Mukanda wa Mbadi wa Mafumu
19 Tangua Fumu Ezekiase wavuile ndaga yene, watawile milele yenji, wasudigile sagi, wayile mungina mu inzo ya Yehowa. 2 Gungima watumile Eliyakime munu wakhalele mutuameza inzo ya fumu, nu sekretere Shebna nu atuameji a nganga-nzambi ha guya mumona profete Yeshaya mun’a Amoza. Mukut’awo agasue akhalele a gusudiga sagi. 3 Awambelele Yeshaya egi: “Ezekiase wazuela egi: ‘Mangino idi lusugu lua gikenene, lusugu lua gubalelewa* nu lua musonyi; handaga tudi gifua mukhetu udi mutshigina guvuala uvi gashigo nu ngolo jia guvuala. 4 Mbala jiko Yehowa Nzambi waye mbawuvua mbimbi jiagasue jiazuedi Rabeshake, gaphungu ganyi fumu wa gu Asiliya watumi ha gushingana Nzambi wa monyo. Mbala jiko Yehowa Nzambi waye mbawumuhana ndola mukunda nu mbimbi jiavui muene. Tshita gisambu mukunda nu ndambo ya athu asala nu monyo.’”
5 Hene, enya mudimo a Fumu Ezekiase ayile gudi Yeshaya. 6 Yeshaya waawambelele egi: “Ndenu muwambele fumu wenu egi: ‘Yehowa wazuela egi: “Uvuigo woma mukunda nu ndaga wavui, mukunda nu mashingo angushingi tuphungu tua fumu wa gu Asiliya. 7 Mbangumumba matangi amoshi mu muto,* muene mbawuvua lumene lumoshi, mbawuvutuga mu gifutshi gienji; gungima mbangutshita egi ashiyiwe nu phogo ya khusa mu gifutshi gienji.”’”
8 Tangua Rabeshake wavuile egi fumu wa gu Asiliya wakatuga nu masuta enji gu Lakishe, wavutugile gudi fumu, wamusangele muluisa dimbo dia Libena. 9 Mu tangua diene, fumu wa gu Asiliya wavuile egi Fumu Tilaka wa gu Etiopi yowu muza ha gumuluisa. Hene, watumile athu ha guya luko gudi Fumu Ezekiase, waawambelele egi: 10 “Wambelenu Ezekiase, fumu wa gu Yuda egi: ‘Nzambi waye munu udi mushila mutshima gaguhuigigo egi: “Fumu wa gu Asiliya mbagashigo mutambula dimbo dia Yelusalema.” 11 Tegelela! Wavuile ndaga mafumu a gu Asiliya atshitshile ifutshi yagasue yashiyile ene. Udi mutangiza egi phamba aye mbawuhuluishiwa ba? 12 Ifutshi inyi akhakh’ami ashiyile, nzambi jiawo jiaahuluishile ba? Enya gu Gozana nu enya gu Halana nu enya gu Lesefe nu enya gu Edene anyi akhalele gu Telasale adi gui? 13 Fumu wa gu Hamate nu fumu wa gu Alephada nu fumu wa membo a Sefalevayima nu wa gu Hena nu wa gu Iva adi gui?’”
14 Ezekiase wazanguile mikanda ha mago a athu atumile fumu wa gu Asiliya, wayitangele. Gungima wakandugile gu inzo ya Yehowa, wakanguile mikanda yene gutuama dia Yehowa. 15 Ezekiase wasendesele gutshita gisambu gutuama dia Yehowa egi: “Oo Yehowa Nzambi wa Isalele, aye udi wa gukhala ha nguasa yaye ya ufumu holu* dia basheribe, phamba aye udi Nzambi wa giamatshidia wa ma ufumu agasue a ha mavu. Aye wafugile dilu nu mavu. 16 Oo Yehowa, haga matshui, tegelela! Oo Yehowa, kangula meso, tala! Tegelela mbimbi jiatumi Senakeribe ha gugushinga aye Nzambi wa monyo. 17 Oo Yehowa, idi yadiago egi mafumu a gu Asiliya ashiyile ifutshi, abolesele nji mavu a ifutshi yene. 18 Akondele nji nzambi jiawo ha tshuya handaga jiene jiakhalelego nzambi jia giamatshidia, uvi isongo athu alondele nu mitshi nu maseso. Gishina giene ajimuangele. 19 Uvi henyaha, Oo Yehowa Nzambi wetu, tuabuba, tuhuluise ha mago a fumu wa gu Asiliya, hagula ma ufumu agasue a ha mavu ajiye egi phamba aye udi Nzambi, Oo Yehowa.”
20 Gungima Yeshaya mun’a Amoza watumile mbimbi gudi Ezekiase egi: “Yehowa Nzambi wa Isalele wazuela egi: ‘Ngavui gisambu watshitshi gudi ame mukunda nu Senakeribe, fumu wa gu Asiliya. 21 Eji mbimbi Yehowa wazuedi mukunda nu Senakeribe:
“Gandongo ga gu Siona gadi gugusegulula; gadi gugulela.
Mon’a mukhetu wa gu Yelusalema udi munyigisa muto wenji mukunda nu aye.
22 Aye, nanyi wakhadi mushinga nu wakhadi musegulula?
Nanyi wakhadi mubalela?
Nanyi wakhadi mutala nu lulendo?
Idi Nzambi wa Gijila wa Isalele!
23 Washingile Yehowa mu njila ya athu watumile, wazuelele egi:
‘Mbangukanduga holu dia milundu,
Mafundo a gualeha a gu Libane
Nu phusu-phusu jiami jiavula jia ita.
Mbangubatula mitshi yenji yaleha ya sedre, nu mitshi yenji yabonga ya jenevriye.
Mbangungina mu mafundo enji a gudisuega a gualeha, mu ishitu yenji idi nu mitshi yavula.
24 Mbanguhaga mawina a meya, mbangunua meya a mu mavu a ngenji;
Mbangumiginyisa ito* ya meya yagasue ya gu Ejipitu nu ikanzo ya malu ami.’
25 Wavuilego ba? Desizio diazudiwe* gale sendese mualeha.
Ngalondele ndaga yene sendese mualeha.
Henyaha ngudi guyitagenesa.
Membo adi nu ibayi yakola mbawaabuisa makhulu.
26 Athu awo mbaashigo mukhala nu muthu waguakuatesa;
Ene mbaavua woma, mbaavuishiwa musonyi.
Ene mbaabua gifua mayiji mu gilanga nu muangu,
Mbaabua gifua muangu wa ha yangi udi mumigina mukunda nu funji ya gu khanda ya mazogelo a kumbi.
27 Uvi ngudi mujiya muabonga tangua wana khala hashi, tangua wana zoga, tangua wana vutuga
Nu tangua wana gunguvuila khabu,
28 Handaga khabu wanguvuila nu gubala guaye guahetshi mu matshui ami.
Mbanguhaga ndobo yami gu mazulu aye nu lungonji* gu ivungu yaye,
Mbanguguvutula mu njila wajila.”
29 “‘Gijiyishilo ngudi guguhana* giene gigi: Mu givo egi mbamudia mbuto jia mvumbu; mu givo gia mbadi mbamudia mbuto mbajizoga mu mbuto jiene jia mvumbu; uvi mu givo gia thathu mbamukuna mbuto, mbamujikatula, mbamukuna nji mitshi ya vinyo, mbamudia mabundu ayo. 30 Enya Yuda anyi mbaasala nu monyo, mbaahaga miji goshi nu mbaazola mabundu gosa. 31 Handaga athu anyi mbaasala nu monyo, mbaazoga gu Yelusalema; athu mbaahuluishiwa, mbaazoga gu mulundu wa Siona. Yehowa Nzambi wa masuta mbawutshita ndaga yene nu gikhesa.
32 “‘Tala ndaga Yehowa wazuela mukunda nu fumu wa gu Asiliya:
“Muene mbagashigo mungina mu dimbo edi,
Mbagashigo nji musonona mufula guene
Nga gudiluisa nu tshibu,
Mbagashigo mulumbiga mavu gifua gamulundu ha guluisa dimbo.
33 Mbawuvutugila mu njila yajila muene;
Mbagashigo mungina mu dimbo edi,” Yehowa wazuela.
34 “Mbanguluila dimbo edi nu mbangudihuluisa mukunda nu jina diami
Nu mukunda nu muenya mudimo wami Davidi.”’”
35 Mu phipha yene, muanjelo wa Yehowa wajile, washiyile athu 185 000 mu phundo ya enya Asiliya. Tangua athu azugile nu gimenegena giagasue, amonele imbi yagasue. 36 Hene, Fumu Senakeribe wa gu Asiliya wavutugile, wayile mukhala gu Ninive. 37 Lusugu lumoshi, hakhalele muene mufugama ha gukombelela mu inzo* ya nzambi wenji Niseloka, an’enji Adalameleke nu Salesele amushiyile nu phogo ya khusa. Gungima alengele, ayile mukhala mu gifutshi gia Ararate. Mun’enji Esale-Hadona wabuile fumu ha fundo dienji.