Mukanda wa Thomo wa Gudilanduluila
26 Wawa mahunji a athu akhalele mutadila mifulo: mu vumo dia Kora, Meshelemiya mun’a Kore mujigulu wa Asafe. 2 Wawa ana a Meshelemiya: mun’enji wa somi wakhalele Zakaliya, wa mbadi Yediaele, wa thathu Zebadia, wa nguana Yatanyele, 3 wa thano Elama, wa 6 Yohanana, wa 7 Eliyohenayi. 4 Wawa ana a Obede-Edome: mun’enji wa somi Shemaya, wa mbadi Yozabada, wa thathu Yoa, wa nguana Sakale, wa thano Netanele, 5 wa 6 Amiele, wa 7 Isakale, wa 8 Pheutayi, handaga Nzambi wamushimbigile.
6 Mun’enji Shemaya wavualele ana a mala; ana ene akhalele mafumu a fami jiawo, akhalele athu a ngolo, akhalele nji atagana ha gutshita midimo. 7 Ana a Shemaya enyawa: Otini, Refaele, Obede nu Elezabada; aphangi’enji Elihu nu Semakiya akhalele nji athu atagana ha gutshita mudimo. 8 Mukut’awo agasue akhalele ajigulu a Obede-Edome. Ene nu an’awo nu aphangi’awo akhalele enya ngolo jiavula, atagana ha gutshita mudimo; akhalele athu 62 mu vumo dia Obede-Edome. 9 Meshelemiya wakhalele nu ana nu aphangi’enji a mala, mukut’awo agasue akhalele athu 18 atagana ha gutshita mudimo. 10 Hosa mujigulu wa Melali wavualele ana a mala. Shimeli wakhalele fumu, ngatshima muene gakhalelego mona wa somi uvi sh’enji wamubuishile fumu; 11 wa mbadi wakhalele Hilikiya, wa thathu Tebaliya, wa nguana Zakaliya. Ana a mala agasue a Hosa nu aphangi’enji akhalele 13.
12 Mukatshi dia mahunji awa a abambi a mifulo, mafumu akhalele nu inemo ya luholo lumoshi nu aphangi’awo ha gutshita mudimo gu inzo ya Yehowa. 13 Atele mubela ha gukhaphela fami jiawo mifulo adi naye gubamba. Akalegele ngenyi mukunda nu fami jiazonda nga jiakoma. 14 Tangua atele mubela, ahanele Shelemiya mufulo wa gu khanda ya mazogelo a kumbi. Atele nji mubela mukunda nu mun’enji Zekaliya, muhanyi wa malongo watema, amuhanele mufulo wa gu khanda ya nord. 15 Atele luko mubela, ahanele Obede-Edome mufulo wa gu khanda ya sud, ahanele an’enji ginemo gia gutalela sugu akhalele mubambela ima. 16 Shuphime nu Hosa ahanewe mufulo wa gu khanda ya mayilo a kumbi hehi nu Mufulo wa Shalekete gu khanda ya njila yakoma idi mukanduga; mahunji a abambi akhalele khanda nu khanda. 17 Gu khanda ya mazogelo a kumbi, enya Levi akhalele 6; gu khanda ya nord, akhalele muwana lusugu nu lusugu; gu khanda ya sud, akhalele nji muwana lusugu nu lusugu; gu sugu jia gubambela ima, abambi akhalele gugu muyadi, gugu muyadi. 18 Mukunda nu gambalanda* gakhalele nu makunji gu khanda ya mayilo a kumbi, abambi a mufulo akhalele nguana hehi nu njila yakoma, ako muyadi gu gambalanda gene. 19 Ene akhalele mahunji a abambi a mifulo a mu vumo dia Kora nu dia Melali.
20 Mukatshi dia enya Levi, Ahiya wakhalele mubamba sugu yakhalele nu umonyi wa mu inzo ya Nzambi wa giamatshidia nu sugu akhalele mubambela ima ya gijila.* 21 Mukatshi dia ana a Ladana, yakotelesa egi ana a mujigulu wa Geleshona, guakhalele nu Yehieli munu wakhalele mukatshi dia mafumu a fami jia mu vumo dia Ladana, 22 nu ana a Yehieli a mala, Zetame nu phangi’enji Yoele. Ene akhalele mutadila sugu ya umonyi wa inzo ya Yehowa. 23 Mukatshi dia ajigulu a Amerame nu a Yisehale nu a Hebrone nu a Uziele, 24 Shebuele mun’a Gershome mujigulu wa Moize, muene wakhalele fumu wakhalele mutalela sugu akhalele mubambela ima. 25 Aphangi’enji anyi akhalele ajigulu a Eliezele akhalele: Lehabia, Yeshaya, Yolama, Zikri nu Shelomota. 26 Shelomota nu aphangi’enji a mala, ene akhalele mutadila sugu jiagasue akhalele mubambela ima ya gijila. Fumu Davidi nu mafumu a fami jiawo nu mafumu a athu 1 000 nu mafumu a athu 100 nu mafumu a masuta, ene abuishile ima yene ya gijila. 27 Azudile ima atambudile gu ita, ayibuishile ya gijila ha gulondela inzo ya Yehowa. 28 Guakhalele nji nu ima yabuishiwe ya gijila gudi Saula mun’a Kishi, nu Abnere mun’a Nere, nu Yoabe mun’a Seluya nu Samuele, muthu wakhalele mudiangela ngumona ndaga mbajibua gu matuama. Ima yagasue yabuishiwe ya gijila yahanewe ha mago a Shelomota nu aphangi’enji.
29 Mukatshi dia ajigulu a Yisehale: Kenaniya nu an’enji a mala akhalele mutshita midimo inyi yakhalelego mukatshi dia midimo ya monzo ya Nzambi. Akhalele mafumu nu manzuji gu Isalele.
30 Mukatshi dia ajigulu a Hebrone, guakhalele nu Hashabiya nu aphangi’enji a mala 1 700 anyi akhalele atagana ha gutshita midimo, akhalele atuameji gu Isalele gu khanda ya mayilo a kumbi a Yordane; akhalele nji mutuameza midimo yagasue ya Yehowa nu ya fumu. 31 Yeliya wakhalele fumu mukatshi dia ajigulu a fami ya Hebrone. Mu givo gia 40 gia uhinyinyi wa fumu Davidi, athu a Davidi ako akambele mala a ngolo akhalele atagana ha gutshita mudimo mukatshi dia ajigulu a Hebrone, a amonele gu Yazele mu mavu a Gileade. 32 Aphangi’enji a mala akhalele 2 700, akhalele mala atagana ha gutshita mudimo, akhalele nji mafumu a fami jiawo. Hene, Fumu Davidi waahanele ginemo gia gutalela enya giphuta gia Ribene nu enya giphuta gia Gade nu gitshinyi gia giphuta gia Manase. Akhalele mutshita midimo yatadila gikombelelo gia Nzambi wa giamatshidia nu midimo ya fumu.