Gudi Enya Hebelu
10 Mukhuala ushigo mumonesa ndaga jia giamatshidia, uvi udi givule-vule gia ndaga jidi naye guza. Wajiyilego* gukuatesa athu ana suena hehi nu Nzambi mu njila ya milambu ana hana givo nu givo ha gubua athu atagana. 2 Gula ishigo ngenyi, akhalelego naye gubemba guhana milambu ba? Handaga gula athu ana kalagala mudimo wa gijila awevewa, anago gudisagesa luko mukunda nu masumu awo. 3 Milambu yene yana wunguluisa athu masumu awo givo nu givo, 4 handaga mahatshi a ngombe nu a khombo ajiyilego gukatula gubola gua athu nga hazonda.
5 Gishina giene, tangua diajile muene ha mavu, wazuelele egi: “‘Aye watshiginyilego milambu nu misomonyi, uvi wangulondele muila. 6 Aye wasuangulugilego nga nu milambu ya guwotshia nga milambu mukunda nu gubola.’ 7 Ngazuelele egi: ‘Tala! Oo Nzambi, ngaza (mu rulo* yasonegewe mukunda nu ame) ha gukalagala gutshigina guaye.’” 8 Hazuelele muene thomo egi: “Aye wasuangulugilego nga hazonda nu milambu nu misomonyi nu milambu ya guwotshia nu milambu mukunda nu gubola,”— inyi yana hanewa mu gudivua nu Mukhuala— 9 gungima wazuelele egi: “Tala! Ngaza ha gukalagala gutshigina guaye.” Muene wakatuile ulondegi wa thomo ha guhaga ulondegi wa mbadi. 10 Mu “gutshigina” guene, tuabuile athu a gijila mukunda nu mulambu wa muila wa Yesu Klisto wahanele muene mbala imoshi.
11 Nganga-nzambi wagasue wanaya ha fundo dienji dia mudimo lusugu nu lusugu ha gukalagala mudimo wa gijila nu ha guhana milambu ya luholo lumoshi mbala jiavula. Uvi milambu yene yajiyilego gukatula gubola nga hazonda. 12 Uvi muthu yowu wahanele mulambu umoshi mukunda nu masumu. Mulambu wene udi nu ngolo mayilago. Gungima wakhalele gu koko dia madia dia Nzambi. 13 Udi munengena uu nu tangua mbalagaji jienji mbajihagewa goshi’a ikanzo yenji. 14 Athu anyi adi mubuishiwa athu a gijila, muene waabuishile athu atagana mayilago mu njila ya mulambu umoshi. 15 Nyuma ya Nzambi idi nji gututshiginyisa ndaga yene, handaga idi muzuela egi: 16 “‘Gigi gikotelo mbangukota nawo gungima dia masugu anyi. Ame mbangumba mikhuala yami mu matangi’awo nu mbanguyisonega mu mitshima yawo.’” Yehowa udi muzuela. 17 Idi muzuela luko egi: “Mbangutangizago luko nga hazonda masumu awo nu makalegelo awo abola.” 18 Gula Nzambi watotesa gubola gua athu, mulambu mukunda nu masumu wana khalago luko nu ndando.
19 Hene aphangi, mu njila ya mahatshi a Yesu, tushigo nu woma ha gungina mu njila ya fundo dia gijila 20 inyi yatukanguile muene gifua njila ihe-ihe idi mubata gu monyo. Wayikanguile tangua diabalegele muene gu rido. Rido yene idi muila wenji. 21 Luholo tudi nu nganga-nzambi wakoma wana tuameza hungu* dia Nzambi, 22 tusuene gudi Nzambi nu mutshima wagasue nu gutshigina guagasue nu mitshima yabonga nu yaphelegeta nu mila yetu yawevewe gale mu meya aphelegeta. 23 Tulandule gulongesa ndaga yatadila felela dietu, tuwungaganago, handaga muthu wahanele laji diene wana tagenesa mbimbi jienji. 24 Tukhalenu gudisagesa* mukunda nu athu ako ha gudizumba nu ha gukalagala midimo yabonga, 25 tubembigo guya mu gudibungisa guetu gifua muana tshita athu ako. Uvi tudihanenu gikhesa, tutshitenu ngenyi muavula handaga lusugu lua Nzambi luasuena hehi.
26 Handaga gula tuakalagala gubola nu mutshima wagasue gungima dia guheta ujiyi wa diago wa giamatshidia, gushigo luko nu mulambu wajiya gukatula gubola guetu. 27 Uvi mbatukhala nu woma wa gunengena usopheshi nu khabu jidi gifua tshuya, jinyi mbajikonda mbalagaji jia Nzambi. 28 Gula muthu mumoshi washiya Mukhuala wa Moize, adi naye gumushiya gula mathemua mbadi nga thathu amufuisa milonga. Ashigo naye gumuvuila khenda. 29 Mudi mutangiza egi ndola itshi mbayihanewa gudi muthu udi mudiata Mun’a Nzambi nu udi mumona egi mahatshi a gikotelo anyi amubuishile muthu wa gijila ashigo nu ndando nu udi mushinga nyuma ya Nzambi idi mu gudivua nu khenda jienji jiakoma? 30 Handaga esue mujiya Muthu wazuelele egi: “Ame mbanguvutula gubola, ame mbanguhana ndola.” Wazuelele nji egi: “Yehowa mbawusophesa athu enji.” 31 Idi ndaga ya woma diago gula muthu wahanewa ndola gudi Nzambi wa monyo.
32 Landulenu gutangiza masugu abalega, tangua muanya wa Nzambi walemele gudi enue, hamuakolesele mu usageshi wakola nu mu malamba. 33 Matangua ako akhalele gumishinga nu akhalele gumimonesa lamba ha meso a athu agasue. Matangua ako, enue muakhalele mukuatesa* athu anyi akhalele mumona malamba gifua enue. 34 Enue muavile khenda mukunda nu athu anyi akhalele mu bologo, muatshiginyile nu gusuanguluga guagasue egi ima yenu ikuyiwe, handaga muakhalele mujiya egi mudi nu umonyi wabonga unu ushigo nu gisugishilo.
35 Hene, mutotesago gikhesa gienu,* handaga mbamuheta lufuto luavula mukunda nu gikhesa giene. 36 Mudi naye gukolesela, mudi naye nji gutshita gutshigina gua Nzambi hagula muhete ndaga jiamitendelele muene. 37 Handaga “tangua diasala diago diazonda,” “muthu udi naye guza mbawuheta, muene mbagashigo mushipha.” 38 “Uvi muthu wami wana kalagala ndaga jiabonga mbawukhala nu monyo mukunda nu gutshigina guenji.” “Uvi gula wavutuga gungima, ngana suanguluga ndo n’enji.” 39 Esue tushigo athu ana vutuga gungima ha gushiyiwa, uvi tudi athu adi nu gutshigina ha guhuluisa mionyo yetu.