Yoshua
23 Masugu avula abalegele sendese tangua Yehowa wahanele enya Isalele guhuima haahuluishile muene gudi mbalagaji jiawo jiagasue jiakhalele nawo hehi. Tangua Yoshua wakhalele diago muthu wa gukola, 2 watamegele Isalele yagasue: akulu, mafumu, manzuji nu atuameji. Waawambelele egi: “Ngabua muthu wa gukola; gualeha ndo ngudi mufua gami. 3 Enue hakhenu muamonele ndaga jiagasue Yehowa Nzambi wenu wakalegele ifutshi eyi mukunda nu enue, handaga Yehowa Nzambi wenu muene wakhalele mulua mukunda nu enue. 4 Talenu, gungima dia guta mubela, ngamihanele mavu a athu asadi mu gifutshi nu mavu a athu anyi ngashiyile, mavu ene adi khapho ngahanele iphuta yenu, sendese gu Yordane uu nu gu Kianga Giakoma* gu khanda ya mayilo a kumbi. 5 Yehowa Nzambi wenu wakhalele guakaya gutuama dienu, waakayele mu gifutshi mukunda nu enue; hene muazudile mavu awo gifua muamilayele Yehowa Nzambi wenu.
6 “Mudi naye gukhala diago nu gikhesa ha gunemesa nu ha gutumagela ndaga jiagasue jidi jia gusonega mu mukanda wa Mikhuala wa Moize, mubembigo ndaga jiene nga hazonda ha guya gu koko dia madia nga dia mahidi, 7 mudibungisago nu athu asala mukatshi dienu. Mushigo naye gutanga majina a nzambi jiawo, nga gudiloga mu majina a nzambi jiene. Mushigo naye gujikalegela nga gujifugamela. 8 Uvi mudi naye gusala ya gujinginyina gudi Yehowa Nzambi wenu gifua luholo muana guyitshita uu nu mangino. 9 Yehowa mbawukaya ifutshi yakoma nu ya ngolo gutuama dienu, handaga gushigo nu muthu wakhalele gale nu ngolo jia gumagana gutuama dienu uu nu mangino. 10 Muthu mumoshi mukatshi dienu mbawukaya athu 1 000, handaga Yehowa Nzambi wenu udi mulua mukunda nu enue, gifua luholo luamilayele muene. 11 Hene, monesenu gutema tangua diagasue, zumbenu Yehowa Nzambi wenu.
12 “Uvi gula muatuna Nzambi, muakuata ufuta nu athu asadi n’enu mu gifutshi, muakota nawo gikotelo ha gudizula nawo mu ulo nu muadibungisa nawo, 13 jiyenu egi Yehowa Nzambi wenu mbagashigo gumikayela luko athu asalele mu gifutshi. Ene mbaabua gifua wanda, gifua muheto nu gifua fimbo ha makunda enu, mbaakhala nji gifua miya mu meso enu uu nu tangua mbamuhua mu gifutshi egi giabonga giamihanele Yehowa Nzambi wenu.
14 “Tegelelenu! Ngudi mutshigina gufua.* Mudi mujiya muabonga nu mutshima wenu wagasue nu monyo* wenu wagasue egi ndaga jiagasue jiabonga jiamilayele Yehowa Nzambi wenu jiatagenesewe. Gushigo nga mbimbi imoshi yadile gutagenesewa ndo. Ndaga jiagasue jiatagenesewe mukunda nu enue. 15 Uvi gifua luholo ndaga jiagasue jiabonga jiamilayele Yehowa Nzambi wenu jiatagenesewe mukunda nu enue, Yehowa mbawumibatela nji malamba* alayele muene, mbawumimanesela mu gifutshi egi giabonga giamihuile Yehowa Nzambi wenu. 16 Gula muashiya gikotelo gia Yehowa Nzambi wenu giamiwambelele muene ha gunemesa nu gula muaya mukalegela nzambi jiko, muajifugamela, ngenyi Yehowa mbawumivuila khabu jiakola, mbamufua muphushi mu gifutshi egi giabonga giamihuile muene.”