia Mushete. Uvi mu lusugu lua 7, mudi naye gujieta dimbo mbala 7; nganga-nzambi mbajikhala mushiga phungi. 5 Tangua mbaashiga phungi, gula muavua matululu a phungi,* athu agasue mbaamba milolo yakola ya ita. Ngenyi ibayi ya dimbo mbayimuangana, masuta mbaangina mu dimbo muthu nu muthu gutuama dienji.”

6 Hene Yoshua mun’a Nune wabungishile nganga-nzambi, waawambelele egi: “Zulenu mushete wa gikotelo, nganga-nzambi 7 jidi naye gubata phungi 7 gutuama dia Mushete wa Yehowa.” 7 Gungima wawambelele athu egi: “Ndenu muwende mu khulo ya dimbo. Masuta adi nu iluilo abalege gutuama dia Mushete wa Yehowa.” 8 Gifua luholo Yoshua wawambelele athu, nganga-nzambi 7 jiakhalele mubata phungi 7 gutuama dia Yehowa jiabalegele gutuama, jiashigile phungi. Mushete wa gikotelo wa Yehowa wakhalele gualandula gungima. 9 Masuta akhalele nu iluilo ya ita abalegele gutuama dia nganga-nzambi jiakhalele mushiga phungi, masuta ako akhalele mulandula Mushete wa Gikotelo gungima. Nganga-nzambi jiakhalele mulandula gushiga phungi.

10 Yoshua wawambelele athu egi: “Mumbigo milolo, majui enu nji avuiwago. Muzuedigo nga gima gimoshi uu nu lusugu mbangumiwambela egi: ‘Mbenu milolo!’ Mumbi giwa milolo.” 11 Awendele nu Mushete wa Yehowa mu khulo ya dimbo, ajietele dimbo mbala imoshi; gungima avutugile mu phundo ha gubanda.

12 Mu lusugu lualanduile, Yoshua wazugile nu gimenegena giagasue, nganga-nzambi jiazudile Mushete wa Yehowa. 13 Nganga-nzambi 7 jinyi jiakhalele nu phungi 7 jiakhalele muwenda gutuama dia Mushete wa Yehowa, jiakhalele mulandula gushiga phungi. Masuta akhalele nu iluilo ya ita akhalele muwenda gutuama diawo, uvi masuta ako akhalele mulandula Mushete wa Yehowa gungima; mu tangua diene, nganga-nzambi jiakhalele mulandula gushiga phungi. 14 Mu lusugu lua mbadi, ajietele nji dimbo mbala imoshi, gungima avutugile mu phundo. Atshitshile ngenyi masugu 6.

15 Mu lusugu lua 7 hatshiele guma, ajietele dimbo luholo lumoshi luene mbala 7. Yakhalele phamba mu lusugu luene ajietele dimbo mbala 7. 16 Mu mbala ya 7, nganga-nzambi jiashigile phungi, Yoshua wawambelele athu egi: “Mbenu milolo handaga Yehowa wamihana dimbo! 17 Shiyenu dimbo nu ima yagasue idi mukatshi; ima yagasue idi ya Yehowa. Phamba Rahabe, mukhetu wa thambi, udi naye gusala nu monyo nu athu agasue adi mu inzo yenji, handaga wasuegele athu tuatumine ha gutala dimbo mu gisuegi. 18 Mukuatshigo nga gima gimoshi gidi naye gushiyiwa, hagula muvuigo nzala ya gima giene ha gugizula. Gula ndo, mbamubatela phundo ya enya Isalele malamba, mbayibua gima gidi naye gushiyiwa. 19 Uvi utadi wa siliva wagasue nu wolo nu ima yalondewe nu kuivre nu utadi udi wa gijila mukunda nu Yehowa. Ima yene idi naye guya ha fundo ana bamba ima ya ndando mukunda nu inzo ya Yehowa.”

20 Gungima tangua nganga-nzambi jiashigile phungi, athu ambile milolo. Tangua athu avuile matululu a phungi, ambile mbala imoshi milolo yakola ya ita, ibayi yamuanganele. Gungima athu anginyile mu dimbo, muthu wagasue gutuama dienji, atambudile dimbo. 21 Ashiyile athu agasue nu ima yagasue yakhalele mu dimbo diene nu phogo ya khusa, nu mala nu akhetu nu mavuala nu athu a gukola nu ngombe nu imeme nu phunda.

22 Yoshua wawambelele mala mbadi ayile mutala dimbo mu gisuegi egi: “Ndenu mu inzo ya mukhetu wa thambi mumuzole nu athu enji agasue gifua luholo muadilogele gutuama dienji.” 23 Mavuala ene ayile, azolele Rahabe nu sh’enji nu gin’enji nu aphangi’enji a mala nu athu enji agasue. Yadiago, azolele fami yenji yagasue, a abatele muabonga ha fundo dimoshi gonze ya phundo ya enya Isalele.

24 Akondele dimbo diene tshuya nu ima yagasue yakhalele mukatshi. Uvi utadi wa siliva nu wolo nu ima yalondewe nu kuivre nu utadi, ayihagele ha fundo ana bamba ima ya ndando mukunda nu inzo ya Yehowa. 25 Yoshua wahuluishile phamba Rahabe, mukhetu wa thambi, nu fami ya sh’enji nu athu enji agasue; yowu wana khala gu Isalele uu nu mangino handaga wasuegele mala anyi Yoshua watumile ha guya mutala dimbo dia Yeliko mu gisuegi.

26 Mu tangua diene Yoshua wadilogele egi:* “Muthu mbawukamba gutunga luko dimbo dia Yeliko atewe mukumbu gutuama dia Yehowa. Tangua mbaditunga muene fondasio jia dimbo, mun’enji wa somi mbawufua; tangua mbadimba muene mifulo ya dimbo, mun’enji wa gasala-songi mbawufua.”

27 Yehowa wakhalele nu Yoshua, lukuma luenji luamuanganele ha mavu agasue.