Estere
1 Eji ndaga jiabalegele mu masugu a Aseluse* munu wakhalele muhinyina baprovense 127 sendese gu Inde uu nu gu Etiopi.* 2 Mu masugu ene tangua Fumu Aseluse wakhalele muhinyina mu inzo ya fumu* gu Suse, 3 mu givo gia thathu gia uhinyinyi wenji, wakalegele wano mukunda nu mafumu ako agasue a mu ufumu wenji nu enya mudimo enji. Mafumu a masuta a gu Phelese nu a gu Mede nu manene nu mafumu a baprovense, akhalele gutuama dienji. 4 Wabalegesele masugu avula, yakotelesa egi masugu 180 ha guadijiga umonyi nu lutumbu lua ufumu wenji, nu lutumbu luenji nu ngolo jienji. 5 Tangua masugu ene atagenele, fumu wakalegele wano masugu 7 mukunda nu athu agasue akhalele mu inzo ya fumu gu Suse, sendese gudi athu a lutumbu uu nu gudi athu ako agasue, mu gibanzala gia jarde* ya inzo ya fumu. 6 Gibanzala giene giakhalele gia gulonda nu mulele wa linene nu ndanda* yabonga, nu mulele wa ble wa gujitshiga nu ngonji jia mulele wabonga, nu mulele wa uvuji wa shitu wabenguluga wa gujitshiga gu minengu* ya utadi wa siliva. Guakhelele nji nu makunji a marbre* nu ife ya wolo nu ya utadi wa siliva yakhalele holu dia maseso a porfire anamigile hashi, nu marbre nu musanga,* nu marbre a buita.
7 Ahanele athu matombe mu makhopho a wolo, khopho nu khopho diakhalele dia gudisha nu khopho diko, matombe a fumu akhalele avula diago gifua muakhalele umonyi wenji. 8 Muthu nu muthu wakhalele naye gunua matombe gifua luholo luatshiginyile muene,* handaga fumu wawambelele athu akhalele mutshita mudimo mu inzo yenji ya ufumu egi muthu wagasue anue gifua mudi mutshigina muene.
9 Vaseti mukaji’a fumu walondele nji wano mukunda nu akhetu mu inzo ya Fumu Aseluse.
10 Mu lusugu lua 7 tangua fumu wakhalele nu gusuanguluga mukunda nu matombe anuile muene, watamegele Mehumana nu Bizeta nu Halebona nu Bigeta nu Abageta nu Zetale nu Kalekase. Athu ene 7 akhalele mutshita mudimo mu inzo ya fumu, akhalele mutshita mudimo wene gutuama dia fumu Aseluse. 11 Waawambelele ha guza nu Vaseti mukaji’a fumu ya gusudiga gipho* gia ufumu hagula adijige athu nu mafumu ako gubonga guenji, handaga wakhalele diago wabonga. 12 Uvi Vaseti wakhalele mutuna guya gudi fumu, watunyile gutshita ndaga yazuelele fumu mu njila ya enya mudimo a mu inzo ya fumu. Hene fumu wavuile khabu jiakola diago.
13 Fumu watele maga nu athu atema anyi akhalele mujiya luholo asophesele milonga ya luholo elu mu masugu abalega* (ngenyi milonga ya fumu yakhalele muya gudi athu agasue akhalele mujiya muabonga mukhuala nu milonga ya luholo elu inyi yasophewe gale. 14 Ahanyi enji a malongo* akhalele mukhala diago hehi n’enji akhalele, Kaleshena nu Shetale nu Ademata nu Tarsise nu Melese nu Malesena nu Memukana. Akhalele mafumu 7 a gu Phelese nu gu Mede anyi akhalele muya gudi fumu nu akhalele nji nu mafundo abalega ndando mu ufumu.) 15 Gungima fumu wahudile egi: “Ha gutadila mukhuala, itshi tudi naye gutshita mukaji’ami Vaseti luholo luatunyi muene gutshita ndaga ngamuwambela mu njila ya athu ana tshita mudimo mu inzo yami?”
16 Memukana wazuelele ha meso a Fumu Aseluse nu mafumu ako egi: “Mukaji’a fumu gatshitshilego ndaga yabola gudi fumu hakhenji, uvi watshitshi nji ndaga yabola gudi mafumu agasue nu athu agasue a mu provense jiagasue jia Fumu Aseluse. 17 Handaga akhetu agasue mbajiya ndaga yatshitshi mukaji’a fumu, ene nji mbaasegulula alumi’awo egi: ‘Fumu Aseluse watamegele mukaji’enji Vaseti ha guya gutuama dienji, uvi muene watunyile.’ 18 Mu lusugu luene akaji’a mafumu a gu Phelese nu gu Mede anyi mbajiya ndaga yatshitshi mukaji’a fumu, mbaayizuelela nu mafumu agasue a mu ufumu wa Aseluse. Ndaga yene mbayisagesa athu nu mbayaahana khabu. 19 Gula idi ndaga yabonga gu meso a fumu, ambe mukhuala, usonegewe nji mukatshi dia mikhuala ya gu Phelese nu gu Mede inyi yajiyilego gusombegesewa. Mukhuala wene udi naye guzuela egi Vaseti gajiyilego luko guya gutuama dia Fumu Aseluse; fumu ahane fundo dienji dia lutumbu gudi mukhetu muko udi wabonga gubalega Vaseti. 20 Tangua mukhuala wa fumu Aseluse mbawujiyiwa mu ufumu wenji wagasue, akhetu agasue mbaanemesa alumi’awo, sendese gudi athu a lutumbu uu nu gudi athu ako agasue.”
21 Matangi ene asuanguluishile fumu Aseluse nu atuameji ako a mu ufumu wenji, hene fumu wakalegele ndaga yazuelele Memukana. 22 Fumu watumile mikanda mu provense jiagasue jia mu ufumu wenji, ayisonegele mu isona* ya mu provense nu provense, athu nu athu mu zuelelo diawo, mikanda yene yakhalele muzuela egi yala wagasue akhale fumu mu inzo yenji nu akhale muzuela zuelelo dia gumbo diawo.*