Mukanda wa Thomo wa Mafumu
18 Gungima dia masugu mu givo gia thathu, Yehowa wawambelele Eliya egi: “Nda umone Ahaba handaga nguza munogesa mvula mu gifutshi.” 2 Eliya wayile ha gumona Ahaba tangua nzala yakhalele yakola gu Samaliya.
3 Mu tangua diene, Ahaba watamegele Obadia munu wakhalele mutuameza inzo ya fumu. (Obadia wakhalele muvuila Yehowa woma wavula. 4 Tangua Yezabele wakhalele mushiya* baprofete a Yehowa, Obadia wazudile baprofete 100, waasuegele 50 mu wina dimoshi dia seso, ako 50 mu wina diko. Wakhalele guabatela mapha nu meya.) 5 Ahaba wawambelele Obadia egi: “Tuye nu guwenda mu gifutshi mu ito yagasue ya mita nu mu mababa* agasue. Mbala iko tuajiya guheta muangu ha gudisa tubalu tuetu nu phunda jietu, hagula shitu jietu jiagasue jifuigo.” 6 Hene adikhaphele mafundo akhalele naye guya mu gifutshi. Ahaba wayile gu khanda yenji hakhenji, Obadia nji wayile gu khanda iko.
7 Hakhalele Obadia mu njila, Eliya wajile gumutagana. Obadia wamujiyile mbala imoshi. Wafugamele, washiwugile phala mu mavu, wazuelele egi: “Fumu wami Eliya, yowu aye?” 8 Eliya wamuvutuile egi: “Ayi, ame. Nda uwambele fumi’aye egi: ‘Eliya udi haha.’” 9 Uvi Obadia wazuelele egi: “Ndaga itshi yabola ngakalagala hagula unguhane ame muenya mudimo waye ha mago a Ahaba hagula angushiye? 10 Ngudi guguwambela giamatshidia mu jina dia Yehowa Nzambi waye udi nu monyo egi, fumu watumile athu mu ifutshi yagasue nu mu ma ufumu agasue ha gugukamba. Tangua enya mu gifutshi gimoshi nga ufumu umoshi akhalele muzuela egi: ‘Gashigo haha,’ wakhalele guatoga ha gudiloga egi agumonelego. 11 Henyaha aye udi gunguwambela egi: ‘Nda uwambele fumi’aye egi: “Eliya udi haha.”’ 12 Gula ngagubemba, ngaya, nyuma ya Yehowa mbayigubata ha fundo ngushigo mujiya. Gula ngaya muwambela Ahaba, uvi muene waza nu gugumona ndo, mbawudi diago gungushiya. Ame muenya mudimo waye ngana vuila Yehowa woma sendese ulenge wami. 13 Fumu, aguwambelelego ndaga ngakalegele tangua Yezabele wakhalele mushiya baprofete a Yehowa ba? Ngasuegele baprofete a Yehowa 100 mu mahunji mbadi, 50 mu wina dimoshi dia seso, ako 50 mu wina diko dia seso. Ngakhalele guahana mapha nu meya. 14 Uvi henyaha udi gunguwambela egi: ‘Nda uwambele fumu waye egi: “Eliya udi haha.”’ Muene mbawudi diago gungushiya.” 15 Uvi Eliya wamuwambelele egi: “Ngudi guguwambela giamatshidia mu jina dia Yehowa Nzambi wa masuta munu ngana kombelela* udi nu monyo egi, mangino ame hakhami ngudi muya gudimona n’enji.”
16 Obadia wayile gudi Ahaba, wamuwambelele ndaga yene. Hene, Ahaba wayile mutagana nu Eliya.
17 Tangua Ahaba wadimonele nu Eliya, wamuwambelele egi: “Yowu aye, muthu udi mubata malamba avula gu Isalele?”
18 Eliya wamuvutuile egi: “Ame ngushigo mubata malamba gu Isalele, uvi idi aye nu fami ya sh’aye handaga muabembi gutumagela mikhuala ya Yehowa, mualandula Bale. 19 Henyaha tamega enya Isalele agasue aze gudi ame gu Mulundu wa Karmele nu baprofete a Bale 450 nu baprofete 400 ana kombelela mutshi wa gijila,* anyi ana gudia ha mesa a Yezabele.” 20 Hene, Ahaba watumile athu ha gutamega enya Isalele agasue, wabungishile nji baprofete gu Mulundu wa Karmele.
21 Gungima Eliya wasuenele gudi athu agasue, waawambelele egi: “Uu nu tangua ditshi mudi naye gutangigiza ha guzula desizio? Gula Yehowa udi Nzambi wa giamatshidia, mulandulenu; uvi gula Bale, mulandulenu!” Uvi athu azuelelego nga gima. 22 Eliya wawambelele luko athu egi: “Mukatshi dia baprofete a Yehowa phamba ame ngasala, uvi baprofete a Bale adi 450. 23 Athu atubatele mitumba ya ngombe mbadi ya milume. Baprofete a Bale atombe umoshi, awukoke itshinyi-itshinyi, ahage itshinyi yene holu dia khunyi. Uvi ashigo naye guhaga tshuya. Ame nji nguza mulonda mutumba uko, nguwuhage holu dia khunyi. Uvi ngushigo nji muhaga tshuya. 24 Gungima baprofete a Bale adi naye gutamega jina dia nzambi wawo, ame nji nguza mutamega jina dia Yehowa. Nzambi munu uza mutuma tshuya ha guhana mvutu, muene udi Nzambi wa giamatshidia.” Athu agasue avutudile egi: “Ndaga wazuela idi yabonga.”
25 Eliya wawambelele baprofete a Bale egi: “Enue tombenu thomo mutumba wa ngombe ya mulume, muwulonde handaga mudi athu avula. Gungima mutamege jina dia nzambi wenu, uvi mushigo naye guhaga tshuya gu mulambu wenu.” 26 Hene, baprofete a Bale azudile mutumba wa ngombe ya mulume waahanewe, awulondele, asendesele gutamega jina dia Bale sendese mu gimenegena uu nu mu midi. Akhalele muzuela egi: “Oo Bale, tuhane mvutu!” Uvi avuilego nga dijui dimoshi, ahetelego nji nga mvutu imoshi. Akhalele muya nu gusumbuta tangua akhalele mukina mu khulo ya giwotshielo alondele. 27 Mu midi, Eliya wasendesele gualela, wazuelele egi: “Kalugugenu mangololo! Muana zuela egi udi nzambi! Mbala iko udi mutangiza ndaga iko, nga ndo wayi gudizunga.* Nga ndo yajiya gukhala egi udi yagubanda, idi mutoga egi muthu mumoshi amuzugise!” 28 Akhalele mukaluguga nu gudinamenesa nu phogo nu milumbu gifua muakhalele khadilo diawo, uu nu tangua mahatshi asendesele guazoga gu mila yawo yagasue. 29 Alanduile gutshita ndaga gifua enya malui* uu nu gungima dia midi, atshitshile nji ngenyi uu nu mu tangua ana hana mulambu wa mbuto wa mu ngueze. Uvi avuilego nga dijui, ahetelego nga mvutu. Nga ndaga imoshi yakalegewego.
30 Gu gisugishilo, Eliya wawambelele athu agasue egi: “Suenenu gudi ame.” Athu agasue asuenele gudi muene. Walondele luko giwotshielo gia Yehowa ginyi giamuangewe. 31 Wazudile maseso 12 gifua muakhalele guvula gua iphuta ya ana a Yakoba, munu Yehowa wawambelele egi: “Jina diaye mbadibua Isalele.” 32 Watungile giwotshielo nu maseso ene ha gutumbuisa Yehowa. Wahagele* wina mu khulo yagasue ya giwotshielo, fundo diene diakhalele diakoma diago diajiya gukunyiwa sea mbadi* jia mbuto. 33 Gungima wahagele khunyi mu ndonga, wakokele mutumba wa ngombe ya mulume itshinyi-itshinyi, wahagele itshinyi yene holu dia khunyi. Wazuelele egi: “Zalesenu meya mu mabungu nguana akoma, muabundule holu dia mulambu wa guwotshia nu holu dia khunyi.” 34 Gungima waawambelele egi: “Mbenu luko.” Ambile luko. Waawambelele luko egi: “Mbenu luko mbala ya thathu.” Ambile luko mbala ya thathu. 35 Meya amuanganele mu khulo yagasue ya giwotshielo. Eliya wazalesele nji meya mu wina diene.
36 Mu tangua ana hana mulambu wa mbuto wa mu ngueze, profete Eliya wasuenele hehi nu giwotshielo, wazuelele egi: “Oo Yehowa, Nzambi wa Abalahama, wa Izake nu wa Isalele, mangino tshita egi athu agasue ajiye egi aye udi Nzambi gu Isalele. Ajiye nji egi ame ngudi muenya mudimo waye nu aye wangutumi ha gutshita ndaga eji jiagasue. 37 Oo Yehowa! Nguhane mvutu. Nguhane mvutu hagula athu awa ajiye egi aye Yehowa udi Nzambi wa giamatshidia nu udi mutshigina egi avutuge luko gudi aye.”
38 Hene, tshuya tua Yehowa tuakatugile mu dilu, tuakondele mulambu wa guwotshia nu khunyi nu maseso nu fuphi; tuamiginyishile nji meya akhalele mu wina. 39 Tangua athu agasue amonele ndaga yene, afugamele mbala imoshi, ashiwugile phala mu mavu. Azuelele egi: “Yehowa udi Nzambi wa giamatshidia! Yehowa udi Nzambi wa giamatshidia!” 40 Gungima Eliya wawambelele athu egi: “Kuatenu baprofete a Bale! Nga mumoshi galengigo!” A akuatele mbala imoshi, Eliya wabulumugile nawo mu gamuta ga Kishiona,* waashiyile guene.
41 Eliya wawambelele Ahaba egi: “Kanduga uye udie, unue handaga ngudi muvua matululu a mvula yakola.” 42 Ahaba wakandugile ha guya mudia nu gunua. Mu tangua diene, Eliya wakandugile gu songi ya Mulundu wa Karmele, wafugamele, washiwugile uu nu mu mavu, phala moshi’a mabongo. 43 Gungima Eliya wawambelele muenya mudimo wenji egi: “Ngabuba, kanduga utale gu khanda ya kianga.” Muenya mudimo wenji wakandugile, watalele, wazuelele egi: “Ngamonelego nga gima.” Eliya wamuwambelele mbala 7 egi: “Vutuga luko.” 44 Mu mbala ya 7, muenya mudimo wenji wazuelele egi: “Ngamona gatuta gazonda gifua koko dia muthu mukanduga holu dia kianga.” Eliya wamuwambelele egi: “Nda uwambele Ahaba egi alonde phusu-phusu, abulumuge hagula mvula imukuatshigo!” 45 Mu tangua diene, gosa guabuitshile bui nu matuta, funji yabundjile, mvula yakola yasendesele gunoga. Ahaba wakhalele mu njila holu dia phusu-phusu yenji ha guya gu Yizelele. 46 Uvi Yehowa wahanele Eliya ngolo. Eliya wawongele mulele wenji uu nu mu mbunda, wazudile phushi gutuama dia Ahaba uu nu gu Yizelele.