Yoshua
11 Tangua fumu Yabine wa gu Hasole wavuile ndaga yene, watumile mbimbi gudi fumu Yobaba wa gu Madona nu gudi fumu wa gu Shimelone nu gudi fumu wa gu Akeshafe, 2 nu gudi mafumu akhalele gu khanda ya nord ya milundu, nu anyi akhalele mu mababa* gu khanda ya sud ya Kinelete, nu anyi akhalele gu Shefela nu anyi akhalele gu tumilundu tua Dole, gu khanda ya mayilo a kumbi. 3 Watumile nji mbimbi gudi enya Kanana akhalele gu khanda ya mazogelo a kumbi nu gu khanda ya mayilo a kumbi, nu gudi enya Amole, nu gudi enya Hete, nu gudi enya Phelese, nu gudi enya Yebuse akhalele gu khanda ya milundu, nu gudi enya Hivi akhalele gu mbongo ya Helemona mu mavu a Mispa. 4 Ajile nu masuta awo agasue. Akhalele avula diago gifua gishegele mu khulo ya muta, akhalele nji nu tubalu tuavula nu phusu-phusu jia ita. 5 Mafumu ene agasue adivuile ha gutagana. Mukut’awo agasue ajile muhaga phundo hehi nu gito gia meya gia gu Melome ha guluisa Isalele.
6 Hene Yehowa wawambelele Yoshua egi: “Waavuilago woma, handaga hamene mu tangua edi, mbanguahana mukut’awo agasue ha mago a Isalele, mbamuashiya diago. Mbawubatula mishiya ya malu ya tubalu tuawo, nu mbawukonda phusu-phusu jiawo ha tshuya.” 7 Yoshua nu masuta agasue ayile gualuisa mu gisagumuisa hehi nu gito gia meya gia gu Melome. 8 Yehowa waahanele ha mago a enya Isalele. A abingile, a alanduile uu nu gu Sidona Yakoma nu gu Miselefote-Mayime nu mu baba dia Mispa, gu khanda ya mazogelo a kumbi. A ashiyile, guasalelego nga muthu mumoshi nu monyo. 9 Gungima Yoshua waakalegele gifua luholo Yehowa wamuwambelele: wabatuile mishiya ya gu malu ya tubalu tuawo, wakondele phusu-phusu jiawo tshuya.
10 Gungima Yoshua wavutugile, watambuile dimbo dia Hasole, washiyile fumu wadio nu phogo ya khusa; handaga dimbo dia Hasole diakhalele thomo dimbo diabalega ndando mukatshi dia membo ako a ma ufumu ene agasue. 11 Ashiyile athu* agasue a mu dimbo diene nu phogo ya khusa, abembelego nga gima gimoshi nu monyo. Gungima wakondele dimbo diene tshuya. 12 Yoshua watambudile membo agasue a mafumu ene, washiyile nji mafumu ene agasue nu phogo ya khusa. Waashiyile gifua luholo Moize muenya mudimo wa Yehowa wazuelele. 13 Uvi enya Isalele akondelego membo ako agasue akhalele gu tumilundu, phamba dimbo dia Hasole dinyi Yoshua wakondele tshuya. 14 Enya Isalele azudile ima yagasue ya mu membo ene nu shitu jiawo. Uvi ashiyile athu agasue nu phogo ya khusa, a amanesele mukut’awo agasue. Abembelego nga muthu mumoshi nu monyo. 15 Ndaga Yehowa wawambelele Moize muenya mudimo wenji, Moize wajiwambelele Yoshua, Yoshua wakalegele ndaga jiene. Wakalegele diago ndaga jiagasue Yehowa wawambelele Moize.
16 Yoshua watambudile mavu awa agasue: khanda ya milundu, Negebe yagasue, mavu agasue a gu Goshene nu Shefela nu Araba, nu khanda ya milundu ya Isalele nu mbongo ya milundu yene,* 17 sendese gu Mulundu wa Halaka udi mukanduga gu Seyile uu nu gu Bale-Gade mu baba dia Libane gu mbongo ya Mulundu wa Helemona. Wabingile mafumu ene agasue, waakuatele, waashiyile. 18 Yoshua waluile ita nu mafumu ene masugu avula. 19 Gushigo nga nu dimbo dimoshi diadivuile nu enya Isalele, phamba enya Hivi akhalele gu Gibeona. Enya Isalele abingile membo ako agasue gu ita. 20 Yehowa wabembele egi akolese mitshima yawo hagula aye aluise enya Isalele, hagula muene a ashiye guavuila ndo khenda. Akhalele naye gushiyiwa gifua luholo Yehowa wawambelele Moize.
21 Mu tangua diene, Yoshua washiyile ana a Anaka akhalele gu khanda ya milundu, gu Hebrone, gu Debile, gu Anaba nu gu khanda yagasue ya milundu ya Yuda nu gu khanda yagasue ya milundu ya Isalele. Yoshua waashiyile nu membo awo. 22 Guasalelego nga nu mun’a Anaka mumoshi mu mavu a enya Isalele; asalele phamba gu Gaza, gu Gate nu gu Asedode. 23 Ngenyi Yoshua watambudile mavu agasue gifua luholo Yehowa walayele Moize. Gungima Yoshua waahanele gudi enya Isalele gifua khapho, hagula akhaphewe mu giphuta nu giphuta. Gifutshi giakhalele mu guhuima, ita yakhalelego luko.